Read Zotung Chin ISAIAH 5 Bible Online

ISAIAH 5 - Zotung Chin bible

ISAIAH 5

¹Ka sungsah kya-e misu khokhu te asekuhpaw sungsakunaw hlaw kha ka sungsah hanlan ka sahpah cih: Ka sungsahpaw tuh laephi myarya hoynaw mua vawlan khe misu khokhu ccangkheit a hoi.

²Laephi kha thae zah lung hae kha phe thyaa lan a vua, te ahoypaw misu ku kha a lin; khokhu ngaelung khe ngawnawpaw buhang kha sak zah, misu mia nawlan akhu kha a karyn; misu thae a thae lanpaw kha a ngaehoi, thuasalama ahoy leipaw misu thae lang nynh phe thae.

³Te atu, Jerusalem um hae paw te Judah ccungccaw hae, kae te ka misu khokhu hynh bya oun pia oh.

⁴Ka misu khokhu hanlan cyipya lan ccan zah ka cyipya leipaw pawmou a um ung? Misu thae a thae lanpaw ka ngaehoi lyakhe, pawccemou ahoy leipaw misu thae lang poh a thae?

⁵Ka misu khokhu hanlan pawmou ka cyih cih cipaw atu kae hopah cih oh. A hohung kha ka roh cih zah, milae nynh a ae cih; a lungrua kha ka ting cih zah syde athua cih.

⁶Misu khokhu kha alakawpaw lang ka tangsah cih; ahoy leipaw akaran kha baepya te pohpia te phopya mah thua lan khyh, thabu te hinpaw ku hae nynh a zithin cih; khokhu kya khuaa araw khyh nawlan maeking kha mah kaw ka pya cih.

⁷Israel phin tuh vaaw BAWIPAW kya-e misu khokhu nynh thua, Judah ccungccaw hae tuh aning nynh a linkupaw misu ku nynh thua; aning nynh byading kha a ngaehoi, thuasalama chiise luanaw kha a muih; dingnaw kha a ngaehoi, thuasalama rawnaw roi kha a thae!

⁸Milae hanlan umnaw a um lei lan ciate, inn te inn po kyngkuh lan na piade oh zah, nae loo pe ccangpaw loo kha na piachih oh zah ram lungkhu khe naemaw kyalya na um oh paw tuh ngaethya lan kou um!

⁹Vaaw BAWIPAW nynh ka thaenaw kya bya a kinkupaw tuh: Le zah apuithyapaw inn patae hynh a umtu um leite ccungccaw adae ccaccing cih.

¹⁰Pawccecize misu khokhu ekah ccanghaw nynh misutui galan ccangtaruh loukaw kha a pou cih, ccacii phu haw a tupaw nynh phu kheit kyalya kha a mue cih.

¹¹Ruithyapaw kha nia khylan awkhua takaw te a tho hae paw, khuazi mah misutui po a rui hae paw nanning hanlan ngaethya lan kou um.

¹²Mih poi kya tuh tintang te arui lungpaw tintang, tamboring, phyly te misutui a hoi hae, thuasalama BAWIPAW nynh a cyipaw kha pawlangria khyh hae zah, a kuih te rya a lawpaw kha muih khyh hae.

¹³Tukeiccuze ka ccungccaw hae tuh nytaw leite kyng hae zah ramccang lang a cciakhae hae; minmin a cciakhaetu hae tuh vuelawte vyavya a chih hae, mih ccungccaw zapi hae tuh tui kanmaw hae.

¹⁴Tukeiccuze michi khua tuh aerang-niarang myarya thua zah, a khalang kha thawte a aw; Jerusalem a phu-enaw, a ccungccaw zapi hae te mih lungtuapaw balyn tuh a ccahbung hae.

¹⁵Ccungccaw hae tuh maethyate a bakhung hae, mih balynte nyaasah bung hae zah a lysakuh hae paw tuh mih maesue phe roh.

