Read Zotung Chin ISAIAH 66 Bible Online

ISAIAH 66 - Zotung Chin bible

ISAIAH 66

¹BAWIPAW nynh a hopaw tuh: Vaawlui tuh ka bawitungkhung thua zah laephi tuh ka ccu synaw nynh thua; pawcihawpaw inn mou ka hanlan nae sakpah cih oh? Ka umnaw hmin tuh pawcihawpaw mou athua?

²E hae balyn hynh ka kuih te ka raepaw athua keiccuze, e hae balyn hynh ka kya-e nynh thua hae, cite BAWIPAW nynh a ci. Zakaw a sangsakuhpaw, a thinlung kya a ngaesikuhpaw te ka bya keiccuze a thyngkuhpaw kha ka do cih.

³Tangnuapaw a theihpaw miakaw tuh ccungccaw a theihpaw te nynh a loku; tuutaw te silawnaw a raepaw miakaw tuh ui nging a khyatupaw te nynh a loku; ccathae silawnaw kha a raepaw miakaw tuh voh chii a pyatu te nynh a loku; mynkhuhpaw silawnaw lante frankinsen kha a pyatu tuh zohtuh kha hythua a pyatu te nynh a loku. E ccungccaw hae tuh mimaw laanpi kha pokuh hae zah, mih nungsikunaw kyakhe mih lungry athuakhaekuh.

⁴Minmin hanlan saryanaw kha ka popah cih hae zah minmin nynh a ri hae paw kha mih tungvaw ka thuasah cih; pawccecize ka ko hae ze hum nynh sanmah yn oi khyh, bya ka ho vae ze yn ngaepah khyh hae; ka muihnaw khe ahoy leipaw kha cyih hae zah, ka ry leipaw kha a poku hae.

⁵BAWIPAW bya keiccuze a thyngkuh hae paw nanning, amaw bya kha ngaetua oh: Ka min keiccuze nanning ae hua oh paw te ae vua oh paw nae ccungccaw hae toulou nynh, “Nae lungtuanaw kha kae muih nawlan, BAWIPAW tuh a phu-e sah,” a ci hae; thuasalama minmin tuh maethyanaw a mue cih hae.

⁶Khuapi kya-e siaruanaw roi te beikinn kya-e roi tuh ngaetua oh! A rhaw hae kha de a tah hae paw BAWIPAW roi nynh thua!

⁷Ccanung Zion tuh neitangia a cci mawkhe a ccaaw a pui vae; ccinaw nynh a thuanua mawze ccapaw kha a saah vae.

⁸Tuhcihawpaw tuh hummou a thae boi? Tuhcihawpaw tuh hummou a muih boi? Ram ramkheit tuh nin kheit lungkhu a pui kho cih tou? Minphuin phuin kheit tuh ccyh sosoh kya a pui kho cih tou? Tuhzemah Zion tuh neitangia he accih takaw te a ccaaw hae tuh palou a pui vae hae.

⁹Ccaaw saahsah lante ka paccyn koute saahsah leite ka um cih tou? cite BAWIPAW nynh a ci. Ccaaw ka poisahpaw kha puisah leite ka khee cih tou? cite na Pachia nynh a ci.

¹⁰Jerusalem a sungsah hae paw balyn, amaw ryte lungtuakheih oh lah, a hanlan nae lungpaw sah, Jerusalem hanlan a rah a khui hae paw balyn, amaw ryte nae lungtua sah lah, nae lungpaw sah,

¹¹tuhteze tuh ngaengansahpaw a matei kha na zu cih oh zah na byn cih oh; aphu-epaw a by kya-e kha lungrythuakhaekute na zu cih oh.

¹²BAWIPAW nynh a hopaw tuh: Jerusalem langkhe hoirumnaw kha vaw hawte ka luasah cih zah, minphuin ccangpaw hae sisua kha paraeparae leikuhpaw vaw hawte ka luasah cih; nanning nynh a matei kha na zu cih oh, a kuih te ae dua cih oh zah, a ccukharu vawlan khe ae oi cih oh.

¹³Nung nynh a ccaaw kha a ngaengansah hawte, nanning kha ngaengannaw kae pya cih oh; Jerusalem khe ngaengannaw kha pya na thua cih oh.

¹⁴Tuh-e tuh na muih cih oh zah nae lungpaw cih; nae pyn tuh lonua hawte a lethung cih; BAWIPAW kuih tuh a ryalahtu hae ryte umkheih zah, a thinrianaw nynh a rhaw hae kha a rawse hae cipaw ny athua cih.

¹⁵Dotua, BAWIPAW tuh myarya a thinrianaw khate thuasah, a kya-e thuiheinawpaw maeesoi khate thuasah liaru khylan khiccung tahawpaw a marangle kha ccikute maee khate yn thua cih.

¹⁶BAWIPAW nynh ccungccaw balyn kha maee te thaloi khate bya a pia cih hae; BAWIPAW nynh a chia hae paw tuh myarya alung cih hae.

¹⁷BAWIPAW nynh a hopaw tuh: Voh saw, pazu saw te anungsikuhpaw aepaw kha aete, angaelung e ccungccaw kha zui hae zah, khokhu kya mimaw toulou kha thyaaccousakuh hae zah a thyaasakuh hae paw tuh thangnaw kya a thuakheih cih hae.

¹⁸Mih ryalaw te mih tuanaw kha ka ny, minphuin hae te alokuh leipaw bya a ho hae paw balyn kha suelua khylan kae thua cih; te minmin nynh oun thua cih hae zah ka phu-enaw kha a nyh cih hae,

¹⁹minmin laku khe syntawnaw ccangkheit ka nung cih. Minmin kya-e a hiinhy hae paw kha Tarshish ram, Put ram te the kaw a thya hae paw Lud ram, Tubal ram te Javan ram, ka minthaannaw kha thae leite ka phu-enaw kha mah a nyh lei hae paw asawnaw rili khunglang e ram hae kalan ka saw cih hae; minmin nynh ka phu-enaw kha minphuin hae kya a siakhae cih hae.

²⁰Israel hae nynh ccathae silawnaw kha thyaararihpaw angphe te BAWIPAW inn lang a cciakhae hae hawte, tuh-e ccungccaw hae nynh nae puizia hae kha marang, marangle, puihnawpaw, lann te kalauh vawlan khangte ram takyh kyate BAWIPAW kalan pyapaw hawkhate athyaapaw ka mua Jerusalem langkhe a cciakhae cih hae, cite BAWIPAW nynh a ci.

²¹Minmin laku e abang kha ranpibawi lang te Levi minphuin lang ka nung cih hae, cite BAWIPAW nynh a ci.

²²Ka rae cih paw vaaw thawpaw te laephi thawpaw tuh ka malang atyn hae hawte, nae ciihan hae te nae min tuh atyn cih, cite BAWIPAW nynh a ci.

²³Sawpaw sah leihpaw takyh kya te sabbath nin takyh kyakhe ccungccaw balyn tuh kae kha beik khylan ka malang oun thua cih hae, cite BAWIPAW nynh a ci.

²⁴Minmin nynh oun pou cih hae zah kae yn doupaw ccungccaw hae rhua kha a do cih hae; mih saw a aepaw zanpaw hae tuh chih lan khyh hae, mih maee mah chih lan khyh, ccungccaw balyn malang anungsikuhpaw athua cih hae.