Read Zotung Chin JEREMIAH 2 Bible Online

JEREMIAH 2 - Zotung Chin bible

JEREMIAH 2

¹BAWIPAW bya tuh ka kya yn thua zah a hopaw tuh,

²Cceih lah, Jerusalem nynh a thaenaw khe siatua: BAWIPAW nynh hynhte a ho: Na ngawphue lya-e na lungzinaw, akaenung liaccanung hawte nae sungsahnaw te paw sanmah accouku leinaw ram, ramkaw kya nae zuipaw kha ka liathui.

³Israel tuh BAWIPAW hanlan thyaa zah, looh a ruepaw kyaze thaety nynh thua. Tuh-e looh a aepaw balyn tuh a sei hae; shethya nynh a thuanua cih hae, cite BAWIPAW nynh a ci.

⁴Pou Jakob ciihan hae te Israel ccaawno hae balyn, BAWIPAW bya kha ngaetua oh.

⁵BAWIPAW nynh hynhte a ho: Nae minpaaw hae tuh ka tungvaw pawcihawpaw seinaw muih hae zahte mou ka kyate asawnaw lang cceih hae zah, ccungkia leipaw nulang khe zuikute accakaepaw lang a tang hae?

⁶Minmin nynh, “Izip ram kyate oun cciakhae thung zah, ramkaw, laesia ram te hunghua alungnaw ram, khuaakannaw ram te marae zipingkuhpaw mohnaw ram, lu kheit nynh sanmah a ccia boi leinaw ram, khuasahtu lu kheit san a um leinaw ram kya oun cciakhaetupaw BAWIPAW kha teimou a um?” cite ho khyh hae.

⁷Ram hoypaw lungkhu te apoupaw athae te uccaw hoypaw kha ae khylan kae teekhae oh. Thuasalama he na tee oh te ka ram kha na thusah oh zah, ka rho kha anungsikuhpaw lang na rae oh.

⁸Ranpibawi hae nynh, “BAWIPAW hynh teimou a um?” cite ho khyh hae. Phungbya a kyng hae paw nynh kae kha yn nyh khyh hae; uktu hae nynh ka tungvaw a sei vae hae; profeh hae nynh Baal min te profehbya ho hae zah, athane leipaw uccaw hae nulang a zuiku hae.

⁹Tukeiccuze nanning kha sei kae be cih oh zah, nae ccaaw hae ccaaw hae kha sei ka be cih hae, cite BAWIPAW nynh a ci.

¹⁰Saipras tuikoih kalan po zua oh lah, dotua oh, Kedar ram lang ccungccaw saw oh lah, akaw-aleih hoyte dosah tua oh. Hynhcihawpaw uccaw hynh acyihkuh boi tou cipaw tuatua oh.

¹¹Minphuin phuin kheit nynh a pachia hae kha pachia a la thua khyh hae zemah a rulae boi zawtou? Thuasalama ka ccungccaw hae nynh tuh mih phu-enaw kha athane leipaw uccaw lang a rulae vae hae.

¹²Pou vaawlui hae, e konglang hynh nae ngaeangthua sah lah, thyngkute siiku tua oh, cite BAWIPAW nynh a ci.

¹³Pawccecize ka ccungccaw hae nynh hoyleinaw phuin ning kha a rae vae hae: hiinnaw tuidy ka thuapaw kae kha yn vua hae zah, tui a ynkuh kho leipaw, azupaw tuikua kha a thaeku vae hae.

¹⁴Israel tuh see tou athua? Aning tuh innvaw a puipaw ryalahtu tou athua? Pawccemou aning kha a kyngde hae?

¹⁵Chindeih hae nynh aning kha sianua hae zah, roi myarya ccae lante a hu a raw hae. A ram kha accakaepaw lang a raepya hae; a khuapi hae tuh roh zah ccungccaw um khyh.

¹⁶Tuhpiaze, Memfis hae te Tahpanhes hae nynh nae lu ae koi vae oh.

¹⁷BAWIPAW nae Pachia nynh ae cciakhae lya oh khe, amaw kha na vua oh keiccuze e hynh naemaw toulou nynh nae tungvaw na thuakhaeku oh paw thua khyh tou?

¹⁸Nal vawkhu e tui kha nia khylan Izip ram lang na ccia oh liate pawmou na mue oh? Tuhkhyhze Zufrates vawkhu e tui nia khylan Assiria lang na ccia oh paw liate pawmou na mue oh?

¹⁹Nae hoyleinaw nynh naemaw kha de ae tah cih oh zah, nae lungzi leinaw nynh nae seinaw kha ae phy cih oh. BAWIPAW nae Pachia na vua oh paw te ka raw nae ri khyh oh paw hynh naemaw hanlan ahoy leipaw te akhahpaw nynh thua cipaw nyh oh lah, muihtua oh, cite Alesaepaw Bawipaw PACHIA nynh a ci.