¹⁶Thuasalama vaaw BAWIPAW tuh dingnaw te hangthung thua zah, Athyaapaw Pachia nynh a thyaanaw kha amaw toulou nynh dingnaw liate a langsahku.

¹⁷Tetuh arohpaw khuapi lungkhu khe tuutaw hae nynh ram a paeekunaw hae kya a ae hae hawte a ae cih hae zah, miaataw hae nynh rampaeekunaw kha a muihkuh cih hae.

¹⁸Hoyleinaw kha seinaw rui te a sue hae paw nanning, le kha arui te sue hawte seinaw kha a sue hae paw nanning hanlan ngaethya lan kou um,

¹⁹“Aening nynh ah muih ccaw oh, BAWIPAW nynh a ryalaw kha arangte lah vae sah! Aening nynh ah ny ccaw oh, Israel Pachia Athyaapaw nynh a paccynkupaw kha ccingsah lan rangsakuh vae sah!” cite na ho oh.

²⁰Ahoy leipaw kha ahoy, ahoypaw kha hoy khyh cite a ho hae paw, awnaw kha mohnaw lang, mohnaw kha awnaw lang a tangsah hae paw, akhahpaw kha a-epaw lang, a-epaw kha akhahpaw lang a tangsah hae paw nanning hanlan ngaethya lan kou um!

²¹Ka haw cite na muihkuh oh paw, naemaw mitmuihnaw kya na hawsakuh oh paw nanning hanlan ngaethya lan kou um!

²²Misutui nianaw kya minthaan hae paw te aphuinphuin pykuhpaw ruithyapaw nianaw kya mih rawthungpaw nanning te

²³pyaruh keiccuze a sei hae paw kha daangsah hae zah, seinaw a hoi lei hae paw nynh mue lan accanpaw kha a pya lei hae paw nanning hanlan ngaethya lan kou um!

²⁴Tukeiccuze, maee nynh ccatanphue kha u zah maeesoi nynh lonua aroupaw kha a u hawte, minmin tharui tuh a thuh cih zah minmin apaw tuh vuiping hawte akhuhthung cih; pawccecize minmin nynh vaaw BAWIPAW thuiheinaw kha ngae leite, Athyaapaw Israel Pachia bya kha pawlangria vae khyh hae.

²⁵Tukeiccuze BAWIPAW thinrianaw tuh a ccungccaw hae tungvaw maee lang rua zah a kuih dyngnua te minmin kha detah hae; mua hae tuh hy hae zah mih rhua hae tuh laanpi kya athupaw hawte a um hae. Thuasalama BAWIPAW thinrianaw tuh dae khyh zah a kuih po a dyng ung.

²⁶Asawnaw umpaw minphuin hanlan syntawnawpaw alan kha a hangpah thung cih zah, laephi adianaw umpaw ccungccaw hae hanlan fari kha a tupah cih hae. Te minmin nynh arangte a cceih vae hae!

²⁷Minmin kya a thawbangpaw um khyh, a thy a pawkuhpaw um khyh, a ngawphukuhpaw um khyh, a ihpaw um khyh, cce kya voikupaw mah phoukuh khyh, a phanah rui paepaw um khyh;

²⁸mih the tuh ahe, mih li tuh a tang, mih marang ccukoh hae tuh rihlung te lokuh zah, mih leccu hae tuh khiccung te nynh a loku hae.

²⁹Mih roi tuh chindeih a siapaw roi te lokuh zah chindeih anopaw hawte a sia hae; hurawte saw kha a kyngku hae, tuh-e saw tuh a cciakhaeku hae, te lu kheit nynh sanmah luesah kho khyh hae.

³⁰Tuin nin khe minmin tuh rili tuileih athopaw roi hawte a sia a rua cih hae. Tuh-e ram tuh do lanze mohnaw te riathaenaw rou nynh a um; awnaw tuh maeking khate amohkhaekuh vae.