Read Zotung Chin ISAIAH 62 Bible Online

ISAIAH 62 - Zotung Chin bible

ISAIAH 62

¹Jerusalem thyaaccounaw tuh awkhua takaw e awnaw hawte aw zah, Jerusalem khumnaw tuh phang a awpaw maeekhua hawte athua mawlaezung, Zion elang yccae leite ka um lan khyh zah, Jerusalem elang zya ka dae lan khyh.

²Minphuin hae nynh na kya-e thyaaccounaw kha a muih cih hae zah, siapharan hae balyn nynh na phu-enaw kha a muih cih hae; BAWIPAW munglae nynh ae phu cih paw min thawpaw khate nang kha ko na thua cih.

³Nang tuh BAWIPAW kuih kya umpaw apuithyapaw bawilukhung na thua cih zah, na Pachia kuih kya umpaw siapharan lukhung na thua cih.

⁴Nang kha vuapaw ccungccaw cite ko na thua vae lan khyh zah, na ram kha Ccungccaw Adaenaw ram cite ko thua vae lan khyh; a tungvaw Ka Lungrythuanung cite ko na thua cih zah, na ram tuh Vawpaw a hoipaw ram cite ko athua cih; pawccecize BAWIPAW tuh na tungvaw a lungrythua zah, na ram tuh vawpaw a hoi vae cih.

⁵Ccangvae te liaccaw tuh zuvaw lang a tang hae hawte nang ae raetupaw nynh nang kha zuvaw lante ae umkhae cih, zudy ccangvaepaw nynh akaenung liaccanung tungvaw a lungtua hawte, na Pachia tuh na tungvaw a lungtua cih.

⁶Pou Jerusalem, na khualungrua vawlan khe rhawviatu hae kha ka nung vae hae; minmin tuh khuazi khuadae umtaw lan khyh hae. BAWIPAW kha nysah thuinaw a pya hae paw nanning, zya dae nan oh,

⁷BAWIPAW nynh Jerusalem kha tynsah zah, laephi pynpi kya a min a thaansah mawlaezung amaw kha umtawsah nan oh.

⁸BAWIPAW nynh a ranglang kuih te thuasah, athungpaw a kuih te thuasah bya a kinkupaw tuh: Nae ccathae kha nae rhaw hae looh lang bua ka pya vae lan khyh hae, na bangnuathe oh paw misutui kha ramccang hae nynh neih vae lan khyh hae;

⁹tuh-e ccathae a ccakhung hae paw tuh a ae cih hae zah, BAWIPAW kha a thehoysah cih hae, misu thae a ccakhung hae paw tuh athyaapaw ka voidu lungkhu khe a neih cih hae.

¹⁰Koikua kyate pou oh, pou oh, ccungccaw hae hanlan laanpi kha paccynpah oh; laanluepi kha rae oh, rae oh, lung hae kha phe thyaa lan vua oh, ccungccaw hae luki khe alan kha sae oh.

¹¹BAWIPAW nynh laephi adianaw kyacia a hopaw tuh: “Dotua, nang ae khumtu tuh yn cceih cciamang, a ryalaw mee tuh amaw kya um zah, aning nynh mue lan a ccanpaw tuh a malang khe a um,” cite Zion ccanung kha hopah oh.

¹²Minmin kha, “Athyaapaw Ccungccaw hae, BAWIPAW nynh a Shawkhaw hae paw,” cite ko athua cih hae zah, nang kha, “Muih Athua Vae Paw, Vua Athua Leipaw Khuapi,” cite ko na thua cih.