Read Zotung Chin JEREMIAH 21 Bible Online

JEREMIAH 21 - Zotung Chin bible

JEREMIAH 21

¹Zedekiah Siapharan nynh Malkhiah ccapaw Pashhur te Maseiah ccapaw ranpibawi Zefaniah kha Jeremiah kalan saw hae zah,

²“Babilon Siapharan Nebukhadnezzar nynh rhaw oun tuk keiccuze aning nynh kaening kyate nulang a ki nawlan, BAWIPAW nynh leih a cyimae hawte, ngaeangnaw kha kaening elang poh oun raepah kho vema; tukeiccuze thawccinaw te kaening ccelang BAWIPAW kha oun khiapya tua,” a cipya lya hae ze, BAWIPAW bya tuh Jeremiah kya yn thua.

³Tetuh Jeremiah nynh minmin kha hopah hae zah:

⁴Nanning nynh Zedekiah kha la hopah oh: BAWIPAW , Israel Pachia nynh hynhte a ho: Khualungrua atolang te nanning ae koihlu oh paw Babilon siapharan te Khaldi hae kha rhaw na tuknaw oh paw te nae kuih kya a umpaw rhaw zunghe hae kha nae tungvaw ka ccawsah cih; khah-e hae kha e khuapi ngaelung langkhe pynkheihlan ka teekhae cih hae.

⁵Kamaw ccaccei nynh athungpaw kuih, dyngpaw kuih te nang kha thinria, bungpaw, thinsote rhaw kae tuk cih.

⁶E khuapi lungkhu a um hae paw ccungccaw te sahiinpaw hae kha ka theih cih hae; myarya ccihpaw shethya te a chih cih hae.

⁷Tukoute shethya, thaloi te ccakan kyate lue hae zah, a hiinhy hae paw Judah Siapharan Zedekiah te a ryalahtu hae te khuapi kya a um hae paw kha Babilon Siapharan Nebukhadnezzar kuih kya, mih rhaw hae kuih kya te minmin chia a ry hae paw kuih kyakhe ka pya cih hae. Aning nynh thaloi te a theih cih hae; minmin tungvaw ngaethyaumsahnaw, thawccinaw hoi leite haang lan khyh hae, cite BAWIPAW nynh a ci.

⁸Te, e ccungccaw hae kya na hopya lan hae paw tuh: BAWIPAW nynh hynhte a ho, Ngae oh, hiinnaw laanpi te chinaw laanpi kha nae malang kae nungpya oh.

⁹E khuapi kya a um hae paw tuh thaloi, ccakan te shethya khate a chih cih hae; thuasalama khuapi atolang toikuh zah, nanning ae koihlu oh paw Khaldi hae kya a pyakuh hae paw tuh a hiin cih hae; rhawtuknaw kyate muepaw lasung hawte mih hiinnaw kha a mue cih hae.

¹⁰BAWIPAW nynh a hopaw tuh: E khua hynh hoynaw hanlan thua leite hoyleinaw hanlan ka mae ka hawinua vae. Babilon siapharan kuih kalan pya athua cih zah, aning nynh maee te a soi cih, a ci.

¹¹Judah siapharan phin kalan hopya tua: BAWIPAW bya hynh ngae oh,

¹²Pou David phin! BAWIPAW nynh hynhte a ho: Nin takyhte byading te byapia oh lah, luadenaw a teingpaw miakaw kha tuaasahtu hae kuih kyate luesah oh, tuhkhyhze tuh, ahoy leipaw nae cyisahnaw keiccuze ka thinrianaw tuh maee hawte athua cih zah arua cih, humhung nynh mah the kho thua lan khyh.

¹³Pou accya kya umpaw, pou bialae kya umpaw lungpi, nang kha kae rawse cih, cite BAWIPAW nynh a ci; nanning nynh, “Hum nynh mou aening kya-e khynnaw hmin kalan oun teenua kho cih? Hum nynh mou aening umnaw lungkhu lang oun teenua kho cih?” na ci oh.

¹⁴Nae cyisahnaw athae thyhte de kae tah cih oh, cite BAWIPAW nynh a ci; nae loram kha maee te ka soi cih zah, a pepan umpaw balyn kha pong a u cih.