Read Zotung Chin ISAIAH 48 Bible Online

ISAIAH 48 - Zotung Chin bible

ISAIAH 48

¹Pou Jakob ciihan hae, Israel cite minphu athua hae paw te Judah tuisung kyate a pou hae paw, e hynh ngaetua oh; BAWIPAW min te bya na kinkuh oh zah, Israel Pachia kha kae beik na ci oh, thuasalama byaccing te, ahme te na beik khyh oh.

²Pawccecize minmin nynh athyaapaw khuapi kya a um hae paw te Israel Pachia kha a doliakuh hae paw nynh kae thua; tuh-e Pachia min tuh vaaw BAWIPAW nynh thua, a ci hae.

³Acyihkuh vae paw uccaw hae kong kha langmawlya mawte phe ka la hodae vae, tuh-e uccaw hae tuh ka khalang kyate pou zah, ny lante ka la rae vae; te tuh-e hae tuh palou ka cyih zah a um vae hae.

⁴Nang tuh a lungkhungpaw na thua zah, na nging tuh sivaw, na terui tuh sohin nynh thua cipaw ka ny keiccuze,

⁵“Ka zohtuh nynh e hynh a cyih, ka suhpaw zohtuh te ka laeepaw zohtuh nynh e hynh a cyih,” cite na ho khyh nawlan, e hae hynh langmawlya mawte phe ka ho vae, khah-e a um mawze nang kha phe kae hopya vae.

⁶E hae hynh phe na thae vae; e hae balyn hynh atu dotua; ming hae kalan na hopah lan khyh hae tou? Atu te malang vae tuh, uccaw thawpaw, na ny loh leipaw, thuruhpaw uccaw hae kha kae hopah cih.

⁷E hae hynh langmawlya te rae leite, atu te rae athua hae, “E hae hynh ka ny vae paw nynh thua,” cite na ho kho khyh nawlan, atunin athua maw tuh, e hae kong hynh papin na thae boi khyh.

⁸Na thae boi khyh zah na nyh boi khyh, langmawlya te na nakaring kha hungpya na thua khyh. Pawccecize nang tuh kharouhmaw zyn lan na um khyh, na pui takaw te ccungccaw doutu cite ko na thua.

⁹Kae tuh ka min hanlan ka thinrianaw kha ka ngaesang zah, ka min thehoysah nawlan, ka thinrianaw kha na hanlan ka synku, tuhteze nynh nang kha kae vua lan khyh.

¹⁰Nang kha akaw-aleih kae syntawtua, thuasalama ngun hawte kae syntawtua khyh; teingnaw maeephupi kyakhe kae syntawtua vae.

¹¹Ka min hanlan nynh ka cyi, pawccemou ka min tuh thethyasah athua cih? Ka phu-enaw kha ming hae ka pya lan khyh hae.

¹²Pou Jakob, ka kokupaw Israel, ka bya hynh yn ngaepya tua: Kae tuh Pachia nynh ka thua; kae tuh masaty ka thua zah nyathyakou mah ka thua.

¹³Ka kuih nynh laephi athonaw aleihpaw kha tynsah zah, ka ranglang kuih nynh vaawlui kha tharae a daw; vaaw te lae kha he ka ko hae tuh pekite palou a thadyn hae.

¹⁴Nae balyn te sueluakuh oh lah, ngaetua oh! Minmin laku e hum nynh mou e uccaw hae hynh langmawlya te a la hodae? BAWIPAW nynh amaw kha a sungsah; aning nynh Babilon khua khe BAWIPAW a eenaw kha a ccingsah cih zah, a kuih nynh Khaldi hae kha a rawse cih hae.

¹⁵Kamaw ccaccei nynh amaw kha ka hopah zah ka ko vae, amaw kha ka cciakhae zah, a laanpi kya a laan a sui a ua cih.

¹⁶Ka kalan yn naekuh oh lah, e bya hynh ngaetua oh! Athotakawnaw kyate aruh lante bya ka ho khyh, tuh-e acyiku ccyh lya mawte tuin kya kae ka um vae. Atu tuh Bawipaw PACHIA nynh kae te a Muisaw kha oun sawkheih vae.

¹⁷Nang ae Shawkhawtu, Israel Pachia Athyaapaw, BAWIPAW nynh a hopaw tuh: Kae tuh BAWIPAW na Pachia nynh ka thua, nang na hoynaw hanlan ae ccangpahtupaw te nang nynh zui lan accanpaw laanpi kya ae cciakhaetupaw nynh ka thua.

¹⁸Ka kawbya hae kha la zui vae ii! Tetuh na hoirumnaw tuh vawpi hawte athua cih zah, na taenaw tuh rili tuileih hawte athua cih;

¹⁹na ciihan tuh laesia zeih acih cih zah, na ccaaw na no hae tuh rili kya-e lungpyng zeih acih cih hae; mih min kha papin vua thua lan khyh, ka malang te ro thua lan khyh hae.

²⁰Babilon kyate pou oh, Khaldi hae kyate ccue oh, tuh-e kong tuh lungtua siaruate ho oh lah siakhae oh, laephi adianaw cia thaesah oh; “BAWIPAW a ryalahtu Jakob kha a shawkhaw vae!” cite ho oh.

²¹Minmin kha laesia ram kya he a cciakhae hae tuh tuihaw khyh hae; minmin hanlan lungpi kyate tui a luasah; lungpi kha poh hungsakuh zah tui a pousah.

²²BAWIPAW nynh, “Ccungccaw hoylei hae paw hanlan daenaw um khyh,” a ci.