Read Zotung Chin JEREMIAH 20 Bible Online

JEREMIAH 20 - Zotung Chin bible

JEREMIAH 20

¹Jeremiah nynh tuhcite a hopaw kha BAWIPAW inn uktu lupi athuapaw Immer ccapaw ranpibawi Pashhur nynh a thae.

²Tetuh Pashhur nynh Jeremiah kha a zia, te BAWIPAW inn kya-e palung lang e Benjamin Koikua kyakhe khii zah a nung.

³Awkhualan awkhua khe Pashhur nynh Jeremiah kha a khiinaw kyate he a luesah te, Jeremiah nynh aning kha, BAWIPAW nynh nang hynh Pashhur cite min ae phu khyh, “Pawpaw kya balyn ri lan umpaw,” cite min ae phu.

⁴Pawccecize BAWIPAW nynh hynhte a ho: Nang hynh namaw te na ban hae balyn hanlan ri lan umpaw lang kae rae cih; na muihnaw ccaccei khe minmin tuh mih rhaw hae thaloi khate a khuliakuh cih hae. Judah ram balyn hynh Babilon siapharan kuih kalan ka pya cih; aning nynh minmin kha Babilon lang see lang a cciakhae cih hae zah thaloi te a theih cih hae.

⁵E khuapi lungkhu e sisua balyn thuasah, a mue hae paw uccaw balyn thuasah, aphutepaw mih hoirumnaw balyn thuasah, Judah siapharan kya-e sisua balyn thuasah mih rhaw hae kuih kalan ka pya cih hae zah, minmin kha a luade cih hae, a kyng cih hae zah Babilon lang a cciakhae cih hae.

⁶Namaw Pashhur te na inn umpaw balyn tuh ae kyng cih oh zah, Babilon lang na cceih cih oh; namaw te ahme leipaw profehbya na hopya hae paw na ban hae balyn tuh tuin kya na chih cih oh zah, tuin kya maw ae uh cih oh.

⁷Pou BAWIPAW , kae hynh nae soih zah, kae tuh soih ka thua vae; kae laeze na thunghua zah, nae tae vae. Kae hynh anin ninlang nuinsepaw lang yn mang hae; ccungccaw miakaw nynh yn sarya hae.

⁸Bya ka ho takyhte, ka siabia zah, “Puathonaw te ronaw!” cite ka sia cih. Pawccecize BAWIPAW bya tuh ka hanlan anin ninlang theihryaku nawlan te dothatheihku nawlan nynh a tang.

⁹“BAWIPAW kong kha ka ho vae lan khyh, a min te bya ka ho vae lan khyh,” cite ka ci lanze, ka ru kya te ka lungkhu kyakhe aruapaw maee hawte phang a um; ka sungkuh kho khyh zah, ka umkhaekuh kho khyh.

¹⁰Ccungccaw patae nynh byaru a hoku hae paw kha ka thae: “Pawpaw kya balyn rinaw a um! Amaw kha seibe oh! Amaw kha seibe oh sih!” a ciku hae. Kae mungkuh huapaw ka ruiban hae balyn nynh ka thy ka pawkuh lanpaw kha phang yn buh hae zah, “Aning kha soih kho athua vosi, aning kha tae khote, ah liaru kho oh vema,” a ciku hae.

¹¹Thuasalama BAWIPAW tuh ri lan umpaw a rawthungpaw hawte kae kha yn umkhae; tukeiccuze kae yn tuaa yn sahtu hae tuh a thy a pawkuh cih hae zah, taenaw mue lan khyh hae. Mih laan mih sui a ua khyh keiccuze, myarya mih maethah cih. Azo kho leipaw mih thethyanaw tuh papin ning kho um vae lan khyh.

¹²Pou BAWIPAW , miding hae kha na syntawtua hae, thinlung te tuanaw kha na ny; ka byathan kha phe kae ap vae keiccuze minmin tungvaw de na tah hae paw kha beih yn muihsah.

¹³BAWIPAW kalan hlawsah oh; BAWIPAW kha thehoysah oh! Pawccecize anyaa hae paw hiinnaw kha hoyleinaw a rae hae paw kuih kyate a luesah hae.

¹⁴Ka pui nin tuh thyalaw thua sah! Ka nung nynh yn saahku nin tuh hythuanaw ccou nan sah!

¹⁵“Na ccaaw a pui vae, ccapise nynh thua,” cite apang kha hopah zah, myarya a lungtuasahtu pisepaw tuh thyalaw thua sah.

¹⁶Tuh-e pisepaw tuh BAWIPAW nynh ngaethyaumsah leite a vuapaw khuapi hae hawte thua vae sah; aning nynh awkhua takaw khe siaruanaw roi kha thae sah lah, ninthuccynglyn khe raeringnaw pyanawpaw roi kha thae vae sah,

¹⁷pawccecize aning nynh kae kha ka nung vue lungkhu khe yn la theih khyh; yn la chia ze, ka nung tuh ka shawku a la thua cih zah, a vue kyakhe po yn poi cih paw.

¹⁸Thawbangnaw te ngaethyanaw kha teing khylan te maethyanaw te ka hiin ccyh kha liasah khylan pawccemou ka nung vue kyate ka la pui.