Read Zotung Chin JEREMIAH 25 Bible Online

JEREMIAH 25 - Zotung Chin bible

JEREMIAH 25

¹Josiah ccapaw, Jehoiakim tuh Judah Siapharan lang a tangnaw kum palinaw kum khe Judah hae balyn te asekuh lante Jeremiah kya bya yn thua, (tuh-e tuh Nebukhadnezzar Siapharan nynh Babilon siapharan lang a tangnaw masaty kum nynh thua),

²profeh Jeremiah nynh Judah hae balyn te Jerusalem khuaccaaw hae balyn kalan a hopya hae paw tuh hynhte nynh thua:

³Amon ccapaw Josiah nynh Judah Siapharan lang a tangnaw kum haw lae thumnaw kyate atunin cia, kum kuin lae thum lungkhu, ka kya yn thuapaw BAWIPAW bya kha nae kalan apaekuh lei lan kae hopya oh, thuasalama na ngae khyh oh.

⁴BAWIPAW nynh a ryalahtu profeh hae balyn kha nae kalan apaekuh lei lan ae sawpya oh zemah, na ngae khyh oh, thae khylan nae nakaring mah na tuakuh khyh oh.

⁵Tuh-e profeh hae nynh, “Nanning balyn nynh ahoy leipaw nae laanpi te ahoy leipaw nae cyisahnaw kyate oun maeleihkuh oh lah, BAWIPAW nynh nanning te nae minpaaw hae kalan langmawlya te zungzae hanlan ae pya oh paw ram kyakhe na um cih oh;

⁶ccangpaw pachia hae kha ryalawpya khylan te beik khylan zui nan oh, te nae kuih ryalawnaw khate ka thin yn riasah nan oh. Tuhteze tuh vawsawnaw kae pya lan khyh oh,” cite ae hopya oh.

⁷Thuasalama ka bya na ngae khyh oh, naemaw toulou vawsaw pyaku khylan nae kuih ryalawnaw khate ka thin nae riasah oh, cite BAWIPAW nynh a ci.

⁸Tukeiccuze vaaw BAWIPAW nynh hynhte a ho: Nanning nynh ka bya na ngae khyh oh keiccuze,

⁹thahlang e minphuin hae balyn te ka ryalahtu Babilon Siapharan Nebukhadnezzar kha heize ka sawnua cih hae, te e ram te a lungkhu um hae paw, te a pepan umpaw minphuin hae balyn kha dou khylan ka konua cih hae, minmin kha khaleih ka roh cih hae zah, ri lan a umpaw te saryanaw roi a sawnua hae paw te zungzae a thethahpaw lang ka rae cih hae.

¹⁰Te minmin kyakhe lungtuanaw roi, lungpawnaw roi, zudy ccangvaepaw roi, akaenung liaccanung roi, sungsuhpaw roi te maeekhua awnaw kha ka zosah cih.

¹¹E ram pynpi tuh arohpaw te ccungkia leipaw ram lang a tang cih zah, e minphuin hae balyn nynh Babilon siapharan kha kum sung sari lungkhu rya a lawpah cih hae.

¹²Te kum sung sari accing koute Babilon siapharan te a ram athuapaw Khaldi hae ram kha mih hoyleinaw keiccuze de ka tah cih hae zah, ram tuh zungzae ccungkia leipaw ram lang ka rae cih, cite BAWIPAW nynh a ci.

¹³Babilon ram ka honua vae paw bya balyn, e ccauh kya zeikuhpaw balyn, te Jeremiah nynh e minphuin hae balyn rawsete a honua hae paw kha Babilon ram kya ka ccawsah cih.

¹⁴Minphuin patae te alesaepaw siapharan hae nynh Babilon hae kha see lang a mangru cih hae; mih cyisahnaw te mih kuih ryalawnaw thyhte ka liaru cih hae.

¹⁵BAWIPAW , Israel Pachia nynh kae yn hopyapaw tuh: E thinrianaw misutui banang hynh ka kuih kyate lawtua, te nang kae sawnaw minphuin hae kha niasah hae.

¹⁶Minmin kalan ka sawnua hae paw thaloi keiccuze minmin nynh a neih cih hae zah ruite tangkitangkae lante a cceih cih hae.

