Read Zotung Chin LEVITIKAS 26 Bible Online

LEVITIKAS 26 - Zotung Chin bible

LEVITIKAS 26

¹Naemaw hanlan zohtuh hae kha na raekuh lan khyh oh zah, beik lanpaw maeccang thuasah, tung thuasah na bingkuh lan khyh oh, te nae ram kya asoikuhpaw lung hae kha na nung lan khyh oh; pawccecize kae tuh BAWIPAW nae Pachia nynh ka thua.

²Ka sabbath hae kha na naawsah cih oh zah ka beikinnthyaa kha saw na tua cih oh: kae tuh BAWIPAW nynh ka thua.

³Ka phungbya hae te ka kawbya hae kha na tynsah cih oh zah lungzite na zui oh zetuh,

⁴accyh azaw khe nae hanlan khua ka rawsah cih zah laephi nynh looh kha a pousah cih, loo kya-e thingku hae nynh thae kha a thae cih hae.

⁵Ccathae rue ccyh nynh misu thae lo ccyh kha a phah cih zah misu thae lo ccyh nynh ccacii ccou ccyh phe a phah cih; nae looh kha phe byn lan na ae cih oh zah nae ram kya khyndadyh lan na um cih oh.

⁶Te nae ram kya daenaw ka umsah cih zah, na ih oh ze, hum nynh sanmah thinphangnaw ae pya lan khyh oh; sarepaw hae kha nae ram kyate ka dee cih zah nae ram balyn tuh thaloi kyate a lue cih.

⁷Nae rhaw hae kha na deehui cih oh zah nae malang khe thaloi liate a khuliakuh cih hae.

⁸Nanning lu pangaw nynh za kheit kha na dee cih oh zah, nanning za kheit nynh thong haw kha na dee cih oh; nae rhaw hae tuh nae malang khe thaloi keiccuze a khuliakuh cih hae.

⁹Nanning kha maehoynaw kae pya cih oh zah kae pungthungsah cih oh zah kae lungthung sah cih oh; ka byakinnaw kha nae kya ka tynsah cih.

¹⁰Khaw cia ccakhungkuhpaw looh arynpaw kha na ae cih oh zah, athawpaw ccakhungnaw hanlan arynpaw kha na phua cih oh.

¹¹Nanning ryte ka um cih zah, nanning kha kae hua lan khyh oh.

¹²Te nanning laku ka cceih cih, nae Pachia ka thua cih zah nanning tuh ka ccungccaw hae na thua cih oh.

¹³Kae tuh Izip hae see lang na tang vae khyh oh ccaw cite Izip ram kyate ae poukhae oh paw BAWIPAW nae Pachia nynh ka thua; nae nangrui hae kha phe ka pae vae zah nanning kha lawbabin lan kae cciasah vae oh.

¹⁴Thuasalama ka bya kha na ngae khyh oh zah hynh-e kawbya balyn hynh na zui khyh oh ze thuasah,

¹⁵ka phunglang hae kha pawlangria leite, ka phungzae hae kha na hua oh zah, tuhcite ka kawbya balyn kha zui leite ka byakinnaw kha na ro oh ze thuasah,

¹⁶kae nynh zemah hynh-e hynh nae tungvaw ka cyihru cih: myarya lepaw rinaw, mit rosah khylan te hiinnaw pawhaesah khylan ri lan umpaw ccinaw te zuukunaw kha nae tungvaw ka thuasah cih. Nae ccacii kha alakaw lan na ccou hang cih oh, pawccecize nae rhaw hae nynh khah-e kha a ae cih hae.

¹⁷Ka mae kae hawinua cih oh zah nae rhaw hae khate tuk na thua cih oh; nae rhaw hae nynh ae tae cih oh zah lu kheit nynh sanmah ae deehui khyh oh zemah na ccue cih oh.

¹⁸Te hynh-e koute, ka bya kha na ngaelae khyh oh zetuh, nae seinaw keiccuze leit sari de kae tah cih oh.

¹⁹Na lysahkunaw oh paw huhan kha ka roh cih zah nae vaawlui kha sivaw hawte thuasah, nae laephi kha sohin hawte thuasah ka rae cih.

²⁰Nae thawzung tuh eenaw um leipaw lang mang athua cih: nae laephi nynh looh kha pousah lan khyh zah laephi kya-e thing hae nynh thae kha thae lan khyh hae.

²¹Nanning nynh kae kha po nae rawse oh zah ka bya kha na ngae khyh oh zetuh, nae seinaw hanlan shethya leit sari kha nae tungvaw ka thuasah cih.

²²Sarepaw kha kae sawnua cih oh zah nae ccaaw hae te nae sahiin-awvaw hae kha ae ropah cih oh; tuh-e hae nynh nae milu kha ae zyasah bung cih oh zah nae laanpi hae kya ccungccaw ae daesahpah cih oh.

²³E detahnaw hae na ing oh salamah kamaw kalan maeleihku leite nae rawse ung oh zetuh,

²⁴kae nynh zemah po kae rawse cih oh: kamaw ccaccei nynh nae seinaw hanlan leit sari te de kae tah cih oh.

²⁵Ka byakinnaw elang liarunaw kha raete nanning detah khylan thaloi kae thuakhae cih; nae khua lungkhu na sueluaku oh ze, nae laku khe ri lan umpaw ccinaw kha ka saw cih zah nae rhaw hae kuih kya pya na thua cih oh.

