Read Zotung Chin JEREMIAH 15 Bible Online

JEREMIAH 15 - Zotung Chin bible

JEREMIAH 15

¹Te BAWIPAW nynh kae yn hopyapaw tuh: Moses te Samuel nynh ka malang a thadyn hae zemah, e ccungccaw hae hynh ngaethya ka ungsah lan khyh hae. Minmin kha ka kyate de hae lah, cceih hae sah!

²Te minmin nynh, “Teilangmou kae cceih cih?” cite ae khia hae ze, na hopya lan hae paw tuh: BAWIPAW nynh hynhte a ci: Shethya kalan accan hae paw tuh shethya kalan, thaloi kalan accan hae paw tuh thaloi kalan, ccakannaw kalan accan hae paw tuh ccakannaw kalan, kyngkunaw kalan accan hae paw tuh kyngkunaw kalan cceih oh, cite na hopah cih hae.

³Minmin tungvaw rohtu phuin pali ka nungnua cih hae, cite BAWIPAW nynh a ci: chia nawlan thaloi, sue te tei nawlan ui, a aetu lang vaawlang e pavaw hae te laephi kya-e loramsaw hae nynh thua hae.

⁴Judah siapharan Hezekiah ccapaw Manasseh nynh Jerusalem khua lungkhu a cyipaw keiccuze minmin tuh laephi vaw e ram balyn hanlan ri lan um hae paw lang ka rae cih hae.

⁵Pou Jerusalem, hum nynh mou nang kha ngaethya ae ungsah cih? Hum nynh mou a ngae ae thyakhae cih? Na dan tou, cite nang kha byabeih khylan hum nynh mou na kalan yn teepaw cih?

⁶Nang nynh kae kha nae vua zah, nulang nae sihtawku vae, cite BAWIPAW nynh a ci; tukeiccuze ka kuih kae dyngnua zah kae ro vae, ngaethyaumsah tolae tuh phe ka bang vae.

⁷Minmin kha ram lungkhu e koikua hae kya ccangkung te ka vaw vae hae; minmin kha rawkhuite ka nung vae hae, mih laanpi kyate maeleihkuh khyh hae zah, ka ccungccaw hae kha ka ro vae hae.

⁸Mih nomae hae tuh rili laesia laeze a lunghua vae hae; ninthuccynglyn khe imua hae mih nung hae a rohtupaw kha ka thuasah vae; tuh-e mih nung tungvaw khe lungriathaenaw te rikawnaw kha vaekheihmawte ka thuasah vae.

⁹Ccapaw lu sari a saahpaw nopi tuh a thawzya vae zah, a hy athang vae; khuadae ccyh lyamawkhe a khuanin accah; maethya thethyate a um. Minmin laku e tuhlaepaw balyn kha mih rhaw hae malang khe thaloi rhaw kalan ka pya cih hae, cite BAWIPAW nynh a ci.

¹⁰Pou anung, ka tungvaw ngaethya lan kou um, ram pynpi te a pekuh hae paw te a eikuh hae paw pisepaw kae hynh nae la saahku! Humhung kha mah phua ka koiisakuh boi khyh zah, koii mah ka koii boi khyh, tuhzemah ccungccaw balyn nynh kae kha thya yn law hae.

¹¹BAWIPAW nynh a hopaw tuh: Na hiin hoynaw hanlan kae cyipya ccaccing vae, vawsaw ccyh te riathae ccyh kya na rhaw hae nynh nang kha bawmnaw ae ngiaku nawlan hae kae cyipya ccaccing vae.

¹²Sivaw te sohin nynh palung langte yn thuapaw sivaw kha a khya kho hae tou?

¹³Na ram pynpi kya-e na seinaw balyn keiccuze na sisua te na hoirumnaw kha amee leite, luadetu hae kalan ka pya cih hae.

¹⁴Na ny leipaw ram kyakhe na rhaw hae hanlan rya kae lawsah cih, pawccecize ka thinria keiccuze zungzae arua cih paw maee tuh tyh athua vae.

¹⁵Pou BAWIPAW , nang nynh phe na ny; kae hynh yn liathui lah, yn paebua tua, kae yn tuaa yn sah hae paw tungvaw khe liarunaw kha thuakhae tua. Minmin kha ngaesangpyate kae hynh beih yn maemih nan; na hanlan theihryanaw ka teingpaw hynh beih nytua.

¹⁶Pou BAWIPAW , vaaw Pachia, na bya kha ka muih zah ka lawku, na bya tuh ka hanlan lungtuanaw lang tang zah, ka lungrythuakhaekuh; pawccecize kae tuh na min te ko ka thua.

¹⁷Lungpawnaw a raekuh hae paw phu kya ka haungbua khyh zah, lungpawnaw mah ka raekuh khyh; na kuih khangte rya nae pyapaw kya ka makhaete ka um, thinrianaw te phe nae biasah vae.

¹⁸Pawccemou ka ngesaw accipaw hynh adae kho khyh? Pawccemou ka vaemaw hynh dan kho leite um zah, azo kho khyh? Thanccingte, nang tuh ka hanlan ahynhupaw vaw taraw, karae akanpaw tui hawte nynh na thua.

¹⁹Tukeiccuze BAWIPAW nynh hynhte a ho: Ka kalan nae kithui zetuh kae lahthui cih zah, ka rya kha bua na lah cih. Aphutepaw bya kha na ho zah, athane leipaw bya kha na ho khyh zetuh, ka bya a hotu na thua cih. Minmin nynh ka kalan oun kithui cih hae, nang nynh minmin kalan na cceih lan khyh.

²⁰E ccungccaw hae hanlan nang kha sohin te raepaw khualungrua lang kae rae cih; minmin nynh nang kha ae rawse cih hae, thuasalama ae tae lan khyh hae, pawccecize nang kha khum khylan te luesah khylan kae tuh na kya ka um, cite BAWIPAW nynh a ci.

²¹Nang kha ccungccaw hoylei hae paw kuih kyate kae luesah cih zah, mih rysawthah hae paw nynh kyngkunaw kyate kae shawkhaw cih.