Read Zotung Chin JEREMIAH 29 Bible Online

JEREMIAH 29 - Zotung Chin bible

JEREMIAH 29

¹Nebukhadnezzar nynh Jerusalem kyate Babilon lang a cciakhae hae paw kya-e piccan hae, ranpibawi hae, profeh hae te ccungccaw balyn kalan khe profeh Jeremiah nynh Jerusalem khua kyate ccaw a ky hae.

²E hynh Jekoniah[4] Siapharan te a nung, siapharan inn e bawi hae, Judah te Jerusalem cciakhaetu hae, mih kuihhae ahoy hae paw te sivawsuhthya hae paw kha Jerusalem kyate a cciakhae kou hae te a zeipaw nynh thua.

³E ccaw hynh Judah siapharan Zedekiah nynh Shafan ccapaw Elasah te Hilkiah ccapaw Gemariah kuih kyate Babilon lang, Babilon siapharan Nebukhadnezzar kalan a kypaw nynh thua. Tuh-e ccaw kya azeikuhpaw tuh:

⁴Israel Pachia, vaaw BAWIPAW nynh Jerusalem kya kyng hae zah Babilon lang a cciakhae hae paw balyn kha hynhte a hopya hae:

⁵Inn sakkuh oh lah, umnah oh; khokhu raekuh oh lah, apoupaw athae kha ae oh.

⁶Zu dykuh oh lah, ccanung ccapaw saahkuh oh; nae ccapaw hae kha zu hoipah oh lah, nae ccanung hae kha vawpaw la hoisah oh; tuhteze tuh minmin nynh ccanung ccapaw a saah cih hae, tuin ram kya pungzae oh lah, zyabung nan oh.

⁷Nanning kae kyngsahnaw oh khuapi hoynaw elang ccung kalang oh lah, khah-e khuapi ccelang BAWIPAW kalan sawsang oh, pawccecize khah-e khuapi kya hoynaw a um liate nanning mah hoynaw na mue cih oh.

⁸BAWIPAW , Israel Pachia nynh hynhte a ho: Nanning laku um hae paw profeh hae te apawepaw hae kha lingsakuh nan oh, minmin nynh maan a sah hae paw kha mah zyn nan oh,

⁹pawccecize minmin nynh ka min te profehbya ae hopya oh paw kha hynbya nynh thua; minmin kha ka saw khyh hae, cite BAWIPAW nynh a ci.

¹⁰BAWIPAW nynh hynhte a ho: Babilon ram kya kum sung sari accingte kyalya nynh nae kalan kae thua cih, te bya ka kinkupaw kha kae ccingsahpah cih oh zah, e hmin kalan kae kikhae cih oh.

¹¹BAWIPAW nynh a hopaw tuh: Nanning hanlan ka hoipaw paccynnaw hynh ccaerarih lan ka ny, tuh-e paccynnaw tuh nanning hanlan vawsawnaw thua leite hoynaw thua zah, ngaehoinaw a umpaw malang ccyh kha pya khylan nynh thua.

¹²Kae kha nae ko oh zah ka kalan cciate saw nae sang oh ze, kae thaepah cih oh.

¹³Nae ccung oh ze nae muih cih oh; nae thinlung balyn te nae ccung oh ze,

¹⁴kae muihsakuh cih oh, cite BAWIPAW nynh a ci. Nanning kha kae kikhae cih oh zah kae deenaw oh ram balyn te hmin takyh kyate kae suelua cih oh, te kae dee oh zah na cciataw oh paw ram langkhe kae kikhae cih oh, cite BAWIPAW nynh a ci.

¹⁵“BAWIPAW nynh aening hanlan Babilon ram kya profeh oun pya vae,” na ci oh keiccuze—

¹⁶David bawitungkhung kya a haungpaw siapharan te thuasah, e khuapi kya a umpaw ccungccaw hae te thuasah, nanning ryte kyng hae zah ramccang lang a cciakhae bua lei hae paw nae puizia hae te thuasah asekuh lante BAWIPAW nynh bya a ho:

¹⁷Vaaw BAWIPAW nynh hynhte a ho: Minmin tungvaw khe thaloi, ccakanccinaw te shethya kha ka thuasah cih zah, ae kho lei lan ciate kharouh ahoy leipaw thaeku athuhpaw hawte ka thuasah cih hae.

