Read Zotung Chin ISAIAH 60 Bible Online

ISAIAH 60 - Zotung Chin bible

ISAIAH 60

¹Thokuh lah, awtua; na awnaw tuh yn thua vae zah, BAWIPAW phu-enaw tuh na tungvaw alangkuh vae.

²Mohnaw nynh laephi kha phang a bong cih zah, marae zipingpaw mohnaw nynh ccungccaw hae kha a bong cih hae; thuasalama BAWIPAW tuh na tungvaw yn langkuh cih zah, a phu-enaw tuh na tungvaw yn langkuh cih.

³Minphuin hae tuh na awnaw kalan oun thua cih hae zah, siapharan hae tuh na kya-e awkhua takaw e awnaw kalan oun thua cih hae.

⁴Ngawdo lah, na pepan balyn kha dotua; minmin balyn tuh pynkheihlan sueluakuh hae zah na kalan oun cceih hae; na ccapaw hae tuh asawnaw kyate oun cceih cih hae zah, na ccanung hae tuh imua do-oihtu hae nynh mih kuih te a dua cih hae.

⁵Tetuh na muih cih zah, myarya na lungtua cih, na bung thyngku biate na lung apaw cih, pawccecize rili lungkhu e hoirumnaw tuh na kalan oun cciakhae cih hae zah, minphuin hae sisua tuh na kalan yn thua cih.

⁶Kalauh patae tuh na kalan oun thua cih hae, Midian ram te Efah ram kyate anopaw kalauh hae nynh ae thuanua cih hae; Sheba ram e hae balyn tuh oun thua cih hae. Minmin nynh sui te frankinsen kha oun phu cih hae zah, BAWIPAW thehoysahnaw kha a siakhae cih hae.

⁷Kedar ram e tuuphu balyn tuh na kalan oun sueluakuh cih hae, Nebaioth ram e tuutepaw hae nynh na rya ae lawpah cih hae; khah-e hae kha ka silawhang vawlan mang lan nawccaw athua cih hae zah, aphu-epaw ka beikinn kha phu ka esah cih.

⁸Maeking hawte thuasah, mih bu kalan a zou hae paw vahu hae hawte thuasah a zou hae paw khuh-e hae khuh hum hae mou?

⁹BAWIPAW na Pachia min hanlan thuasah, Israel Pachia Athyaapaw hanlan thuasah na ccaaw hae kha mih sui mih ngun ryte asawnaw kyate cciakhae khylan rili khunglang e ram hae nynh kae kha yn ngaw hae zah, Tarshih ccingbaw hae tuh masaty nynh thua, pawccecize aning nynh nang kha phu-enaw ae pya vae.

¹⁰Ramccang hae nynh nae khualungrua kha ae raepah cih oh zah, mih siapharan hae nynh nanning kha rya ae lawpah cih oh; pawccecize ka thinria zah nanning kha de kae tah oh, thuasalama ka thawccinaw liate nae tungvaw ngaethya kae umsah vae oh.

¹¹Minphuin ccangpaw hae tuh mih siapharan hae nynh ataruinte cciakhaekute mih sisua kha nae kalan oun cciakhae nawlan hae, nae koikua hae kha khuazi khuadae khaw leite zungzae po hungkuh sah.

¹²Na rya ae lawpah cih leipaw ram te peenaw tuh aroh cih; tuhcihawpaw ram hae tuh marya mawte ro athua cih hae.

¹³Ka beikinnthyaa hmin kha puithyasah khylan, Lebanon phu-enaw athuapaw saipres thing, plane thing te maeccaw thing hae tuh na kya oun thua cih hae; ka ccu ka khangnaw hmin kha a phu ka esah cih.

¹⁴Nang ae tuaa ae sah hae paw mih ciihan hae tuh oun thua cih hae zah ae bakhungpah cih hae, nang ae theihrya hae paw balyn tuh na cculeihpaw khe a bakhung cih hae; minmin nynh nang kha BAWIPAW Khuapi, Israel Pachia Athyaapaw kya-e Zion khua cite ae ko cih hae.

¹⁵Lu kheit nynh sanmah na kya po ccia lei lan ciate nang kha ae hua hae zah ae vua hae zemah, zungzae alesaepaw, she kheit koute she kheit lungtuanaw hmin lang kae rae cih.

¹⁶Minphuin hae mateitui kha na neih cih zah, siapharan hae matei kha na zu cih, kae, BAWIPAW tuh nang ae Khumtu, nang ae Shawkhawtu te Jakob Pachia Athungpaw ka thuapaw kha na nyh cih.

¹⁷Sohin ccelang sui kha kae thuakhaepah cih zah, sivaw ccelang ngun, thingphe ccelang sohin, lung ccelang sivaw kha kae thuakhaepah cih. Nang ae uktu lang Daenaw kha kae nungpah cih zah, na ryalaw a nawtu lang Dingnaw kha kae nungpah cih.

¹⁸Na ram lungkhu kya puathonaw the kha thuasah, na ramri lungkhu kya vawsaw riathaenaw te ronaw the kha thuasah thae thua vae lan khyh; na khualungrua kha Khumnaw cite na ko cih zah, na koikua hae kha Thehoynaw cite na ko cih.

¹⁹Khuadae kya khuanin tuh na awnaw thua vae lan khyh zah khuazi kya sawpaw nynh awnaw ae pya vae lan khyh; pawccecize BAWIPAW tuh zungzae tynpaw na awnaw athua cih zah, na Pachia tuh na phu-enaw athua cih.

²⁰Na khuanin tuh ccah vae lan khyh, na sawpaw mah nulang sihkuh vae lan khyh; pawccecize BAWIPAW tuh zungzae tynpaw na awnaw athua cih zah, na raw na khuinaw ccyh tuh athang vae cih.

²¹Na ccungccaw hae balyn tuh a ding cih hae zah, ram kha zungzae a pee cih hae. Kae kha phu-esah ka thua nawlan, minmin tuh ka linpaw atoihpaw, ka kuihhae nynh thua hae.

²²Minmin kyaze adih huapaw tuh phin phinkheit lang a tang cih zah, anyaa huapaw lu kheit tuh athungpaw minphuin phuin kheit lang a tang cih; kae tuh BAWIPAW nynh ka thua; accyh azaw te tuh-e tuh arangte ka ccingsah cih.