Read Zotung Chin JEREMIAH 11 Bible Online

JEREMIAH 11 - Zotung Chin bible

JEREMIAH 11

¹Jeremiah kya yn thuapaw BAWIPAW bya tuh:

²E byakinnaw bya hae hynh ngae lah, Judah hae te Jerusalem khuaccaaw hae kalan hopah hae.

³Nang nynh minmin kya na hopya lan hae paw tuh, BAWIPAW, Israel Pachia nynh hynhte a ho: Sivaw tuisahnawpaw somaee athuapaw Izip ram kyate nae minpaaw hae kha, Ka bya ngae oh lah, kaw kae pya oh paw balyn hynh cyih oh, cite hopyate ka poukhae lya hae ze, kaw ka pya hae paw, e byakinnaw bya hynh pawlang a ria leipaw miakaw kya thyalawnaw ccah sah. Atunin acyiku hawte, mateitui te khoilutui aluanaw ram kha kae pya cih oh, cite nae minpaaw hae kya bya ka kinpyaku hae paw kha ka ccingsah nawlan, nanning tuh ka ccungccaw hae na thua cih oh zah, kae tuh nae Pachia ka thua cih, a ci. Tetuh kae nynh, “Tuhmawte thua sah, BAWIPAW ,” ka cipya.

⁶Te BAWIPAW nynh kae yn hopyapaw tuh: Judah khuapi hae kya te Jerusalem laanpi hae kyakhe hynhte siakhae tua: E byakinnaw bya hynh thae oh lah, zui oh.

⁷Pawccecize nae minpaaw hae kha Izip ram kyate ka poukhae lya hae te atunin cia, Ka bya ngae oh, cite raeringnaw hoyte ka pya hae.

⁸Tuhzemah minmin nynh zui khyh hae, mih nakaring tuakuh khyh hae, mih balynte ahoy leipaw mih rynaw thyhte lungkhungte a ccia hae. Tukeiccuze zui lan kaw ka pya hae zah a zui lei hae paw e byakinnaw bya balyn hynh mih tungvaw ka ccawsah.

⁹Te BAWIPAW nynh yn hopyapaw tuh: Judah hae te Jerusalem khuaccaaw hae nynh aruh lante paccynkunaw a hoi hae.

¹⁰Ka bya a ei hae paw langmawlya e mih minpaaw hae hoyleinaw kalan khe a ki vae hae; ccangpaw pachia hae kha beik khylan, tuh-e hae nulang khe a zuikuh vae hae; mih minpaaw hae ryte kae raekheihpaw byakinnaw kha Israel hae te Judah hae nynh a ro vae hae.

¹¹Tukeiccuze, BAWIPAW nynh hynhte a ho: Minmin nynh a lue kho lei hae paw ronaw kha mih tungvaw ka thuasah ccaccing cih; ka kalan a sia hae zemah, ka ngaepah lan khyh hae.

¹²Tetuh Judah khuapi hae te Jerusalem khuaccaaw hae nynh si a law hae paw pachia hae kalan cciate a sia hae zemah, mih vawsaw ccyh lyakhe tuh-e pachia hae nynh kharouh khum lan khyh hae.

¹³Pou Judah, na pachia hae tuh na khua hae zeih acih hae; te maethyalawku khylan na raepaw silawhang hae, Baal kalan silaw nawlan na raepaw silawhang hae tuh Jerusalem khua e laanpi hae zeih acih.

¹⁴Tukeiccuze Jeremiah, nang nynh e ccungccaw hae hanlan sawsang nan, minmin ccelang sia nan lah sawsang nan, pawccecize mih vawsaw lya yn ko hae ze, ka ngaepah lan khyh hae.

¹⁵Ka sungsahnung nynh anungsikuhpaw rya a law lyakhe, ka inn kya paw kaw mou a hoi ung? Byakinpyakunaw te silawnawpaw saw nynh nae kya-e ronaw kha a sibia kho tou? Te nae lungtua kho tou?

¹⁶Vaekheihlya tuh BAWIPAW nynh nang kha, “Thae hoypaw te apuithya khaekuhpaw, hinlalyhpaw oliv thing,” cite ae la ko; thuasalama tuh-e oliv thing tuh myarya ccaepaw roi khate maee a soi cih zah, a karan hae tuh a u cih.

¹⁷Israel hae te Judah hae nynh Baal kalan silawnaw raete ka thin yn riasah hae zah, hoyleinaw a rae hae keiccuze, nang ae linkuhtupaw vaaw BAWIPAW nynh nang ae rawsenawpaw hoyleinaw kong kha a ho vae.

¹⁸BAWIPAW nynh ka rhaw hae paccynkunaw kha yn nysah keiccuze ka ny; ahoy leipaw mih cyisahnaw kha nae langsahpyaku.

¹⁹Thuasalama kae tuh chia khylan a cciakhae hae paw tuutaw zingbabipaw hawte nynh ka thua. Minmin nynh, “A min kha liathui athua vae khyh nawlan, aning hynh a hiin hae paw umnaw laephi kyate zosah oh sih lah, thingku kha athae ryte roh oh sih,” cite hokute, hoyleinaw yn la paccynnuaku hae paw kha ka la nyh khyh.

²⁰Thinlung te tuanaw kha a syntawtuapaw, ahmete bya a piapaw, pou vaaw BAWIPAW , minmin tungvaw de na tah hae paw kha beih yn muih sah, kae tuh ka byathan kha nang kae pya vae.

²¹Tukeiccuze e hynh, “BAWIPAW min te profehbya na ho lan khyh, tuhkhyhze tuh kae kuih te na chih cih,” cite nang kha ae hopah hae zah, na hiinnaw ae hawkuh hae paw Anathoth ccungccaw hae te asekuh lante BAWIPAW nynh a hopaw nynh thua—

²²tukeiccuze vaaw BAWIPAW nynh hynhte a ho: Minmin kha de ka tah cih hae; ccangvae hae tuh thaloi te a chih cih hae; mih ccapaw hae te mih ccanung hae tuh ccakan te a chih cih hae;

²³lu kheit sanmah hiinhy lan khyh. Pawccecize Anathoth ccungccaw hae tungvaw, minmin detahnaw kum, ronaw kha ka thuasah cih,