¹⁷Tukeiccuze BAWIPAW kuih kyate banang kha ka lah zah, BAWIPAW nynh yn sawnaw minphuin hae balyn kha ka niasah hae:

¹⁸Tuh-e hae tuh: Jerusalem te Judah ram e khua hae, mih siapharan hae te mih bawi hae nynh thua hae; atunin a um hae hawte, minmin kha ccungccaw adaenaw te alakawpaw, saryanaw roi sawnuapaw te thyalawnawpaw lang ka rae cih hae;

¹⁹Izip siapharan Faro, a ryalahtu hae, a kuihkaw e bawi hae te a ccungccaw hae balyn;

²⁰apykuhpaw minphuin hae balyn; Uz ram e siapharan hae balyn; Filistin ram e siapharan hae balyn—Ashkelon, Gaza, Ekron te Ashdod khua kya a laehy hae paw;

²¹Edom, Moab te Ammon hae;

²²Tair siapharan hae, Sidon siapharan hae, rili khunglang e siapharan hae;

²³Dedan, Tema te Buz ram e ccungccaw hae, mih nakalia e sang a ngokuh hae paw balyn;

²⁴Arabia ram e siapharan hae balyn te laesia ram a um hae paw a pykuh hae paw minphuin hae kya-e siapharan hae;

²⁵Zimri siapharan hae balyn, Elam siapharan hae balyn, te Media siapharan hae balyn;

²⁶thahlang e siapharan hae balyn, anaenaw e ry, asawnaw e ryte, lu kheit koute lu kheit, laephi vawlan e peenaw balyn nynh a neih cih hae. Tuh-e hae koute Sheshach siapharan nynh a neih cih.

²⁷Israel Pachia, vaaw BAWIPAW nynh hynhte a ho: Nanning kalan kae sawnua cih oh paw thaloi keiccuze neih oh, rui oh lah luaphukuh oh, khuliakuh oh lah thokuh lae nan vae oh, a ci cite na hopah cih hae.

²⁸Minmin nynh na kuih kya-e banang kha nia lan a mya hae ze, hynhte na hopah cih hae: Vaaw BAWIPAW nynh hynhte a ho: Na neih hahe cih oh!

²⁹Ka min te kopaw khuapi kyakhe shethya kha masaty ka thuasah vae cih zah, nanning nynh detahnaw kha pawtemou na sibia kho cih oh? Detahnaw teing leite na um lan khyh oh, pawccecize laephi vaw e ccungccaw balyn kha rawsete thaloi kha ka ko vae cih, cite vaaw BAWIPAW nynh a ci.

³⁰Tukeiccuze nang nynh profehbya na ho cih zah na thaesah lan hae paw bya tuh: BAWIPAW tuh ahangnaw kyate yn sia cih zah, athyaapaw a umnaw kyate a roi a saw cih; a tuuphu kha thawte a sianua cih zah, misu thae a nontu hae hawte a sia cih; laephi vaw a um hae paw balyn kha a sianua cih hae.

³¹Laephi adianaw cia roi accae cih, pawccecize BAWIPAW tuh minphuin hae kha rawsete ho lanpaw byathan a hoi; ccungccaw balyn kha byapianaw kalan a thuakhae cih hae zah, a sei hae paw kha chia khylan thaloi kalan a ap cih hae, cite BAWIPAW nynh a ci.

³²Vaaw BAWIPAW nynh hynhte a ho: Shethya tuh ram kheit kyate ram kheit kalan a pazaekuh cih, laephi asaw huanaw akin-akae kyate myarya rupaw khise atho cih!

³³Tuin nin kya BAWIPAW nynh a chia hae paw tuh laephi adianaw voikheit langte voikheit lang cia a pazaekuh cih hae. Minmin kha rawhui lan khyh hae, suelua lan khyh hae zah, uu mah uh lan khyh hae; lae vawlan khe ia hawte athua cih hae.

³⁴Pou tuurin hae, rawkhuite siarua oh; pou tuuphu bawi hae, buhhaw kya toukuh oh, pawccecize nanning chianaw ccyh te deenaw ccyh yn thua vae, aphutepaw ang tuh ccah zah a koi hawte na thua cih oh.

³⁵Tuurin hae hanlan ccuenaw hmin um lan khyh, tuuphu bawi hae hanlan luenaw laanpi um lan khyh.

³⁶Tuurin hae siaruanaw roi te tuuphu bawi hae rawkhuinaw tuh ngaetua oh! Pawccecize BAWIPAW nynh minmin a paeekunaw hae ram kha a ropya vae hae,

³⁷BAWIPAW thinrianaw myarya lepaw keiccuze daebabi lan a umnaw hae tuh ro athua vae hae.

³⁸A karung a cciatawpaw chindeih hawte a ccue hae; pawccecize arysawthahpaw thaloi keiccu thuasah, myarya lepaw a thinrianaw keiccu thuasah mih ram tuh ccungccaw adaenaw ram lang a tang vae.