Read Zotung Chin JEREMIAH 22 Bible Online

JEREMIAH 22 - Zotung Chin bible

JEREMIAH 22

¹BAWIPAW nynh hynhte a ho: Nang nynh Judah siapharan inn lang la cceih lah, e bya hynh la hopah hae:

²Pou David bawitungkhung kya a haungpaw Judah Siapharan, nang, na ryalahtu hae te e koikua kya a tee hae paw na ccungccaw hae nynh BAWIPAW bya hynh ngaetua oh.

³BAWIPAW nynh hynhte a ho: Byading te dingnaw khate ryalah oh lah, luadenaw a teingpaw kha tuaasahtu hae kuih kyate luesah oh. Te ramccang ccungccaw, ngawraw te nomae hae tungvaw cyihsei nan oh lah, puatho nan oh, e hmin kya seinaw a hoi leipaw chiise kha luasah nan oh.

⁴Pawccecize nanning nynh e bya hynh na zui oh zetuh, David bawitungkhung kya a haung hae paw, marangle te marang hae kha a ccikuh hae paw siapharan hae nynh mimaw, mih ryalahtu hae te mih ccungccaw hae ryte e inn thuakaw hae kya a tee cih hae.

⁵Thuasalama e bya hae hynh pawlang na ria khyh oh zetuh, e inn hynh ccungccaw phe adae cih, cite BAWIPAW nynh kamaw min phyakute bya ka kinku, a ci.

⁶Judah siapharan inn te asekuh lante BAWIPAW nynh hynhte a ho: Nang tuh ka hanlan Gilead hawte na thua zah, Lebanon mua dung hawte nynh na thua; thuasalama laesia ram, ccungccaw a um leinaw khuapi lang kae rae cih, cite bya ka kinku.

⁷Nang kha rawse khylan rohtu hae kha mih zunghe balyn ryte ka paccyn cih hae; ahoy huaccepaw na sidar ku hae kha a nge cih hae zah, maee lungkhu lang a phung cih hae.

⁸Te minphuin patae nynh e khuapi pe a cceih cih hae zah, “BAWIPAW nynh khuh-e myarya lepaw khuapi khuh pawccemou khuhte a cyi?” cite a hokuh cih hae.

⁹“Minmin nynh BAWIPAW mih Pachia byakinnaw kha vua hae zah, ccangpaw pachia hae kha beikte rya a lawpya hae keiccu nynh thua,” cite a khungru cih hae.

¹⁰A chihpaw Josiah Siapharan hanlan ngaethya rawkhuite um nan oh; tuhlaeze ccanglang ccaring a cceihpaw hanlan kha rah oh, pawccecize aning tuh a puinaw ram kha muih khylan kithui vae lan khyh.

¹¹A paaw Josiah rya kha ranoih lah zah, e hmin kyate ccanglang ccaring a cceihpaw, Judah Siapharan Josiah ccapaw Shallum te asekuh lante BAWIPAW nynh hynhte a ho: Shallum tuh e ram lang kithui vae lan khyh,

¹²rhaw hae nynh kyng hae zah a cciakhaenaw hae ram kyakhe a chih cih zah, e ram hynh kharouh muihthui vae lan khyh.

¹³A inn kha dingleinaw te sak zah, a inn avawlan khaan kha atazae leite a saktupaw aning hanlan ngaethya lan kou um; aning nynh a innpaw hae kha alakawte ryalawsah hae zah, mih ryalaw mee pya khyh hae;

¹⁴aning nynh, “Akopaw avawlan khaan a umpaw inn myarya lepaw kha ka sakkuh cih,” ci zah, thanlan-aw kha uasah zah, sidar thing te a rae koute asepaw si kha a thuh.

¹⁵Sidar thing te kou hoy lan na sakku keiccu tou siapharan lang na tang? Na paaw tuh phe byn lan ae zah neih zah byading te dingnaw te rya a lah khaw? Tukeiccuze aning hanlan hoynaw a um.

¹⁶Aning nynh ryachi hae te anyaa hae paw byathan kha hoyte bya a piapya hae; tukeiccuze hoynaw a um. Tuh-e tuh kae yn ny keiccu thua khyh tou? cite BAWIPAW nynh a ci.

¹⁷Thuasalama na mit te na thinlung tuh atazae leite muenaw kya rou khe um zah, seinaw a hoi leipaw chiise luasahnaw, tuaasahkunaw te puathonaw rou kha na tua.

¹⁸Tukeiccuze Judah siapharan Josiah ccapaw Jehoiakim Siapharan te asekuh lante BAWIPAW nynh hynhte a ho: Ccungccaw hae nynh amaw kha, “Ezou, ka upaw! Ezou ka ccianung!” cite rawhui lan khyh hae. Aning hanlan, “Ezou, bawipaw! Ezou, a lesaenaw khalou!” cite rah lan khyh hae.

¹⁹Lann kha a uu hae hawte aning kha a uh cih hae— Jerusalem koikua khunglang a sue cih hae zah a vua cih hae.

²⁰Lebanon langkhe kaethung oh lah, siatua oh, Bashan kyakhe nae roi kha sawtua oh; Abarim kyate siatua oh, pawccecize na ruiban hae balyn tuh ro athua hae.

²¹Na khosah a um lya kae hopya zemah, “Ka ngae lan khyh,” nae cipya. E ozia hynh na di lya mawte na hoipaw thua zah, ka bya na ngae khyh.

²²Nang ae do-oihpaw balyn kha khisan nynh a mung cih hae, na ruiban hae kha a kyng cih hae zah a cciakhae cih hae; tetuh na hoyleinaw balyn keiccuze na maethah cih zah na lungroh cih.

²³Pou Lebanon kya a um hae paw, Sidar ku hae laku kya bu a sakkuh hae paw, nopinung nynh neitangia a teing hawte, ngesaw ccinaw kha he na teing oh te, pawcih baban mou na hawkhaekuh cih oh!

²⁴[2] BAWIPAW nynh a hopaw tuh: Judah siapharan Jehoiakim ccapaw Koniah Siapharan tuh ka ranglang kuih kya-e tazeih kuihpu na thua zemah, kae tuh ka hiin thyhte nang kha thoh kae pae cih zah,

²⁵nang kha chia ae ry hae paw kuih kalan, na ri hae paw kuih kalan, Nebukhadnezzar Siapharan te Khaldi hae kuih kalan kae pya cih hae.

²⁶Nang te na nung kha nae puinaw ram athua leipaw ramccang langkhe kae vua cih oh zah, tuin kya na chih cih oh.

²⁷Minmin nynh kithui a rynaw hae ram lang kithui lan khyh hae.

²⁸E ccungccapaw Koniah hynh a dothatheih hae paw anglohpaekua, humhung nynh mah a ry leipaw uccaw khaw athua? Amaw te a ciihan hae kha minmin nynh a la ny boi lei hae paw ram langkhe pawccemou dee thua hae zah vua athua hae?

²⁹Pou ram, ram, ram, BAWIPAW nynh a hopaw hynh ngaetua!

³⁰BAWIPAW nynh hynhte a ho: E ccungccapaw hynh ccaawno a hoi leipaw cite thuasah, a she lungkhu a laan a sui a ua cih leipaw cite thuasah zeitua; pawccecize a ciihan hae nynh David bawitungkhung kya haung vae lan khyh hae zah, Judah ram hynh ukthui vae lan khyh hae, a ci.