Read Zotung Chin JEREMIAH 16 Bible Online

JEREMIAH 16 - Zotung Chin bible

JEREMIAH 16

¹Ka kya yn thuapaw BAWIPAW bya tuh:

²Nang tuh zu na dy lan khyh, e hmin kya ccanung ccapaw na saahkuh lan khyh.

³E hmin kya a puipaw ccanung ccapaw hae te thuasah, mih nung mih paaw hae te thuasah asekuh lante BAWIPAW nynh hynhte a ho:

⁴Minmin tuh a chisah khopaw ccinaw te a chih cih hae. Minmin kha rawhuite uu thua lan khyh hae; lae vawlan e ia hawte athua cih hae. Thaloi te ccakannaw khate a chih cih hae zah, mih rhua tuh vaawlang e pavaw hae te laephi vawlan e loramsaw hae hanlan looh athua cih.

⁵BAWIPAW nynh hynhte a ho: Michi sungkunaw inn lungkhu lang tee nan, michi rawhui khylan te ngaethyakhae khylan mah cceih nan; pawccecize e ccungccaw hae kyate ka daenaw, atynpaw ka sungsahnaw te ka thawccinaw kha phe ka law vae, cite BAWIPAW nynh a ci.

⁶E ram kya ccungccaw a lesaepaw te a nyaapaw parouhte a chih cih hae; minmin kha uu thua lan khyh hae, te lu kheit nynh sanmah rawhui lan khyh hae, minmin hanlan ngesaw awkunaw te lu-okunaw um lan khyh.

⁷Michi hanlan rawkhuite a um hae paw kha lungtangnaw pya khylan hum nynh sanmah loohdangkunaw rae lan khyh; mih nung mih paaw a chi hae keiccuze minmin kha nia lanpaw lungtangnaw banang nangkheit san a pyatu um lan khyh.

⁸Poi tuanaw inn lungkhu lang na tee lan khyh, minmin ryte aekheih niakheih khylan na haungkheih lan khyh oh.

⁹Israel Pachia, vaaw BAWIPAW nynh hynhte a ho: E hmin kya lungtuanaw roi, lungpawnaw roi, zudy ccangvaepaw roi te akaenung liaccanung roi kha naemaw she kya, nae muihnaw kyate ka zosah cih.

¹⁰Nang nynh e bya balyn hynh e ccungccaw hae kya na hopah hae zah, minmin nynh, “Pawccemou BAWIPAW nynh e myarya lepaw hoyleinaw balyn hynh kaening tungvaw oun honua? Paw hoyleinaw mou kae rae? BAWIPAW kae Pachia tungvaw paw seinaw mou kae rae?” cite nang kha he ae khia hae te,

¹¹nang nynh minmin na hopya lan hae paw tuh: Nae minpaaw hae nynh kae kha yn vua hae, ccangpaw pachia hae nulang zuikute ryalawpah hae zah a beik hae, kae kha yn vua hae zah ka kawbya kha a zui khyh hae keiccu nynh thua;

¹²te nanning nynh nae minpaaw hae laeze athahhua lante na um oh zah, alungkhungpaw te ahoy leipaw nae rynaw kha zuite, ka bya ngae lan na ei oh keiccu nynh thua.

¹³Tukeiccuze nanning te nae minpaaw hae nynh na ny lei oh paw ram lungkhu langkhe e ram kyate kae vua cih oh, tuin ram khe ccangpaw pachia hae kha khuazi khuadae rya na lawpah cih oh, pawccecize nanning kha maehoynaw kae pya lan khyh oh.

¹⁴Tukeiccuze BAWIPAW nynh a hopaw tuh: “Israel hae kha Izip ram kyate a poukhae hae paw BAWIPAW tuh a hiin,” cite ho vae leite,

¹⁵“Israel hae kha thahlang ram kyate thuasah, aning nynh a la deenaw hae ram takyh kyate thuasah a poukhae hae paw BAWIPAW tuh a hiin,” cite a honaw hae ccyh tuh yn thua ccaccing cih. Pawccecize mih minpaaw hae ka la pya hae paw mih ram langkhe minmin kha ka kikhae cih hae.

¹⁶BAWIPAW nynh a hopaw tuh: Ngasaw a kyngtu hae patae kha ka saw cih hae zah, minmin kha a kyng cih hae; tukoute sawkawthya hae paw kha ka saw cih hae zah mua takyh, sangpyng takyh te lungpi hae laku khe minmin kha a ccung cih hae.

¹⁷Pawccecize ka mit nynh mih laanpi balyn kha pong a muih; ka kyate rekuh kho khyh hae zah, mih hoyleinaw kha ka muihnaw kyate thuruh kho khyh hae.

¹⁸Minmin nynh ka ram kha anungsikuhpaw mih zohtuh achih hae paw khate phe biasah hae zah, ka rho kha mih nungsikunaw khate phe a biasah hae keiccuze mih hoyleinaw te mih seinaw kha leit ning te ka liaru cih hae.

¹⁹Ka thawzung te ka rhawlungrua, vawsaw ccyh lya ka khynnaw athuapaw, pou BAWIPAW , laephi adianaw kyate ccangpaw minphuin hae nynh na kalan oun cceih cih hae zah: Kae minpaaw hae nynh rho lang a la ccou hae paw tuh hynbya, accakaepaw te athane leipaw uccaw ccungkia leipaw nynh a la thua hae.

²⁰Ccungccaw nynh amaw hanlan pachia hae kha a raekuh kho tou? Tuhcihawpaw pachia hae tuh pachia thua khyh hae!

²¹“Tukeiccuze minmin kha solei ka ccangpah cih hae, atu ka huhan te ka thungnaw kha ka nysah cih hae zah, minmin nynh ka min BAWIPAW athuapaw kha a nyh cih hae,” a ci.