Read Zotung Chin JEREMIAH 17 Bible Online

JEREMIAH 17 - Zotung Chin bible

JEREMIAH 17

¹Judah seinaw kha sivaw bawpe te zei athua; mih thinlung lungphe vawlan khe daimon azuingpaw te karynte zei thua zah, mih silawhang ki hae kyakhe zei athua,

²ramkaw kya umpaw mua hae vawlan, ahangpaw mua dung hae vawlan te hinlalyhpaw thingku miakaw pepan kya a umpaw mih silawhang hae te Asherah khozinung tung hae kha mih ccaaw hae nynh a liathui hae.

³Na ram pynpi e na seinaw mee lang na sisua te na ccakhungkupaw na uccaw balyn kha luadetu hae kalan ka pya cih hae.

⁴Na cyisahnaw keiccuze nang kae pyapaw rho kha na shung cih, na ny leipaw ram kya-e na rhaw hae hanlan rya kae lawsah cih, pawccecize ka thinria keiccuze zungzae arua cih paw maee tuh tyh athua vae.

⁵BAWIPAW nynh hynhte a ho: Ccungccaw basi kha doliakuh zah ccungccaw basi kha a thawzung lang nungkute BAWIPAW kyate a thinlung a maeleihkuhpaw tuh thyalaw athua hae.

⁶Aning tuh laesia ram e thabu hawte athua cih zah, bawmnaw he yn thua te mue lan khyh. Aning tuh ramkaw e ramrou, humhung mah a um leinaw loi ram kyakhe a um cih.

⁷BAWIPAW a doliakuhpaw tuh hythua ccoupaw nynh thua, aning nynh a doliakupaw tuh BAWIPAW nynh thua.

⁸Aning tuh tui pe lin thua zah, vawkhu kin atharui a sawpaw thingku hawte athua cih. Tuh-e thingku nynh asopaw yn thua vae ze rih lan khyh zah, anaw tuh hinlalyh lan a um cih; khuaakan kum khe a thinphang khyh zah, athae dy leite po athae.

⁹Thinlung tuh pawpaw balyn laeze a thyaruhhua; thinlung tuh a ccouseikuh, hum nynh mou thinlung kha a nyhthya kho cih?

¹⁰Kae, BAWIPAW tuh ccungccaw miakaw kha mih cyisahnaw thyhte, a cyi hae paw thyhte aphu-aphae pya khylan mih tuanaw kha ka syntawtua zah, mih thinlung kha akaw-aleih ka do.

¹¹Ahme leite sisua a ccakhungkuhpaw tuh amaw atui athua leipaw kya a ccungpaw vawkya pavaw hawte nynh athua; a hiinshe angankuh he athua te, tuh-e sisua hae kha a cciataw cih zah, athangnaw kya tuh mingaee athuanaw kha amaw nynh ccaekia a khan cih.

¹²Athotakawnaw kyate hangthung athuapaw, aphu-epaw bawitungkhung tuh ah beiknaw hminthyaa nynh thua!

¹³Pou Israel a ngaehoinaw athuapaw, pou BAWIPAW! Nang ae vuapaw balyn tuh maethyanaw a mue cih hae; na kyate ccanglang a maeleihkuh hae paw tuh laephi ccazing kya zei athua cih hae, pawccecize minmin nynh hiinnaw tuidy, BAWIPAW kha a vua vae hae.

¹⁴Pou BAWIPAW , yn dansah lah, ka dan cih, yn khum lah, khum ka thua cih; pawccecize the ka hoysahpaw tuh nang nynh na thua.

¹⁵“BAWIPAW bya tuh teimou a um? Atu oun thua sah!” cite ccungccaw hae nynh kae kha yn ci hae.

¹⁶Thuasalama na ryalaw kya tuurintu thuanaw kha ka ccuetaw boi khyh, vawsaw ccyh kha ka ry boi khyh. Ka munglae kyate atoikuhpaw bya kha na nyh zah, tuh-e bya tuh na malang khe a um.

¹⁷Ka hanlan ri lan umpaw lang tang nan; nang tuh shethya ccyh kya ka khynnaw nynh na thua;

¹⁸Kae yn tuaa yn sahtu hae paw tuh maethyanaw mue hae sah, thuasalama kae tuh maethyanaw ka mue nan sah; minmin tuh mih lungroh sah, thuasalama kae tuh lungronaw ka mue nan sah; nang nynh mih tungvaw khe shethya kha thuasah lah khaleih roh hae!

¹⁹BAWIPAW nynh kae yn hopyapaw tuh: La cceih lah Judah siapharan hae nynh a teenaw hae te a pounaw hae Zapi Koikua kya te Jerusalem koikua balyn kyakhe thadyn lah,

²⁰ccungccaw hae kha hynhte hopah hae: E koikua hae kyate na tee oh paw Judah siapharan hae, Judah hae balyn te Jerusalem a um hae paw nanning, BAWIPAW bya kha ngaetua oh, cite hopah hae.

²¹BAWIPAW nynh hynhte a ho: Nae hiinnaw hanlan, nanning nynh sabbath nin kya uccaw na phu khyh nawlan oh te Jerusalem koikua kyate na teekhae khyh nawlan oh raeringkuh oh.

²²Sabbath nin kya nae inn kyate uccaw toikhaekuh nan oh, pawpaw rya mah lah nan oh, nae minpaaw hae kha kaw ka pya hae thyhte, sabbath nin kha thyaasah oh.

²³Tuhzemah minmin nynh ngae khyh hae zah, mih nakaring tuakuh khyh hae; mih nging tokarae lan a um hae, thuiheinaw kha thae ry khyh hae zah lawkuh khyh hae.

²⁴BAWIPAW nynh a hopaw tuh: Nanning nynh ka bya kha ngaete, sabbath nin kya uccaw kha hynh-e khuapi koikua kyate teekhae leite na um oh zah, sabbath nin kha thyaasahte rya na law khyh oh zetuh,

²⁵David bawitungkhung vawlan a haungpaw siapharan hae tuh marangle hae te marang hae kha ccikute, mih kuihkaw e bawi hae, Judah ccungccaw hae te Jerusalem um hae paw ryte, e khuapi koikua hae kyate a tee cih hae; e khuapi tuh zungzae atyn cih.

²⁶Judah ram e khua hae te Jerusalem pepan e hmin hae, Benjamin ram, mua leihpaw e khua, mua vaw e khua hae te alia lang e khua ccungccaw hae tuh oun cceih cih hae zah, maee-ute silawnawpaw, silawnawpaw hae, ccathae silawnawpaw te frankinsen, lungtuanaw silawnawpaw kha BAWIPAW inn lang oun ccyng cih hae.

²⁷Thuasalama ka bya na ngae khyh oh zah, sabbath nin thyaasah lanpaw te sabbath nin kya Jerusalem koikua hae kyate uccaw phute teekhae lei lanpaw ka bya kha na ngae khyh oh zetuh, tuh-e khua koikua kyakhe maee ka ruasah cih; tuh-e maee nynh Jerusalem khua e siapharan inn hae kha khaleih a u cih zah, tuh-e maee tuh the thua lan khyh.