Read Zotung Chin JEREMIAH 28 Bible Online

JEREMIAH 28 - Zotung Chin bible

JEREMIAH 28

¹Tuh-e kum, Zedekiah nynh Judah Siapharan lang a tangnaw kum palinaw e sawpaw sah pangawnaw khe, Gibeon khuapaw Azzur ccapaw profeh Hananiah nynh BAWIPAW beikinn kya, ranpibawi hae te ccungccaw balyn malang khe kae kha bya yn hopah zah,

²“Israel Pachia, vaaw BAWIPAW nynh hynhte a ho: Babilon siapharan kya-e lua kha ka khya vae.

³Babilon siapharan Nebukhadnezzar nynh e hmin kyate Babilon lang a cciakhaepaw BAWIPAW beikinn e angphe balyn kha e hmin kalan kum ning lungkhu ka kikhae cih.

⁴BAWIPAW nynh a hopaw tuh: Jehoiakim ccapaw, Judah Siapharan Jekoniah te Judah ram kyate Babilon lang a cciakhae hae paw balyn kha e hmin kalan ka kikhae cih hae; pawccecize Babilon siapharan lua kha ka khyapah cih, a ci,” cite a cipya hae.

⁵Tetuh beikinn malang a thadyn hae paw ranpibawi hae te ccungccaw balyn malang khe profeh Jeremiah nynh profeh Hananiah kha hopah zah,

⁶“Amen! BAWIPAW nynh tuhcite cyih vae sah; profehbya na hopaw tuh BAWIPAW nynh ccingsah sah lah, BAWIPAW beikinn e angphe hae te a cciakhae hae paw balyn kha Babilon kyate e hmin kalan kikhae vae hae sah.

⁷Thuasalama nang te ccungccaw balyn kya atu ka hopaw e bya hynh ngaetua.

⁸Nang te kae ah um maw, langmawlya e profeh hae nynh ram patae te myarya lepaw peenaw hae tungvaw rhawtuknaw, ccakanccinaw te shethya yn thua lanpaw kha a la ho hae.

⁹Daenaw a um cih, cite a hopaw profeh kha tuh, a bya he accing te rou khaw, BAWIPAW nynh a saw ccaccingpaw profeh cipaw ny athua cih,” a ci.

¹⁰Tetuh profeh Hananiah nynh profeh Jeremiah nging kya-e lua kha lah zah phe a khya.

¹¹Te Hananiah nynh ccungccaw balyn malang khe ho zah, “BAWIPAW nynh hynhte a ho: E hawhynhte minphuin balyn nging kya sawkuhpaw Babilon siapharan Nebukhadnezzar kya-e lua kha kum ning lungkhu ka khya cih, a ci,” cite a hopya hae. Tetuh profeh Jeremiah tuh po a cceih vae.

¹²Profeh Hananiah nynh profeh Jeremiah nging kya-e lua kha a khya koute sosoh aro te, Jeremiah kya yn thuapaw BAWIPAW bya tuh:

¹³Cceih lah, Hananiah kha hynhte hopya tua, BAWIPAW nynh hynhte a ho: Thing te raepaw lua, na khya vae paw ccelang sivaw te raepaw lua kha ka rae cih!

¹⁴Pawccecize Israel Pachia, vaaw BAWIPAW nynh hynhte a ho: E minphuin balyn nynh Babilon siapharan Nebukhadnezzar kha rya a lawpya nawlan hae, mih nging kya sivaw lua kha ka saw hae zah, solei rya a lawpah vae cih hae; loramsaw hae kha heize amaw ka pya vae, a ci.

¹⁵Te profeh Jeremiah nynh profeh Hananiah kha, “Hananiah, ngaetua, BAWIPAW nynh nang kha ae saw lei pite, e ccungccaw hae hynh hynbya na zynsah hae.

¹⁶Tukeiccuze BAWIPAW nynh hynhte a ho: Nang hynh laephi vawlan te kae vua cih. BAWIPAW kha rawsete dounaw bya na ho keiccuze atu kum lungkhu na chih cih,” a cipya.

¹⁷Tuh-e kum, sawpaw sah sarinaw khe profeh Hananiah tuh a chih.