Read Zotung Chin JEREMIAH 26 Bible Online

JEREMIAH 26 - Zotung Chin bible

JEREMIAH 26

¹Josiah ccapaw, Judah Siapharan Jehoiakim nynh ram a uknaw athotakaw lyakhe, BAWIPAW kyate e bya hynh yn thua:

²BAWIPAW nynh hynhte a ho: BAWIPAW beikinn voidu lungkhu khe thadyn lah, BAWIPAW inn kya beik khylan oun thua hae paw Judah ram e khuapi hae balyn kalan khe kaw kae pyapaw bya balyn kha hopah hae; bya kaw kheit sanmah phei nan hae.

³Minmin nynh a ngae cih hae zah, ahoy leipaw mih laanpi kyate poh a maeleihkuh kho hae; te ahoy leipaw mih cyisahnaw keiccuze mih tungvaw thuasah lan ka paccynpaw ronaw kong ka tuanaw kha mah poh a paleihkuh kho vema.

⁴Minmin kha hynhte na hopah cih hae: BAWIPAW nynh hynhte a ho: Nae malang kae nungpya vae oh paw ka kawbya kha zui leite ka bya na ngae khyh oh zah,

⁵nae kalan abyapi lante ka saw hae paw ka ryalahtu profeh hae bya kha pawlang na ria khyh oh zetuh,

⁶e beikinn hynh Shiloh hawte ka cyih cih zah, e khuapi hynh laephi vaw e minphuin balyn hanlan thyalawpaw khua lang ka rae cih.

⁷Jeremiah nynh BAWIPAW beikinn kya a hopaw e bya hae hynh ranpibawi hae, profeh hae te ccungccaw balyn nynh a thae hae.

⁸Te ccungccaw balyn kalan ho lan BAWIPAW nynh kaw a pyapaw bya balyn kha Jeremiah nynh he a ho koute, ranpibawi hae, profeh hae te ccungccaw balyn nynh Jeremiah kha kyng hae zah, “Na chih cih!

⁹Pawccemou BAWIPAW min te profehbya na ho zah, ‘E beikinn hynh Shiloh hawte athua cih, te e khuapi hynh mah ccungccaw a um lei lan ciate phe adae cih,’ na ci?” cite a cipya hae. Ccungccaw balyn nynh BAWIPAW beikinn khe Jeremiah kha a koihlu hae.

¹⁰Tuh-e tuh Judah bawi hae nynh he a thae hae te, siapharan inn kyate BAWIPAW beikinn lang cceih hae zah, BAWIPAW inn e Sakoih Thawpaw teenaw kyakhe a haung hae.

¹¹Tetuh ranpibawi hae te profeh hae nynh bawi hae te ccungccaw hae balyn kyakhe, “Nae nakaring te na thae vae oh hawte, e ccungccapaw nynh e khuapi hynh rawsete profehbya a ho keiccuze chia lan accan,” cite a hopya hae.

¹²Tetuh Jeremiah nynh bawi hae balyn te ccungccaw hae balyn kha hopah hae zah, “E beikinn te e khuapi rawsepaw bya na thae vae oh paw balyn hynh ho khylan yn sawtupaw tuh BAWIPAW nynh thua.

¹³Tukeiccuze atu nae hiinzia te nae cyisahnaw kha paleihkuh oh lah, BAWIPAW nae Pachia bya kha ngae oh, tuhteze tuh nae tungvaw thuasah lan phe a ho vae paw ronaw kong kha a tuanaw a paleihkuh cih.

¹⁴Thuasalama kae tuh nae kuih kya nynh ka um. Ahoy te ahme cite na tua oh hawte kae hynh yn cyih oh.

¹⁵Kae hynh nae chia oh zetuh, naemaw te e khuapi te khuaccaaw hae tungvaw kya a sei leipaw ccungccaw chiise na thuakhae lan oh paw kha ccaerarih lan nykuh oh, pawccecize e bya balyn hynh nae nakaring kya hopya khylan BAWIPAW nynh kae hynh nae kalan yn saw ccaccing,” a cipya hae.

¹⁶Tetuh bawi hae te ccungccaw balyn nynh ranpibawi hae te profeh hae kyakhe, “E ccungccapaw hynh chia lan ccan khyh, pawccecize BAWIPAW ah Pachia min te aening hynh oun hopya,” a cipya hae.

¹⁷Te ram lungkhu e piccan hae abang nynh thadyn hae zah, ccungccaw zapi kyakhe,

¹⁸“Judah Siapharan Hezekiah she lyaze profehbya a hopaw Moresheth khuapaw Mikah nynh Judah hae balyn kha hopah hae zah: ‘Vaaw BAWIPAW nynh hynhte a ho, Zion tuh loo hawte pho athua cih; Jerusalem tuh arohpaw apumkuhpaw lang a tang cih zah, beikinn mua tuh ramkaw lang a tang cih,’ a cipya hae.

¹⁹Judah Siapharan Hezekiah te Judah hae balyn nynh amaw kha a theih hae zawtou? Hezekiah nynh BAWIPAW kha rih zah BAWIPAW thawccinaw kha ngiakuh khyh tou? Minmin tungvaw thuakhae lan phe a ho vae paw ronaw kong kha BAWIPAW nynh a lung bua paleihkuh khyh tou? Aening nynh myarya lepaw ronaw kha ahmaw toulou tungvaw ah thuakhaeku vae cih oh!” a ci hae.

²⁰BAWIPAW min te profehbya a hopaw ccangpaw lu kheit a um ung, aning tuh Kiriath-jearim khuapaw Shemaiah ccapaw Uriah nynh thua. Jeremiah nynh a hopaw bya te sasi alokuh lante, e khuapi te e ram hynh rawsete aning nynh profehbya kha a ho.

²¹Jehoiakim te a rhawkaw hae balyn te bawi hae balyn nynh Uriah bya kha he a thae hae tuh, siapharan nynh amaw kha chia lan a ccung; tuh-e tuh Uriah nynh he a thae tuh, rih zah Izip ram lang a ccue.

²²Tetuh Jehoiakim Siapharan nynh Akbor ccapaw Elnathan te ccungccaw hae kha Izip ram lang a saw hae,

²³te minmin nynh Uriah kha Izip ram kyate Jehoiakim Siapharan kalan a cciakhae hae, aning nynh Uriah kha thaloi te theih zah, a rhua kha ranzae ccungccaw a uunaw hae hmin kyakhe a vua.

²⁴Thuasalama Jeremiah tuh chia khylan ccungccaw hae kuih kalan pya athua khyh nawlan, Shafan ccapaw Ahikam nynh a pankhae.