Read Zotung Chin JEREMIAH 18 Bible Online

JEREMIAH 18 - Zotung Chin bible

JEREMIAH 18

¹BAWIPAW kyate Jeremiah kya yn thuapaw bya tuh:

²“Thokuh lah, ang raetu inn lang cciatua, tuin kya ka bya kha kae thaesah cih,” a ci.

³Tukeiccuze ang raetu inn lang ka cceih zah, ang raenawpaw a leccu te rya a lah cciamangpaw kha ka muih.

⁴Anglae te a raepaw ang tuh ang raetu kuih kya phe aro ze, tuh-e maw tuh a ry hawte ccangpaw ang lang bua a rae.

⁵Tetuh BAWIPAW bya tuh ka kya yn thua zah,

⁶BAWIPAW nynh a hopaw tuh: Pou Israel phin hae, e ang raetu nynh a rae hawte nanning kha kae rae kho khyh oh tou? Pou Israel phin hae, anglae tuh ang raetu kuih kya a um hawte nanning tuh ka kuih kya nynh na um oh.

⁷Ccyh sosoh kya, minphuin phuin kheit khyhze ram ramkheit kha poh ka khaee lanpaw, ka koi lanpaw te ka ro lanpaw kong kha ka ho cih,

⁸thuasalama ka honuathepaw tuh-e minphuin nynh a hoyleinaw kyate a maeku zetuh, tuh-e minphuin tungvaw thuakhae lan ka paccynpaw ronaw kong kha ka thinlung ka paleih cih.

⁹Te ccangpaw sosoh ccyh kya, minphuin phuin kheit khyhze ram ramkheit ka rae lanpaw te ka lin lanpaw kong kha ka ho cih,

¹⁰thuasalama ka bya ngae leite, ka muihnaw kya hoyleinaw kha a rae zetuh, tuh-e ram tungvaw raepya lan ka paccynpaw hoynaw kong kha ka thinlung ka paleih cih.

¹¹Tukeiccuze, atu, Judah ccungccaw hae te Jerusalem a um hae paw kalan khe hopah hae: BAWIPAW nynh hynhte a ho: Dotua, kae tuh nanning kha hoyleinaw raenua te ae paccynnuakuhpaw ang raetu nynh ka thua. Nanning balyn nynh ahoy leipaw nae laanpi kyate maeleihkuh oh lah, nae hiinzia te nae cyisahnaw kha raekuh thui oh.

¹²Thuasalama minmin nynh, “Ccungkianaw um khyh! Aening nynh ah paccynku oh paw kha ah zui cih oh zah, aening lu kheit cci nynh ahoy leipaw te alungkhungpaw ah rynaw thyhte ah cyih cih oh,” a ci hae.

¹³Tukeiccuze BAWIPAW nynh hynhte a ho: Minphuin hae kha la khiatua oh: Hynhcihawpaw hynh hummou a thae boi? Liaccady Israel nynh myaryamaw anungsikuhpaw uccaw kha a cyi vae.

¹⁴Lebanon mua e lungpi hae kha Lebanon vuiraw nynh a vuasya boi hae zawtou? Tuh-e mua vawlan e tui, kyaakakin lan aluapaw vawkhutui hae tuh akan boi zawtou?

¹⁵Thuasalama ka ccungccaw hae nynh kae kha yn ning vae hae, accakaepaw lingkunaw kalan khe mynkhuhpaw kha a upya hae; langmawlya a zuimae hae paw mih laanpi kyakhe thykuh hae zah, laanluepi kha zui leite sah leipaw laanpi kha a zui hae,

¹⁶mih ram kha ri lan umpaw, zungzae a sarya hae paw lang a tangsah hae. A pepan a cceihpaw balyn tuh siikuh hae zah, mih lu a he hae.

¹⁷Nithua lang e khisan hawte, minmin kha rhaw hae malang khe phiariphiarae ka nung cih hae. Shethya ccyh lyakhe minmin kha ka mae langsahpyaku leite, ka ke kha ka langsapakuh cih hae, a ci.

¹⁸Tetuh minmin nynh, “Rang oh, Jeremiah kha rawsete khuakhankuh oh sih; ccangpahtu lang ranpibawi hae, tuanaw pyatu lang mihaw hae te Pachia bya a hotu lang profeh hae tuh a um mamin cih hae. Rang oh, Jeremiah kha bya ccungpah oh sih lah, a bya kha pawlangria nan oh sih,” a ciku hae.

¹⁹Pou BAWIPAW , kae hynh pe yn kitua lah, ka rhaw hae nynh pawmou a ho hae cipaw kha beih ngaetua!

²⁰Hoynaw hynh hoyleinaw tetou liaru athua cih? Minmin nynh ka hiinnaw kha uu nawlan laekarung a thae vae hae. Minmin tungvaw na thinrianaw kha adae nawlan te minmin hanlan hoynaw byaho khylan na malang ka thadynpaw kha liathuitua.

²¹Tukeiccuze mih ccaaw hae kha ccakannaw kalan ap hae; minmin kha thaloi rhaw kalan vua hae, mih zu hae tuh ccaawno hoi leite um hae sah lah, nomae lang tang hae sah. mih vawpaw hae tuh shethya keiccu chinaw tung hae sah, mih ccangvae hae tuh rhawtuknaw kya thaloi te chih hae sah.

²²Luadetu hae kha minmin kya vaekheihmawte he na thuakhae hae te, mih inn kya-e siaruanaw kha thae thua sah! Pawccecize minmin nynh kae kha kyng nawlan laekarung thae hae zah, ka ccu kaesahnaw lanpaw kaang kha yn syakhaw vae hae.

²³Tuhzemah, pou BAWIPAW , kae kha chia lan cite a paccynkunaw hae balyn kha phe na ny. Mih hoyleinaw kha ngaethya nan hae, na muihnaw kyate mih seinaw kha zosah nan. Na malang khe khuliakuh hae sah; na thinria lyakhe minmin kha cyih hae.