Read Zotung Chin ISAIAH 7 Bible Online

ISAIAH 7 - Zotung Chin bible

ISAIAH 7

¹Judah siapharan Uzziah ccapaw Jotham, Jotham ccapaw Ahaz siapharan ccyh lyakhe, Siria Siapharan Rezin te Israel siapharan Remaliah ccapaw Pekah Siapharan nynh Jerusalem kha rhawtuk khylan a ccianua thung hae, thuasalama lah kho khyh hae.

²Siria ram tuh Efraim ryte a hokheih vae hae cipaw David phin hae nynh he a thae hae tuh, Ahaz thinlung te a ccungccaw hae thinlung tuh khisan nynh a hysahpaw ramkaw e thingku hae hawte a thyngkuh hae.

³Tetuh BAWIPAW nynh Isaiah kha hynhte a hopya, Na ccapaw Shear Jashub[1] ryte cceih oh lah, boeikua hae paw nynh rya a lawnaw hae hmin kalan a cceihpaw laanpi kya, palung lang e tuili nynh a luanaw tuizy athangnaw kyakhe Ahaz siapharan khate la tungkuh oh,

⁴te amaw kha, Raeringkuh lah, lungdaete um, rih nan; Siria Siapharan Rezin te Remaliah ccapaw tuh myarya mih thinria zemah na lungthawthah nan sah, cite na hopah cih; minmin tuh maee a u cciamangpaw ccungmuing ccangning nynh thua hae.

⁵Siria ram, Efraim ram hae te Remaliah ccapaw nynh nang kha rawsete hoyleinaw kha paccyn hae zah,

⁶Judah kha ccianua oh sih lah, Jerusalem kha rote tae oh sih, te tuin kyakhe Tabeel ccapaw kha siapharan lang nung oh sih, a ciku hae.

⁷Tukeiccuze Bawipaw PACHIA nynh hynhte a ho: Tuh-e paccynkunaw tuh tyn lan khyh zah, tuhte cyihkuh lan khyh.

⁸Pawccecize Siria lu tuh Damaskas khua thua zah, Damaskas khua a lu tuh Rezin nynh thua. (Sung taruh kum pangaw lungkhu Efraim tuh zoihtatae lan a koi cih, ccungccaw um vae lan khyh.)

⁹Efraim lu tuh Samaria thua zah, Samaria lu tuh Remaliah ccapaw nynh thua. Zynnaw kya tynkaring lan na thadyn khyh ze, papinmaw na tyn lan khyh, a ci.

¹⁰BAWIPAW nynh Ahaz kha bua hopah zah,

¹¹BAWIPAW na Pachia kya-e muihsahnaw kha ngiatua; michi khua hawte akhupaw kyate thuasah, tuhkhyhze vaawram hawte ahangpaw kyate thuasah ngiatua, a cipya.

¹²Ahaz nynh, ka ngia lan khyh, BAWIPAW kha ka syntawtua lan khyh, a cipya.

¹³Tetuh Isaiah nynh, “Pou David ciihan hae, ngaetua oh, ccungccaw hae kha lungro ngaemyng te na nung oh paw hynh eih azya ung keiccu tou, ka Pachia kha mah lungro ngaemyng te na nung oh?

¹⁴Tukeiccuze BAWIPAW amaw ccaccei nynh nanning kha muihsahnaw ae pya cih oh. Dotua oh, liaccady nynh ccaawpoi zah ccapaw a saah cih, a min tuh Immanuel[2] cite a phu cih hae.

¹⁵Aning nynh ahoypaw te ahoy leipaw kha he a laesah thya ccyh kyacia a looh tuh samateitui ahaawpaw te khoitui athua cih.

¹⁶Tuh-e imua nynh ahoy leipaw kha vua te ahoypaw kha pokupaw a ny mawkhe, nang nynh na ripaw siapharan lu ning hae ram tuh poutaw athua cih.

¹⁷Judah phin kyate Efraim phin he a pou nin te a la um boi leipaw vawsawnaw ccyh kha BAWIPAW nynh nang te na ccungccaw hae te na puizia hae tungvaw kya a thuakhae cih—Assiria siapharan nynh a thuakhae cih,” a ci.

¹⁸Tuin ccyh vae tuh Izip ram e vawkhu vanaw hae kya umpaw myn hae te Assiria ram e khoi hae kha BAWIPAW nynh a ko cih hae.

¹⁹Tetuh oun thua cih hae zah akhupaw akarung hae te lungkarung hae te hinpawbu miakaw te sahiin paeekunaw miakaw kya a um cih hae.

²⁰Tuin ccyh vae tuh Vawpi khuraw lang umpaw hohpaw sang ngonawpaw athuapaw Assiria siapharan kha mangte BAWIPAW nynh na sang te na ccuming kha a ngo cih, na khawming kha mah a ngo cih.

²¹Tuin ccyh vae tuh ccungccaw lu kheit nynh vaetua tohlaw sa kheit te tuu sa ning kha a kuakuh cih zah,

²²tuh-e hae kyate mateitui patae a mue keiccuze samateitui ahaawpaw kha a ae cih; pawccecize tuh-e ram kya a umhypaw miakaw nynh samateitui ahaawpaw te khoitui kha a ae cih hae.

²³Tuin ccyh vae tuh misu ku thong kheit ze ngunphua shekel thong kheit a meepaw misu khokhu miakaw tuh thabu te hinpawbu lang a tang cih.

²⁴The te li ccyngkute rou nynh tuh-e hmin langkhe a cceih ngan cih hae, pawccecize ram pynpi tuh thabu te hinpawbu te phe abeih;

²⁵pohpia te looh la ccounaw hae mua hae kalan khe thabu te hinpawbu keiccuze na cceih ngan vae lan khyh oh; vaetua sawnuapaw hmin te tuu nynh a sydepaw hmin lang a tang vae cih.