Read Zotung Chin ISAIAH 47 Bible Online

ISAIAH 47 - Zotung Chin bible

ISAIAH 47

¹Pou liaccady Babilon, yn rungbung lah, vuiping kya haungtua! Pou ccanung Babilon, laekhu khe bawitungkhung leite haungtua! Nang kha ninccehoynung cite ko na thua vae lan khyh.

²Lungmia kha lawkuh lah, ccathae kha miatua, mae bongkupaw kha lyngku tua, na angkiccua kha khahku tua, na ccu kya-e kha thyngkuh lah, vawpi kha zuatua.

³Boeining bongku leite na sasete na um cih zah, na maethyanaw kha muih athua cih. Phu kae lah cih zah, lu kheit sanmah ka haang lan khyh.

⁴Kaening oun Shawkhawtupaw a min tuh vaaw BAWIPAW thua zah, Israel Pachia Athyaapaw nynh thua.

⁵Pou ccanung Babilon, daebabi lan haung lah, mohnaw lungkhu lang teetua! nang kha ram hae bawinung cite ae ko vae lan khyh hae.

⁶Ka ccungccaw hae tungvaw ka thinria, ka rho tungvaw ka lua ka aethua zah, minmin kha na kuih kya kae pya hae, mih tungvaw thawccinaw na hoi khyh; mih kum tang hae paw tungvaw kya phupaw myarya ripaw kha na phusah hae.

⁷Nang nynh, “Kae tuh bawinung lang zungzae ka tang cih,” cite na tuakuh zah, e uccaw hae hynh na thinlung kya na nung khyh, nyathya yn cyihkuh cih paw kha na tua khyh.

⁸Tukeiccuze hoysahnaw kyalya a rypaw nang, e bya hynh ngaetua, khyndadyh lan na um zah, “Kamaw kyalya nynh ka um, kamaw laelan ming hae humhung mah um khyh; nomaenung hawte ka um lan khyh, ccaaw hae nynh chitawnaw mah ka tung lan khyh,” cite na thinlung kya na tuaku.

⁹Nang nynh naawthya hae paw te mitleihthya hae paw kha na mang hae zemah, nin kheit lungkhu sosoh kyakhe, ccaaw hae chinaw te nomae lang tangnaw, e phuin ning hynh nynh na tungvaw ae thuanua cih.

¹⁰Na hoyleinaw kyakhe ngaengante na um; “Humhung nynh mah yn muih khyh,” na ciku. Na hawnaw te na nynaw nynh ae cciakhaesei vae, “Kamaw kyalya nynh ka um, kamaw laelan ming hae humhung mah um khyh,” cite na thinlung kya na tuaku.

¹¹Naawthyanaw te dee kho leipaw vawsawnaw nynh ae thuanua cih; na thungkhawku kho leipaw shethya nynh ae thuanua cih; na la tua leipaw ronaw nynh vaekheihmawte ae thuanua cih.

¹²Na ngawphue lya mawte thawte na la zuakupaw mitleihthyanaw te naawthyanaw hae kyakhe tynkaring lan thadyntua, taenaw kha mue mah poh na mue kho, thinphang rinaw kha mah poh na pya kho hae.

¹³Tuanaw pyakunaw kha patae na rae oh zah phe na bang vae oh; vaawlui kong ccangkute beidin dothya hae paw, awsi kong ccangkute beidin dothya hae paw, na tungvaw acyihkuh lanpaw kha sawpaw sah thawpaw takyh kya a hodaethya hae paw tuh thadyn hae sah lah, nanning kha ae khum oh sah.

¹⁴Minmin tuh athupaw hawte thua hae zah, maee nynh phe ccung lan a u cih hae; maeephupi kyate mimaw te mimaw khumkuh kho khyh hae; sosakunaw lanpaw maeehue thyhsan um vae lan khyh, eku lanpaw maee mah um vae lan khyh.

¹⁵Nang te rya na lahkheih oh paw, na ngawphue lyate kung na kukheih oh paw tuh na tungvaw tuhcite nynh athua hae; mih laanpi raveih kya khiavuikuh hae zah, nang ae khum lanpaw lu kheit san um vae khyh.