Read Zotung Chin LEVITIKAS 19 Bible Online

LEVITIKAS 19 - Zotung Chin bible

LEVITIKAS 19

¹BAWIPAW nynh Moses kha hynhte a hopya:

²Israel ccungccaw zapi balyn kyakhe hynhte hopah hae: Nanning tuh na thyaa cih oh, pawccecize BAWIPAW nae Pachia kae tuh ka thyaa.

³Nanning balyn nynh nae nung te nae paaw kha saw na tua cih oh, ka sabbath hae kha na naawsah cih oh: kae tuh BAWIPAW nae Pachia nynh ka thua.

⁴Zohtuh hae kalan maeleihkuh nan oh, laeekupaw pachia hae kha naemaw elang raekuh nan oh: kae tuh BAWIPAW nae Pachia nynh ka thua.

⁵Ccawkunaw silawnaw kha BAWIPAW kalan he na rae oh ze, naemaw ccelang ccoupya athua lante pya oh.

⁶Na pya nin oh khyhze awkhualan khe tuh-e tuh ae athua cih; nin thumnaw nin cia alaepaw miakaw kha maee te u athua cih.

⁷Tuh-e tuh nin thumnaw nin khe ae athua lanze, tuh-e tuh anungsikuhpaw thua zah ccoupya thua lan khyh.

⁸Tuh-e a aepaw balyn tuh BAWIPAW kya-e athyaapaw kha phe a thusah vae keiccuze detahnaw a ing cih, tuhcihawpaw ccungccaw miakaw kha a ccungccaw hae kyate vua athua cih.

⁹Nae loo kya-e looh kha he na rue vae oh ze, nae loo akin-akae lang cia na rue lan khyh oh, looh na rue kou oh te, ccamua kha na suelua vae lan khyh oh.

¹⁰Nae misu khokhu kya-e kha pong thang lan na lo lan khyh oh, nae misu khokhu e misu thae akhuakuhpaw kha pong na khuin lan khyh oh; khah-e hae kha ryachi hae te ramccang hae elang na cciatawpah cih oh: kae tuh BAWIPAW nae Pachia nynh ka thua.

¹¹Na ruh lan khyh, ccungccaw na ling lan khyh; lu kheit te lu kheit na hynpakuh lan khyh oh.

¹²Ka min phyate ahme lei lante thya na lawkuh lan khyh, na Pachia min kha na thusah lan khyh: Kae tuh BAWIPAW nynh ka thua.

¹³Na innpaw uccaw kha lingte na lawkuh lan khyh, na ruh lan khyh; ryalahtu kya-e a ryalaw mee kha awkhua cia na nungkuh lan khyh.

¹⁴A nawpanpaw kha na ruin na sang lan khyh, a mitmohpaw malang khe thykupawku lanpaw kha na nungkhaw lan khyh; na Pachia kha na rih cih: Kae tuh BAWIPAW nynh ka thua.

¹⁵Ahme leipaw byapianaw kha na rae lan khyh; a ryachipaw kha na pankhae lan khyh zah alesaepaw kha mah a mae na do lan khyh: na innpaw kha dingnaw te bya na pia cih.

¹⁶Milae thethya a hotu lante na ccungccaw hae laku na khiavuikuh lan khyh, na innpaw a hiinnaw kha rawsete thadyn nan.

¹⁷Na uno lukhakheit kha na thinlung kya na hua lan khyh; na innpaw nynh a cyiseinaw kha ahme thathyhte na hopah cih, tuhkhyhze tuh namaw te namaw kha seinaw na hoisaku cih.

¹⁸Na ccungccaw lukhakheit kha na liaru lan khyh zah lung-ung na tungpah lan khyh, thuasalama na innpaw kha namaw hawkhate na sungsah cih: Kae tuh BAWIPAW nynh ka thua.

¹⁹Ka phungbya hae kha na zui cih. Na sarangpaw hae kha aphuin lokuh leipaw te sahpawdesahkute ataw na thansah lan khyh hae; na loo kya ccacii phuin ning kha na ccoude lan khyh; aphuin lokuh leipaw uccaw phuin ning te raedepaw boeining kha na lawkuh lan khyh.

