Read Zotung Chin ISAIAH 8 Bible Online

ISAIAH 8 - Zotung Chin bible

ISAIAH 8

¹Te BAWIPAW nynh kae kha, Ccaw zeinawpaw lungphe alepaw phe kheit kha lawkuh lah, a vawlan khe ccungccaw miakaw nynh thaethya lante, “Arangte luade, palou lah,” cite asuilan a umpaw “Maher-shalal-hash-baz,” kha zeitua,

²ka hanlan alungzipaw ccaekia lu ning, ranpibawi Uriah te Jeberekhiah ccapaw Zekhariah kha ko hae, yn cipya.

³Te ka zu kalan ka naeku keiccuze aning tuh ccaawpoi zah ccapaw a saah. Tetuh BAWIPAW nynh imua kha Maher-shalal-hash-baz cite min na phu cih, yn cipya;

⁴pawccecize imua nynh “Anung, Apang” cite a kothya mawkhe Damaskas kya-e sisua te Samaria khua e luadepaw uccaw kha Assiria siapharan nynh ccaring a cciakhae cih.

⁵BAWIPAW nynh bua yn hopah zah:

⁶E ccungccaw hae nynh daebabi lan a luapaw Shiloah vawkhu e tui kha ry leite, Rezin te Ramaliah ccapaw malang khe rawrite a thyngku hae keiccuze,

⁷BAWIPAW nynh a thawsaepaw Zufrates Vaw tui alepaw kha mih tungvaw a luasah thin cih, tuh-e tuh Assiria siapharan te a phu-enaw balyn kha nynh thua; tuh-e Vawpi kya-e tuizy te vawkhurae balyn tuh tui aleikuh cih,

⁸Judah ram lungkhu langkhe tui alepaw hawte a luathin cih zah, a nging kyacia a vu cih; a dawpaw a sake nynh na ram balyn kha pong a bong cih, pou Immanuel, yn cipya.

⁹Ccungccaw hae nanning, thinphangte um oh lah, pynkheihlan sueluakuh tua oh; laansawpi um hae paw nanning balyn, ka bya ngaetua oh, rhawtuk lan paccynkuh oh lah, thinphangte um oh; rhawtuk lan paccynkuh oh lah, thinphangte um oh!

¹⁰Tuanaw pyakuh kalang oh, thuasalama tuh-e tuh accakaepaw lang a tang cih; khuakhankuh oh, thuasalama tyn lan khyh, pawccecize Pachia tuh kaening kya a um.

¹¹E ccungccaw hae laanpi kha ka zui khyh nawlan, BAWIPAW nynh athungpaw a huhan khate raeringnaw yn pya zah yn hopyapaw tuh:

¹²E ccungccaw hae nynh aruh lante khuakhan hae paw miakaw kya umbua nan lah, a ri hae paw kha rihbua nan, siikuh nan.

¹³Thuasalama vaaw BAWIPAW amaw rou kha athyaapaw lante na tua cih; amaw raw kha rih lah, siiku tua.

¹⁴Aning tuh hminthyaa athua cih, thuasalama aning tuh Judah te Israel innbyn hae nynh a thykunaw hae paw lung te a khuliakunaw hae paw lungpi lang a tang cih zah, Jerusalem ccungccaw hae hanlan kaang te taphung lang a tang cih.

¹⁵Minmin laku e patae tuh a thy a pawkuh cih hae; a khuliakuh cih hae zah a khya cih hae; kaang a kae cih hae zah kyng athua cih hae.

¹⁶Ka zuitu hae kyakhe hynh-e ccaekiakhannaw hynh khiide lah, e ccangpyanaw hynhte tazeih khiatua.

¹⁷Jakob ciihan kyate a mae a rekuhpaw BAWIPAW kha ka doliakuh cih zah, ka ngaehoinaw kha amaw kya ka nung cih.

¹⁸Dotua, kamaw te BAWIPAW nynh yn pyapaw imua hae tuh Zion Mua a umpaw vaaw BAWIPAW kyate Israel hae hanlan muisahnaw te syntawnaw lang oun sawpaw nynh kae thua.

¹⁹Ccungccaw hae nynh, “Kuihdothya hae paw te tarutaru ccohkute chihiinleihthya hae paw kha tuanaw ngiakuh oh; ccungccaw hae nynh mih pachia hae kha thuasah, a hiin hae paw ccelang a chih hae paw kha thuasah ccangpyakunaw te thuiheikunaw kha tuanaw ngiaku lan ccan khyh tou?” cite ae hopah cih oh.

²⁰Thanccingte, tuhcite a ho hae paw tuh khuadaenaw hoi lan khyh hae!

²¹Minmin tuh ram lungkhu khe vuelaw riathae te a khiakuh cih hae; mih vuelaw vae ze mih thinria cih zah, mih siapharan te mih pachia hae kha thya a law cih hae. Mih mae kha a angthung cih hae,

²²tuhkhyhze laekhu lang a dobung cih hae, thuasalama riathaenaw te mohnaw, thinphang ngaethyanaw kyalya kha a muih cih hae; marae zipingpaw mohnaw lungkhu langkhe nohde athua cih hae.