²⁰Langmawlya na puihnawpaw ccong kha na khya, nang ae khiipaw arui kha na paekuh zah, “Rya kae lawpah vae lan khyh!” na ci. Ahangpaw mua vawlan miakaw te hinlalyhpaw thingku kaw miakaw khe na ih zah na ohhuaku.

²¹Nang kha acii ahoy huapaw kyate lawpaw misu ku ahoy huaccepaw lante kae linku. Tuhzemah pawccemou phe na roh zah, ramkaw e misu ku lang poh na tang?

²²Saepia te na singkuh zah, saepia kha patae na mang zemah na seinaw athupaw tuh ka malang phang a um mamin, cite Bawipaw PACHIA nynh a ci.

²³“Kae tuh ka nungsikuh khyh, Baal nulang ka zuikuh khyh,” cite pawtemou na ho kho? Accya kya-e na laanpi khuh dotua; na cyisahnaw kha nyku tua, rangtareih lan a ccue bungthungpaw kalauh nopi akiakuh leipaw nynh na lo.

²⁴Ramkaw kya kheccungte khiavuikuh zah, sahpaw a ry keiccuze amyn a suethungpaw lann apuapaw nynh na lo! A ry ccyh a thua vae ze, hum nynh mou a khee kho cih? Aning a ccungtu hae nynh thawbangsakute ccung lan ccan khyh; amaw accyh yn zaw te a muih cih hae.

²⁵Na phanah kha paesah nan lah, tui hawsakuh nan. Thuasalama nang nynh tuh, “Ngaehoinaw um khyh, pawccecize ramccang hae pachia kha ka sungsah vae zah, mih nulang ka zuikuh vae cih,” na ci.

²⁶Miruh kha kyng vae ze, a maethya hawte Israel hae tuh mih maethah cih— mimaw, mih siapharan hae, mih bawi hae, mih ranpibawi hae te mih profeh hae tuh mih maethah cih,

²⁷thingku kha, “Nang tuh ka paaw nynh na thua,” cipah hae zah, lung kha, “Nang nynh kae hynh nae saahkuh,” a cipya hae. Kae kha mih nulang yn sangsah hae zah, mih mae kha ka kalan hawi khyh hae. Thuasalama mih vawsaw ccyh lyakhe, “Oun cceih lah, kaening hynh oun khumtua!” a ci hae.

²⁸Na raeku oh paw nae pachia hae tuh teimou a um hae? Nae vawsaw ccyh lya ae khum kho oh ze, oun cceih hae sah. Pou Judah, khua patae na hoi zeihte pachia patae kha na hoi.

²⁹Pawccemou nae bonua oh? Nae balyn mawte nae dou oh, cite BAWIPAW nynh a ci.

³⁰Nae ccaaw hae kha alakaw lan ka zia vae hae; minmin nynh thuiheinaw kha lawkuh khyh hae. A kanmawpaw chindeih hawte, nae thaloi toulou nynh nae profeh hae kha a tei hae.

³¹E she kya-e ccungccaw hae, BAWIPAW bya hynh ngaetua oh! Kae tuh Israel hae hanlan ramkaw khyhze marae mohpaw ram hawte ka thua boi zawtou? Pawccemou ka ccungccaw hae nynh, “Kaening tuh kae lue vae, na kalan kae cceih vae lan khyh,” a ci hae?

³²Liaccanung nynh a ccaankunawpaw kha a ning kho zawtou? Akaenung liaccanung nynh a boeining kha a ning kho zawtou? Tuhzemah ka ccungccaw hae nynh tuh ninsaw riatae lei yn ning vae hae.

³³Na rypaw kha ccung nawlan na paccynkupaw laanpi tuh pawcih baban mou ahoy! Nopi hoyleinung kha heize na laanpi kha phe na ccangpya vae.

³⁴Seinaw a hoi leipaw ryachi hae kya-e hiinnaw chiise kha na boeining dung kya muih athua, tuh-e chiise tuh ae teenua hae zah na kyngbia hae paw chiise thua khyh. Tuhcite e hae balyn hynh mang na cyih pite,

³⁵nang nynh, “Kae tuh a sei leipaw nynh ka thua; Pachia thinrianaw tuh ka tungvaw um ccaccing vae khyh,” na ci. “Ka sei khyh,” na ci keiccuze byapianaw lang atu kae cciakhae cih.

³⁶Na laanpi kha rulaekute pawccemou na khiavuiku? Assiria nynh maethya ae law hawte, Izip nynh mah maethya ae lah cih.

³⁷Na lu vawlan na kuih khangkute Izip ram kyate mah na ki cih; pawccecize na doliakuh hae paw kha BAWIPAW nynh vua vae hae zah, minmin liate na laan na sui ualae lan khyh.