Read Zotung Chin ISAIAH 52 Bible Online

ISAIAH 52 - Zotung Chin bible

ISAIAH 52

¹Pou Zion, thaeku tua, thaekuh lah, na thawzung kha thuaku tua! Pou Jerusalem, athyaapaw khuapi, apuithyapaw na boeining kha lawku tua; pawccecize vingdung a awkuh lei hae paw te athyaa lei hae paw tuh na lungkhu lang tee vae lan khyh hae.

²Pou a kyng hae paw Jerusalem, vuiping kha pheihkuh lah, thoku tua. Pou a kyng hae paw Zion ccanung, na nging kya ae khiinaw hae paw arui kha suku tua!

³BAWIPAW nynh a hopaw tuh: Nanning tuh amee leite zua na thua oh zah, phua pya leite shawkhaw na thua cih oh.

⁴Bawipaw PACHIA nynh hynhte a ho: Langmaw lyaze ka ccungccaw hae tuh Izip ram kya ramccang ccungccaw lante umbua khylan, Izip ram lang a cceihbung hae; Assiria hae nynh mah akonglang um leite minmin kha a tuaa a sah hae.

⁵BAWIPAW nynh a hopaw tuh: Ka ccungccaw hae kha akonglang um leite a cciakhae hae, tukeiccuze atu pawtemou ka cyih cih? Minmin a uktu hae tuh lungtuate siarua hae zah, ka min kha nin takyh po yn theihrya hae, cite BAWIPAW nynh a ci.

⁶Tukeiccuze ka ccungccaw hae nynh ka min kha yn nyh cih hae; tuin nin khe, minmin kalan bya a hotu tuh kamaw ka thuapaw kha a nyh cih hae; kae tuh hynh-e kyahin ka um.

⁷Daenaw kong, thehoypaw kong, khumnaw kong te “Zion kha na Pachia nynh a uk,” cite a hopaw zeccuetu a ccu tuh mua vawlan khe pawcih baban mou apuithya.

⁸Ngaetua! Na rhawviatu hae nynh mih roi kha saw hae zah, lungtuate pynkheihlan hlaw a sah hae; pawccecize BAWIPAW nynh Zion khua lang bua yn kipaw kha minmin nynh ccaerarih lan a muih hae.

⁹Jerusalem khua e arohpaw hmin hae, pynkheihlan hlawsahte siatua oh; pawccecize BAWIPAW nynh a ccungccaw hae kha ngaengannaw pya vae hae zah, Jerusalem kha a luesah vae.

¹⁰BAWIPAW nynh minphuin hae balyn malang khe athyaapaw a thungnaw kha a langsaku vae; ah Pachia khumnaw kha laephi adianaw e hae balyn nynh a muih cih hae.

¹¹Poutua oh, poutua oh, Babilon kyate pou oh! Athyaa leipaw kha ty nan oh; khe hmin kyakhate pou oh; BAWIPAW uccaw a phu hae paw nanning, naemaw kha thyaasakuh oh.

¹²Nanning tuh rangkhirangkhaete na pou lan khyh oh, ccue te mah na ccue lan khyh oh; pawccecize BAWIPAW tuh nae malang a cceih cih zah, Israel Pachia tuh nae nulang te ae rintu oh paw athua cih.

¹³Dotua, ka ryalahtu tuh a laan a sui a ua cih; aning kha hangthungte thehoysah athua cih zah myarya a hangkuh cih.

¹⁴A maesue tuh myarya roh zah ccungccaw muinsan alo khyhpaw kha a ngaeangthuapaw myarya alung,

¹⁵tuhcite minphuin patae kha a siisaku hae; aning keiccuze siapharan hae tuh mih khalang a huhkuh cih hae; ming hae nynh minmin a la dosah boi lei hae paw kha minmin nynh a muih cih hae zah, a la thae boi lei hae paw kha a thaethya cih hae.