Read Zotung Chin JEREMIAH 3 Bible Online

JEREMIAH 3 - Zotung Chin bible

JEREMIAH 3

¹Pisepaw nynh a zu kha a mya keiccuze, a zu tuh a vawpaw kyate pou zah, milae zu lang a tang vae ze, tuh-e pisepaw nynh tuh-e nopinung kha zu lang bua a umkhae ung cih tou? Tuhcihawpaw ram tuh myaryamaw nungsikuh lan khyh tou? Nang tuh na rykuh oh paw patae te na ohhuakuh vae; te ka kalan nae ki ung cih tou? cite BAWIPAW nynh a ci.

²Ahangnaw hmin hae khuh dothung tua lah, muihtua! Na ikhae leipaw hmin a um zawtou? Ramkaw e Arab hae hawte, laanpi pe khe na rykuh oh paw kha na ngaw hae. Na ohhuakunaw te na hoyleinaw khate ram kha na thusah vae.

³Tukeiccuze khuaakan zah, hawkhuaa mah rah vae khyh; tuhzemah na terui tuh ohhuanung terui hawte thua zah, maethya na nyh khyh.

⁴Atu hynhte nang nynh kae kha, “Apang, nang tuh ka ngawphue lya mawte ka banpaw nynh na thua—

⁵Pachia tuh zungzae a thinria cih zawtou? Athangnaw cia a thinria cih zawtou?” nae ci. E hynh na ho vae paw nynh thua, thuasalama hoyleinaw balyn kha na rae kho thyhte na rae vae.

⁶Josiah Siapharan she lyaze BAWIPAW nynh kae yn hopyapaw tuh: A lungzi leipaw Israel nynh pawtemou a cyi cipaw na muih vae tou? Ahangpaw mua miakaw kalan kaethungte ohhuakuh zah, hinlalyhpaw thingku kaw miakaw kya a ohhuaku.

⁷“E hae balyn hynh a cyih koute ka kalan yn kithui cih,” cite ka la tua; thuasalama ka kalan yn kithui khyh; tuh-e tuh a lungzi leinung a neitawnung Judah nynh phe a muih.

⁸A lungzi leipaw Israel nynh milae vawpaw kya a seinaw balyn keiccuze myanawpaw ccaw ryte ka cciasahpaw kha Judah nynh phe a muih; tuhzemah a lungzi leinung a neitawnung Judah tuh ri leite cceih zah a ohhuakuh bua.

⁹A ohhuakunaw kha huatawpaw lang a ria keiccuze lung te thing ryte ohhuakute ram kha a thusah.

¹⁰E hae balyn koute mah a lungzi leinung a neitawnung Judah tuh a thinlung balyn te ka kalan ki leite, cyisakunynte nynh yn ki, cite BAWIPAW nynh a ci.

¹¹Te BAWIPAW nynh kae yn hopyapaw tuh: A lungzi leipaw Israel nynh a seinung Judah laeze a seinaw azya huanaw kha a langsaku.

¹²Cceih lah, e bya hynh thahlang khe la siakhae: Pou a lungzi leipaw Israel, yn kithui, cite BAWIPAW nynh a ci. Nang kha thinriate kae do vae lan khyh, pawccecize kae tuh thawccinaw a hoipaw nynh ka thua; zungzae ka thinria lan khyh, cite BAWIPAW nynh a ci.

¹³BAWIPAW na Pachia kha na doupaw na seinaw kha thuasah, hinlalyhpaw thingku kaw miakaw khe ramccang pachia hae kha na sungsah hae zah, ka bya na zui leinaw kyalya kha thuasah phyku tua, cite BAWIPAW nynh a ci.

¹⁴Pou mih lungzi leipaw ccaaw hae, oun kithui oh, cite BAWIPAW nynh a ci, pawccecize kae tuh nae bawi nynh ka thua; khua khuakheit kyate lu kheit, innbyn byn kheit kyate lu ning kae ko cih oh zah, Zion lang kae cciakhae cih oh.

¹⁵Ka lungry yn tungpaw tuurin hae kha kae nungpah cih oh zah, minmin nynh hawnaw te nythyanaw khate ae ccangpah cih oh.

¹⁶Te ram lungkhu kya na pungzae oh zah he na lungthung oh tetuh, minmin nynh BAWIPAW kya-e byakin thingkua kong kha ho vae lan khyh hae. Tuh-e thingkua kha mih thinlung kya um vae lan khyh, liathui leite a ning vae cih hae; ccangpaw kha mah rae vae lan khyh hae, cite BAWIPAW nynh a ci.

¹⁷Tuin ccyh vae tuh Jerusalem kha BAWIPAW bawitungkhung cite a ko cih hae, minphuin balyn tuh Jerusalem kya BAWIPAW malang khe a sueluakuh cih hae zah, ahoy leipaw mimaw rynaw kha lungkhungte zui vae lan khyh hae.

¹⁸Tuin nin vae tuh Judah phin hae te Israel phin hae tuh a pykuh cih hae zah, thahlang ram kyate nae minpaaw hae kalan rho lang ka pya hae paw ram langkhe a cceihkheih cih hae.

¹⁹Nang kha ka ccaaw hae laku kya pawtemou kae nung cih cipaw te ram hoypaw, ram balyn kyaze apuithya huaccepaw rho kha pawtemou kae pya cih cipaw kha ka tua. Te nang nynh kae kha, Apang cite nae ko cih zah, kae nae zuinaw kyate ccanglang na cceihsei lan khyh cite ka tua.

²⁰Thuasalama, pou Israel phin hae, a lungzi leipaw zu nynh a vawpaw kha a cciataw hawte, nanning tuh ka tungvaw nae lungzi vae khyh, cite BAWIPAW nynh a ci.

²¹Israel ccaaw hae nynh ahangnaw hmin vawlan ngaethyate a raw hae paw roi kha thae athua vae, pawccecize mih laanpi kha zuisei hae zah, BAWIPAW mih Pachia kha a ning vae hae:

²²Pou mih lungzi leipaw ccaaw hae, oun kithui oh, nae lungzi leinaw kha kae dansah cih oh. “Kaening nynh na kalan kae cceih vae; pawccecize nang tuh BAWIPAW kae Pachia nynh na thua.

²³Thanccingte sangpyng hae te mua hae vawlan khe hoysah huatawte siarisiarae um tuh accakaepaw nynh thua. Thanccingte Israel khumnaw tuh BAWIPAW ah Pachia kya nynh a um.

²⁴“Ah minpaaw hae nynh a la bangnuathe hae paw mih tuuphu hae te mih vaetua phu hae, mih ccapaw hae te mih ccanung hae kha maethya lan umpaw uccaw nynh aening ah ngawphue lya oh mawte phe a ae kou vae hae.

²⁵Maethyate ih oh sih lah, ah thethyanaw nynh aening kha oun bong sah; pawccecize aening te ah minpaaw hae nynh aening ah ngawphue lya oh te atunin cia BAWIPAW ah Pachia tungvaw ah sei vae oh; BAWIPAW ah Pachia bya kha ah zui khyh oh,” na ci oh.