Read Zotung Chin JEREMIAH 10 Bible Online

JEREMIAH 10 - Zotung Chin bible

JEREMIAH 10

¹Pou Israel hae, BAWIPAW nynh ae hopya oh paw bya hynh ngaetua oh.

²BAWIPAW nynh hynhte a ho: Minphuin ccangpaw hae laanpi kha ccangkuh nan oh, vaawlui e muihsahnaw hae keiccu mah siikuh nan oh; minphuin ccangpaw hae tuh tuh-e hae keiccu a siikuh hae.

³Ccungccaw hae phungtho tuh kyh khyh: ramkaw e thing kha nge hae zah, a kuihhae hoypaw ccungccaw nynh hae te a sue;

⁴tuh-e tuh sui te ngun te ccaan hae zah, ccanglang a nueku khyh ccaw cite khynlyng te thingkhia a khiade hae.

⁵Mih zohtuh hae tuh zinae khokhu kya arih-avaw nynh rih sah cite saepaw uccaw te lokuh hae zah bya mah hothya khyh hae; a cciathya khyh keiccuze phu te a phu hae. Khah-e hae kha rih nan oh, pawccecize hoyleinaw kha rae kho khyh hae zah, hoynaw kha mah rae kho khyh hae.

⁶Pou BAWIPAW , nang ae lopaw humhung mah um khyh; nang tuh na lesae zah, na min mah thungnaw te a lesae.

⁷Pou minphuin hae Siapharan, nang ae rih leipaw hummou a um? Pawccecize nang tuh ri lan a ccanpaw nynh na thua; minphuin kyaze a hawhua hae paw kya thuasah, mih peenaw balyn kya thuasah nang ae lopaw lu kheit san um khyh.

⁸Minmin tuh angaee-abupaw nynh thua hae; zohtuh kyate a mue hae paw thuiheinaw tuh thingtung laeze ahoy huanaw um khyh!

⁹Adeihkuhpaw ngun tuh Tarshish ram kyate a phu hae paw thua zah, sui tuh Ufaz ram kyate a phu hae paw nynh thua. Khah-e hae tuh a kuihhae hoypaw te suitheithyapaw nynh a rae hae paw nynh thua; mih boeining tuh meizong te sephaphuhpaw nynh thua; khah-e hae balyn tuh ryalaw apuakuhpaw nynh a rae hae paw nynh thua.

¹⁰Thuasalama BAWIPAW tuh ahmepaw Pachia nynh thua; aning tuh ahiinpaw Pachia, zungzae Siapharan nynh thua. A thinria vae ze laephi tuh ahy, minphuin hae nynh a thinrianaw kha ngaesang kho khyh hae.

¹¹Minmin kha hynhte hopah oh: Vaaw te lae a rae leipaw pachia hae tuh laephi kyate thuasah, vaawlui zakaw kyate thuasah aroh cih hae.

¹²BAWIPAW nynh laephi kha a huhan te a rae, laephipi kha a hawnaw te tynsah zah, vaawlui kha a thyanaw te tharae a dawsaku.

¹³A roi he a saw tuh, vaawlui kya tui roi accae, laephi adianaw kyate maeking kha a kaethungsah. Khuaa hanlan khozaw laesakuh zah, a ccakhungnaw inn kyate khisan kha a pousah.

¹⁴Ccungccaw miakaw tuh nynaw a hoi leipaw mingaee cci nynh thua hae; suilaeethya hae paw kha mih zohtuh hae khate maethyalaw athua hae; pawccecize mih zohtuh hae tuh hynpyakunaw thua hae zah, minmin kya hy um khyh.

¹⁵Khah-e hae tuh alakawpaw, hynpaw ryalaw nynh thua hae; minmin detahnaw ccyh kyakhe minmin tuh aroh cih hae.

¹⁶Jakob a hanpaw BAWIPAW tuh tuhcihawpaw hae te lokuh khyh, aning tuh atyn-are a raetu thua zah, Israel tuh amaw rho athuapaw minphuin nynh thua; a min tuh vaaw BAWIPAW acikuh.

¹⁷Pou rhaw nynh a koihlu hae paw nanning, laephi kya-e nae sisua hae kha suelua oh!

¹⁸BAWIPAW nynh hynhte a ho: Atumaw, ram lungkhu um hae paw hynh ka deihnah vae cih hae, riathaenaw kha a teing nawlan hae, mih tungvaw ka thuasah cih.

¹⁹Ka vaemaw keiccuze ka tungvaw ngaethya lan kou um! Ka vaemaw tuh myarya le. Thuasalama, kae nynh, “E ka teingpaw detahnaw hynh, ka teing hahe cih,” ka ci.

²⁰Ka bu tuh aroh vae, ka bu heenawpaw liarui balyn tuh apae vae; ka ccaaw hae nynh phe yn cciataw hae zah, um vae khyh hae; ka bu kha bua a daw lanpaw te a zokhaw lanpaw lu kheit san um vae khyh.

²¹Pawccecize tuurin hae tuh ngaee hae zah, BAWIPAW kha tuanaw ngiakuh khyh hae; tukeiccuze mih laan mih sui ua khyh, mih tuuphu balyn tuh phiariphiarae a phiakuh hae!

²²Siarisiaraepaw roi tuh ngaetua oh! Oun ccia hae paw roi tuh ngaetua oh— Judah khuapi hae kha rote suizaw hae karung lang rae khylan, thahlang ram kyate ngaluin-ngaluin accaepaw roi pipi tuh yn naekuh vae.

²³Pou BAWIPAW , ccungccaw nynh tuh a zuipaw a laanpi kha uk kho khyh zah, a ccia lyakhe a laanccia kha mah dosekuh thya khyh cipaw ka ny.

²⁴Pou BAWIPAW , yn thuiheitua, thuasalama thinriate thuihei leite byading te yn thuiheitua; tuhkhyhze tuh accakaepaw lang nae tangsahsei cih.

²⁵Nang ae nyh leipaw minphuin hae tungvaw te na min ae ko leipaw ccungccaw hae tungvaw khe na thinrianaw kha ccawsah tua, pawccecize minmin nynh Jakob kha karyh ae hae zah a maemih vae hae, a umnaw kha mah a ropya vae hae.