¹⁸Minmin kha thaloi te, ccakanccinaw te, shethya te ka deehui cih hae zah, laephi vaw peenaw balyn khe ri lan umpaw lang ka rae cih hae, te ka deenaw hae minphuin balyn laku khe thyalawpaw, ri lan umpaw, nuinsepaw te a sarya hae paw lang ka rae cih hae,

¹⁹pawccecize minmin nynh ka bya kha ngae khyh hae, cite BAWIPAW nynh a ci, ka ryalahtu profeh hae kha apaekuh lei lan ka sawpya hae zemah, ka bya kha pawlangria khyh hae, cite BAWIPAW nynh a ci.

²⁰Thuasalama Jerusalem kyate Babilon lang see lang ka kyngsah hae paw nanning balyn, BAWIPAW bya hynh ngaetua oh:

²¹Ka min te nanning kalan hynhupaw profehbya a ho hae paw Kolaiah ccapaw Ahab te Maaseiah ccapaw Zedekiah konglang te Israel Pachia, vaaw BAWIPAW nynh hynhte a ho: Minmin kha Babilon siapharan Nebukhadnezzar kuih kalan ka ap cih hae zah, aning nynh nae muihnaw kyakhe a theih cih hae.

²²Judah ram kyate kyng hae zah Babilon lang a cciakhae hae paw balyn nynh, “Babilon siapharan nynh maee te a soi hae paw Zedekiah te Ahab hawte BAWIPAW nynh nang kha ae cyih vae sah,” cite minmin konglang kha thyalawkunaw kya a mang cih hae.

²³Pawccecize minmin nynh Israel hae kya hoyleinaw kha rae hae zah, mih innpaw hae zu kha a seikhae vae hae, te kaw ka pya lei hae paw hynbya kha ka min te a ho hae; kae tuh a nyhtu te ccaekia nynh ka thua, cite BAWIPAW nynh a ci.

²⁴Nehelam khuapaw Shemaiah kha hynhte hopya tua:

²⁵Israel Pachia, vaaw BAWIPAW nynh hynhte a ho: Jerusalem khuaccaaw hae, Maaseiah ccapaw ranpibawi Zefaniah te ranpibawi hae balyn kalan khe ka min te ccaw ky hae,

²⁶BAWIPAW amaw ccaccei nynh ranpibawi Jehoiada ccelang nang kha ranpibawi lang ae nung vae, BAWIPAW beikinn kya bawi lepaw lan na tang cih zah, profeh nynh ka thua, a cikuh hae paw mingaee miakaw kha na kyng cih hae zah sivawrui te na khii cih hae.

²⁷Nanning kya profeh rya a lahpaw Anathoth khuapaw Jeremiah kha pawccemou na thuihei khyh?

²⁸Pawccecize aning nynh Babilon kya kae umpaw kalan khe, “Accyh aro cih; inn sakkuh oh lah, umnah oh, khokhu raekuh oh lah, apoupaw athae kha ae oh,” cite ccaw oun ky.

²⁹Tuh-e ccaky tuh ranpibawi Zefaniah nynh profeh Jeremiah a thaenaw khe a ria.

³⁰Tetuh BAWIPAW bya tuh Jeremiah kya yn thua:

³¹Nehelam khuapaw Shemaiah konglang te BAWIPAW nynh hynhte a ho: Shemaiah kha ka saw lei pite, nae kya profehbya ae hopah oh zah, hynbya kha ae zynsah sei oh,

³²tukeiccuze BAWIPAW nynh hynhte a ho: Nehelam khuapaw Shemaiah a ciihan hae kha de ka tah cih hae; aning nynh BAWIPAW kha rawsete dounaw bya a ho keiccuze ka ccungccaw hae hanlan ka raepah cih hae paw hoynaw kha muih man vae lan khyh, cite BAWIPAW nynh a ci.