²⁶Kae bawm oh paw nae looh kha he kae pya khyh oh tetuh, nopi lu haw nynh nae sanlou kha talyng-ang ccangkheit kyakhe a thou cih hae zah khah-e kha akhin saete ae nee cih oh; te na ae oh zemah na byn lan khyh oh.

²⁷Thuasalama hynhcite vawsawnaw mang na ing oh pite ka bya kha ngae leite nae rawse ung oh zetuh,

²⁸kae nynh zemah thinriate kae rawse ung cih oh; kamaw ccaccei nynh nae seinaw hanlan leit sari te de kae tah ung cih oh.

²⁹Nae ccapaw hae saw kha na ae cih oh zah nae ccanung hae saw kha na ae cih oh.

³⁰Na hangsah oh paw hmin hae kha ka roh cih zah nae kya-e mynkhuhpaw silawhang hae kha pong ka bae cih; nae rhua kha nae zohtuh hae mih rhua vawlan khe ka pum cih hae. Nanning kha kae hua cih oh.

³¹Nae khuapi hae kha marya ka roh cih zah nae beikinnthyaa hae kha ccungccaw ka daesah cih zah nae kya-e amynkhuhpaw kha ka myng lan khyh.

³²Ram kha marya ka roh cih, tuhteze nynh tuin ram kya khuasah lan oun cceih hae paw nae rhaw hae tuh mih rikaw athua cih.

³³Te nanning kha minphuin hae laku phiariphiarae kae nung cih oh zah nanning rawsete nae nulang te thaloi kae thuaanuakuh cih oh; nae ram tuh ccungccaw adae cih zah nae khuapi hae tuh pong aroh cih.

³⁴Nanning tuh nae rhaw hae ram kya na um oh zah ram kya ccungccaw adae lya balyn tuh ram tuh a sabbath kum hae kyakhe a lungpawkhaekuh cih.

³⁵Ram kya ccungccaw adae lungkhu balyn tuh ram tuh a haeung cih, ram kya na um lya oh tuh nae sabbath hae kya ram tuh haeung khyh.

³⁶Te nae rhaw hae ram kya na hiinhy oh paw nae thinlung kya lungthaw kae zyasah cih oh; thingnaw ahypaw roi nynh ae ccuesah cih oh zah, thaloi kyate a ccuepaw hawte na ccue cih oh, lu kheit nynh san ae deehui lei oh pite na khuliakuh cih oh.

³⁷Lu kheit nynh san ae deehui lei oh pite thaloi kyate lue khylan a ccuepaw hawte lu kheit vawlan lu kheit na sydekuh cih oh; nae rhaw hae kha rawsete thadynnuanaw lanpaw huhan na hoi vae lan khyh oh.

³⁸Minphuin hae laku na chih cih oh zah nae rhaw hae ram nynh ae laang cih oh.

³⁹Nanning lakuze na hiinhy oh paw tuh nae rhaw hae ram kya mih hoyleinaw keiccuze nae thaw azyabung cih; mih tawpaaw hae seinaw keiccuze mah mih thawzyabung cih.

⁴⁰Thuasalama ka tungvaw lungzinaw a hoi khyh hae apiaze kamaw kha palei yn rawse hae paw mih hoyleinaw te mih tawpaaw hae hoyleinaw kha a phyku hae ze thuasah,

⁴¹minmin kha liarute po ka rawse hae zah mih rhaw hae ram lungkhu lang ka cciakhae hae paw kha a phyku hae ze thuasah, tukoute vingdungawkuh leipaw mih thinlung kha nesakuh hae zah mih hoyleinaw kha a raeku thui hae ze thuasah,

⁴²Jakob kya ka raepaw ka byakinnaw kha thuasah, Isak kya ka raepaw ka byakinnaw te Abraham kya ka raepaw ka byakinnaw kha thuasah, tuh-e ram kha mah thuasah ka liathui cih.

⁴³Ram tuh a cciataw cih hae zah ram kya minmin a um khyh keiccu hae ze, sabbath kum hae kya ram tuh a lungpaw cih; ka phungzae hae kha ei ngan hae zah ka phungbya kha a hua keiccu hae ze minmin nynh mih hoyleinaw kha a raekuh thui cih hae.

⁴⁴Tuhzemah tuh-e hae balyn keiccuze minmin nynh mih rhaw hae ram kya he a um hae tuh, minmin kha ka vua lan khyh hae, minmin kha marya ro khylan te minmin kya ka raepaw ka byakinnaw kha phe ro lan ciate ka hua lan khyh hae; pawccecize kae tuh BAWIPAW mih Pachia nynh ka thua;

⁴⁵Mih Pachia lang tang khylan minphuin hae mitmuihnaw kya Izip ram atolang ka poukhae hae paw mih minpaaw hae kya ka la raepaw ka byakinnaw kha minmin elang ka liathui cih: kae tuh BAWIPAW nynh ka thua.

⁴⁶Hynh-e hae tuh BAWIPAW nynh amaw ccaccei te Israel ccungccaw hae laku kya Sinai Mua vawlan Moses kyakhate a tynsahpaw phungbya hae, phungzae hae te upadi hae nynh athua hae.