Read Zotung Chin ISAIAH 54 Bible Online

ISAIAH 54 - Zotung Chin bible

ISAIAH 54

¹Pou ccaawsaah leipaw a tiinnung, na lungtuasah; neitangia ccinaw a teing boi leinung nang, lungtuate siaruatua! Pawccecize a lanmenung nopinung ccaaw hae tuh vawpaw a hoipaw nopinung ccaaw hae laeze alunghua cih, cite BAWIPAW nynh a ho.

²Na bu kha houh lesah tua, na umnaw kya-e zokhawpaw boei kha tharae dawtua; na sithah nan sah; na kya-e arui kha saesah lah, na tung hae kha tynkaring lan bing hae.

³Pawccecize nang tuh voilang ranglang na pungzae cih, te na ciihan hae nynh minphuin ccangpaw hae kha rho lang a ccou cih hae zah, ccungccaw um leinaw khua hae kyakhe khua a sah cih hae.

⁴Na thinphang nan sah, pawccecize maethyanaw na mue lan khyh; na thawthah nan sah, pawccecize thethyanaw na ccou lan khyh; na liaccaw lya-e maethyanaw kha na ning cih zah, nomaenung lang na la tang lya-e thethyanaw kha na liathui vae lan khyh.

⁵Pawccecize nang ae Raetupaw tuh na vawpaw nynh thua, a min tuh Vaaw BAWIPAW a cikuh; Israel Pachia Athyaapaw tuh nang ae Shawkhawtu thua zah, laephi pynpi a uktu Pachia cite a ko hae.

⁶Mya thua zah a ngaethahpaw zu kha thuasah, a no lyaze a vawpaw nynh a myapaw zu kha thuasah kothui hawkhate BAWIPAW nynh nang kha bua ae kothui vae, cite na Pachia nynh a ci.

⁷Ccyh sosoh kyalya nang kha kae vua zemah myarya lepaw ngaethyaumsahnaw khate nang kha kae umkhae cih.

⁸Myaryasankae sosoh ka thinria lyakhe ccanglang kae hawitaw zemah, zungzae tynpaw ka sungsahnaw khate nang kha ngaethya kae umsah cih, cite nang ae Shawkhawtu BAWIPAW nynh a ci.

⁹E hynh kae ka hanlan Noah she lya hawte nynh thua: Noah she lya-e tui nynh laephi hynh kharouhmaw bua vu nan vae sah, cite bya ka la kinku hawte, na tungvaw ka thinria vae lan khyh zah, kae pe vae lan khyh, cite bya ka kinku vae.

¹⁰Mua hae tuh sihkuh hae zah, sangpyng hae tuh a nueku hae zemah zungzae tynpaw ka sungsahnaw tuh na kyate nuekuh lan khyh, ka kya-e daenaw byakin tuh na kyate nuekuh lan khyh, cite nang ngaethya ae umsahtupaw BAWIPAW nynh a ci.

¹¹Vawsawnaw teing zah khise nynh a thonuapaw te ngaengannaw a mue kho leipaw, nang kha aphutepaw lung te kae raethui cih zah, na thonaw aleihpaw kha nilar lung te kae rae cih.

¹²Na rhawviainn ahangpaw hae kha patamia lung te ka sak cih zah, na koikua hae kha amee rupaw lung te ka rae cih, nang ae koihlupaw khualungrua balyn kha aphutepaw lung te ka rae cih.

¹³Na ccaaw hae balyn kha BAWIPAW nynh a ccangpah cih hae zah, na ccaaw hae tuh myarya a hoirum cih hae.

¹⁴Dingnaw liate na tyn cih; tuaasahkunaw te na sawkuh cih zah, na rih vae lan khyh; thinphang bungzounaw tuh asawkuh vae cih zah na pe lang naekuh vae lan khyh.

¹⁵Lukhakheit nynh rhaw ae tuk ze, tuh-e tuh kae nynh kaw ka uapaw thua khyh; nang te rhaw na tukkuh oh paw miakaw tuh nang na keiccuze a shung cih hae.

¹⁶Maee-e kha mung zah sivaw a suhtupaw kha thuasah, a eenaw te angaekuhpaw zunghe a raetupaw kha thuasah, ro khylan a rohtupaw kha thuasah kamaw nynh ka rae hae.

¹⁷Nang kha rawsete raepaw zunghe tuh ccungkia lan khyh, byapiazung kya nang kaethenawpaw bya miakaw kha a seinaw na langsakuh kho cih. E tuh BAWIPAW ryalahtu hae kya-e rho thua zah, ka kyate a mue hae paw thyaaccounaw nynh thua, cite BAWIPAW nynh a ci.