²⁰Ccangpaw pise hanlan haaw thua vae salamah luenaw pya athua loh leipaw te shawkhaw athua loh leipaw seenung lu kheit tuh pise lu kheit te nopi pise seinaw a rae hae ze, minmin tuh detahnaw a ing cih hae. Seenung tuh a lue loh leipaw athua keiccuze minmin tuh chia thua lan khyh hae;

²¹thuasalama pisepaw nynh amaw elang tuutepaw sa kheit kha cyiseinaw silawnaw lante tungkunaw bu thuakaw kyakhe BAWIPAW kalan a ccyng cih.

²²Te tuh-e pisepaw a seinaw hanlan ranpibawi nynh cyiseinaw silawnawpaw tuutepaw khate BAWIPAW malang khe seingaethyanaw kha a raepah cih; te tuh-e pisepaw a seinaw kha ngaethya athua cih.

²³Nanning nynh ram lungkhu lang na tee oh zah thingku aphuinphuin kha looh lang he na ling oh te, mih thingthae kha kheepaw thingthae lante na ria cih oh; tuh-e thingthae tuh nae hanlan kum thum lungkhu khee athua cih zah na ae lan khyh oh.

²⁴Kum palinaw kum khe mih thingthae balyn tuh athyaa cih zah BAWIPAW thehoysahnawpaw ahlu athua cih.

²⁵Thuasalama kum pangawnaw kum khe mih thingthae tuh nanning elang houh alung lante a thae nawlan, mih thingthae kha na ae cih oh: Kae tuh BAWIPAW nae Pachia nynh ka thua.

²⁶Pawpaw saw mah achii ryte na ae lan khyh oh. Kuihdokupaw beidin te naawthyanaw kha na mang lan khyh oh.

²⁷Nae nakalia e nae sang kha na ngokuh lan khyh oh, nae khawming adung kha mah na ngokuh lan khyh oh.

²⁸Achihpaw keiccuze na ngesaw kha na awkuh lan khyh, nae pyn kya apyaa na pyaakuh lan khyh: Kae tuh BAWIPAW nynh ka thua.

²⁹Ram tuh a ohhuakuhpaw lang a tang khyh nawlan te ozia hoyleinaw te phe abia khyh nawlan, na ccanung kha ohhuanung lang tangsahte pawlangria leite um nan.

³⁰Ka sabbath hae kha na sung cih zah ka beikinnthyaa kha saw na tua cih: Kae tuh BAWIPAW nynh ka thua.

³¹Chihiinleihthya hae paw, apawe hae paw te mitleihthya hae paw kha doliakuh nan oh; minmin keiccuze na nungsiku khyh nawlan oh, minmin kha ccung nan oh: Kae tuh BAWIPAW nae Pachia nynh ka thua.

³²Ataw vae paw malang khe na thadyn cih zah a kum tangpaw kha saw na tua cih; na Pachia kha na rih cih: Kae tuh BAWIPAW nynh ka thua.

³³Nae ram kya ramccang ccungccaw nynh a umbua ze, tuh-e ccungccaw kha na theihrya lan khyh oh.

³⁴Nae kya a um buapaw ramccang ccungccaw tuh nanning laku e ramccungccaw hawte athua cih; khah-e ramccang ccungccaw kha namaw toulou hawte na sungsah cih, pawccecize nanning tuh Izip ram kya ramccang hae nynh na thua oh: Kae tuh BAWIPAW nae Pachia nynh ka thua.

³⁵Asaepaw, aripaw te alung-azyapaw tounaw kya na hyn lan khyh.

³⁶Ahmepaw khinlung, ahmepaw zawccu, ahmepaw ephah, ahmepaw hin[4] kha na mang cih oh: Kae tuh Izip ram kyate ae poukhae oh paw BAWIPAW nae Pachia nynh ka thua.

³⁷Ka phungbya balyn te ka phungzae balyn kha na zui cih oh zah na cyih cih oh: Kae tuh BAWIPAW nynh ka thua.