Read Zotung Chin ISAIAH 57 Bible Online

ISAIAH 57 - Zotung Chin bible

ISAIAH 57

¹Miding hae chih hae zah humhung nynh mah pawlangria khyh; humhung nynh mah a nythya khyh lyakhe miding hae kha ccaring law athua hae. Pawccecize miding hae kha shethya kyate ccaring law thua hae zah,

²daenaw lungkhu lang a tee hae; hmerarih lan a hiin hae paw tuh mih iphae vawlan a haeung cih hae.

³Thuasalama naawthyanung a ccaaw hae nanning, milae vawpaw kya a seinung ccaaw hae te ohhuanung ccaaw hae nanning, hynhlang rang oh.

⁴Nanning nynh hummou na sarya oh? Hum kha mou nae khalang haehae na awnua oh zah, nae lae na thuaanua oh? Nanning tuh misei hae ccaaw hae, mihyn hae ciihan na thua khyh oh tou?

⁵Nanning tuh athyaapaw thing hae laku te hinlalyhpaw thingku hae kaw a umpaw zohtuh hae kya a ohhuakuh ry hae paw na thua khyh oh tou? Accya kya te lungpi kaw kya nae ccaaw hae na theih oh paw na thua khyh oh tou?

⁶Accya e naebabingpaw lung hae laku e abang tuh nanning hanpaw nynh thua; khah-e hae tuh nanning hanpaw nynh thua hae; khah-e hae kha niapaw silawnaw kha na pya oh zah, ccathae silawnaw kha mah na pya oh. Khah-e hae kha ka lungrythua cih tou?

⁷Mua hangpaw vawlan khe nae ikhung kha na nung oh, te silawnaw rae khylan na kaenua thung oh.

⁸Nae zohtuh kha thuakaw te thuakawtung nulang khe na nung oh; kae kha nae vua oh zah, nae boeining na khahku oh, ikhung vawlan na kae oh zah, ikhung kha na kosah oh; te khah-e hae ryte nawccawnaw na rae oh, mih ikhung kha mah na sungsah oh zah, mih sasete a um hae paw kha na do oh.

⁹Amynkhuhpaw chitui kha na ccyngkuh oh zah Molek pachia kalan na ccia oh, nae zimuin kha na thuh oh; nae ccungccaw hae kha asawnaw lang na saw oh zah, michi khua cia heize na saw oh.

¹⁰Myarya saw lang na khiavuikuh oh zah na bang oh zemah, “E hynh alakawpaw nynh thua,” cite na ho khyh oh. Nae rynaw tuh maee lang bua na ruasah oh zah, nae thawzya khyh.

¹¹Kae kha hynpya lan ciate thuasah, phe ning lan ciate thuasah, nanning nynh hum raw mou na ri oh? Yccae leite khaw cia ka um keiccu tou ka raw nae ri khyh oh?

¹²Nae dingnaw te nae cyisahnaw kha ka langsakuh cih, thuasalama zohtuh hae nynh nanning kha ae khum lan khyh oh.

¹³He na sia vae oh ze, na ccakhung oh paw zohtuh hae nynh ae luesah vae oh sah! Khisan nynh khah-e hae kha ccaring a mung cih hae, vaekheit hysawpaw nynh ccaring a thuikhae cih hae. Thuasalama ka kya a rekuhpaw miakaw tuh ram kha a ccou cih zah, athyaapaw ka mua kha rho lang a ccou cih.

¹⁴“Laanpi akhunaw kha bia oh, laanpi kha bia oh, laanpi kha paccyn oh, ka ccungccaw hae laanpi kya akhawkuhpaw miakaw kha nue oh,” cite ho athua cih.

¹⁵Pawccecize a min tuh Athyaa cikuh zah, zungzae a hiinpaw, a hangpaw te a sung-epaw Pachia nynh a hopaw tuh: Kae tuh ahangpaw te athyaapaw hmin kya ka um, a ngaesikuhpaw te zakaw a sangsakuhpaw kya mah ka um zah, mih thinlung te mih tuanaw kha thawsaenaw ka pyathui hae.

¹⁶Kae nynh zungzae sei ka be lan khyh, zungzae ka thinria lan khyh; tuhte athua lanze, hiinnaw tuh ka malang khe a thawzyabung cih, kamaw nynh ka rae vae paw muisaw heize a thawzya cih.

¹⁷Ahoy leipaw a ryduaanaw keiccuze ka thinria zah de ka tah; ka thinria zah ccanglang ka hawitaw; thuasalama amaw a laanpi kha po a zui mamin.

¹⁸A hiinzia kha ka muih vae, thuasalama aning kha ka dansah cih; ka cciakhae cih zah ngaengannaw ka pyathui cih, a rah a khui hae paw kha ngaengannaw ka pya cih hae.

¹⁹Anaenaw te asawnaw a um hae paw kya daenaw um sah, daenaw um sah, minmin kha ka dansah cih hae, cite BAWIPAW nynh a ci.

²⁰Thuasalama ccungccaw hoylei hae paw tuh tuileih tho zah adae kho leipaw rili te nynh a loku hae; tuh-e tuileih nynh athupaw te tuiccua kha a thuakhae.

²¹Ccungccaw hoylei hae paw hanlan daenaw um khyh, cite ka Pachia nynh a ci.