Read Zotung Chin ISAIAH 63 Bible Online

ISAIAH 63 - Zotung Chin bible

ISAIAH 63

¹“Edom ram Bozrah khua kyate asepaw azong ohkuhpaw boeining kha lawkute yn thuapaw khuh hummou athua? Asung-epaw angkiccua kha lawkuh zah myarya lepaw a thungnaw te yn cceihpaw khuh hummou athua?” “Thyaaccounaw kong kha hote khumnaw lanpaw thungnaw a hoipaw tuh kamaw nynh ka thua.”

²“Pawccemou na angkiccua tuh se zah, na boeining tuh misu mianaw khu kya a su hae paw boeining te aloku?” a ci.

³“Misutui mianaw khu kya ka makhaete ka su zah, ccungccaw lu kheit sanmah ka kya umbua khyh; khah-e hae kha thinriate bungpawte sydete ka nonde hae, atui nynh ka boeining kha pia zah, ka angkiccua balyn tuh azong pong ohkuh.

⁴Phulawnaw nin tuh ka thinlung kya um zah, ka shawkhawnaw ryalaw kum tuh yn thua vae.

⁵Ka do zahmah bawmtu um khyh; riri ka do zemah kae yn bawmtu lu kheit san um khyh; tukeiccuze kamaw kuih nynh taenaw kha yn thuakhaepah zah, ka thinrianaw nynh kae kha yn bawm.

⁶Ka thinria zah ccungccaw hae kha ka syde hae, ka bungpaw zah minmin kha zoihtatyh lan ka pae hae, mih hiinnaw chiise kha laephi vawlan ka lae,” a ci.

⁷BAWIPAW sungsahnaw myarya lepaw te thehoysah lan accanpaw BAWIPAW ryalawnaw kha the ka hoysah cih, pawccecize BAWIPAW nynh aening elang atyn-are oun cyipah zah, a thawccinaw thyhte thuasah, myarya le zah atynpaw a sungsahnaw thyhte thuasah Israel phin hanlan myarya lepaw thawccinaw kha a langsaku vae.

⁸BAWIPAW nynh, “Thanccingte minmin tuh ka ccungccaw hae thua hae zah, kae kha yn ling cih lei hae paw ka ccaaw hae nynh thua hae,” a ci; aning tuh mih lungriathaenaw balyn kya mih Khumtu lang yn tang.

⁹Amaw malang e vaawpaw nynh minmin kha a khum hae; a sungsahnaw te a ngaethyaumsahnaw keiccuze minmin kha a shawkhaw hae; alia vae paw ccyh balyn kya minmin kha hangthung hae zah a cciakhae hae.

¹⁰Thuasalama minmin nynh amaw kha dou hae zah athyaapaw a Muisaw kha a ngaethyasah hae; tukeiccuze aning tuh minmin rhaw lang tang zah, amaw ccaccei nynh minmin kha rhaw a tuk hae.

¹¹Tetuh minmin nynh langmawlya e she, a ryalahtu Moses she kha a liathui hae. Minmin kha tuurin hae ryte rili lungkhu te a cciakhae hae paw BAWIPAW kha teimou a um vae? Mih lungkhu kya athyaapaw a Muisaw a nungtupaw,

¹²aphu-epaw a kuih kha Moses a ranglang kuih kya a umsahtupaw, zungzae tynpaw min kha amaw hanlan raeku khylan mih malang e tui kha a phiasakuhtupaw,

¹³minmin kha akhunaw kya po a cciakhae hae paw BAWIPAW tuh teimou a um vae? Ramkaw kya a cceihpaw marang hawte, minmin tuh thykupawku leite a cceih hae.

¹⁴Accya kya a cceihbungpaw vaetua hae hawte, BAWIPAW Muisaw nynh minmin kha haeungnaw a pya hae. Tuhcite aphu-epaw min kha namaw hanlan langsakuh khylan na ccungccaw hae kha na cciakhae hae.

¹⁵Vaawram kyate dobung tua lah, athyaapaw te aphu-epaw na umnaw kyate muihtua, Na lungthonaw te na thungnaw tuh teimou a um? Na sungsahnaw te ngaethya na umsahnaw tuh teimou a um? Tuh-e hae tuh ka hanlan khee athua hae.

¹⁶Abraham nynh kaening kha oun nyh khyh zah, Israel nynh mah oun ny khyh zemah nang tuh kae Paaw nynh na thua. Pou BAWIPAW , nang tuh kae Paaw nynh na thua; langmawlya mawte kaening oun Shawkhawtu tuh na min nynh thua.

¹⁷Pou BAWIPAW , kaening hynh na laanpi kyate pawccemou ccanglang nae cciasah sei? Na raw kae ri khyh nawlan pawccemou kae thinlung hynh nae khungsah? Na ryalahtu hae hanlan te na rho athuapaw phin hae hanlan yn kitua.

¹⁸Athyaapaw na ccungccaw hae nynh sosoh kyalya kae uk; thuasalama atu tuh kae rhaw hae nynh na beikinnthyaa kha a syde vae hae.

¹⁹Kaening tuh nang nynh na uk boi lei hae paw hawte thuasah, na min te ko athua boi lei hae paw hawte thuasah khaw cia kae thua vae.