Read Zotung Chin JEREMIAH 30 Bible Online

JEREMIAH 30 - Zotung Chin bible

JEREMIAH 30

¹Jeremiah kya yn thuapaw BAWIPAW bya:

²BAWIPAW , Israel Pachia nynh hynhte a ho: Nang kae hopyapaw bya balyn hynh ccauh kya zeitua.

³BAWIPAW nynh a hopaw tuh: Ka ccungccaw Israel hae te Judah hae kha hiin hoynaw ka pya hae ccyh tuh yn thua ccaccing cih, mih minpaaw hae ka pya hae paw ram lang ka kikhae cih hae zah, tuh-e ram tuh a ccou cih hae, cite BAWIPAW nynh a ci.

⁴E bya hae hynh BAWIPAW nynh Israel te Judah konglang a hopaw nynh thua:

⁵BAWIPAW nynh hynhte a ho: Siikunaw roi te rinaw roi kha ka thae, daenaw um khyh.

⁶Pise nynh ccaaw a poi kho tou? cite khiatua oh lah, dotua oh. Athua lanze, neitangia ccihpaw nopi hawte, pise miakaw nynh mih tae vawlan mih kuih a khang hae paw kha pawccemou ka muih? Mih balynte mih mae tuh pawccemou dawkadae lan a um hae?

⁷Ezou! Tuh-e nin tuh myarya ri lan um zah, touse ruapaw um khyh; Jakob phin hanlan lungriathae ccyh nynh thua; tuhzemah tuh-e kyate a lue cih hae.

⁸Vaaw BAWIPAW nynh a hopaw tuh: Tuin nin vae tuh, a nging kya-e lua kha ka khyapah cih zah, a khiinaw hae paw arui kha ka paepah cih, ramccang hae nynh ryalawsah vae lan khyh hae.

⁹Minmin nynh BAWIPAW mih Pachia rya te minmin hanlan ka langsakuh cih paw mih siapharan David rya kha a lawpah cih hae.

¹⁰BAWIPAW nynh a hopaw tuh: Ka ryalahtu Jakob, rih nan. Pou Israel, na bungzou nan sah; pawccecize asawnaw langte nang kha kae khum cih zah, na ciihan hae kha minmin a kyngnaw hae ram kyate ka khum cih hae. Jakob tuh a kithui cih zah ngaengan lungdaete a um cih, humhung nynh mah rikawnaw pya vae lan khyh.

¹¹Pawccecize BAWIPAW nynh a hopaw tuh: Nang kha khum khylan kae umkhae cih; phiariphiarae kae nungnaw oh ram balyn kha ka thangsah cih hae, thuasalama nang tuh kae thangsah lan khyh; detah leite papin kae nung lan khyh, accan thyhte kae thuihei cih.

¹²BAWIPAW nynh hynhte a ho: Na vaemaw tuh hoy kho vae lan khyh, na teingpaw vaemaw tuh myarya accih.

¹³Nang ae do-oih lanpaw lu kheit san um khyh, na vaemaw hanlan sii um khyh, na hanlan dannaw um khyh.

¹⁴Nang ae sungsah hae paw balyn nynh ae ning vae hae; nang kha pawlang ae ria vae khyh hae; rhaw hae kha thong hawte, nang kha kae thong vae, na cyiseinaw myarya le zah, na seinaw tuh myarya alung keiccuze, thawcci leite de kae tah vae.

¹⁵Pawccemou na vaemaw keiccuze na raw? Na vaemaw tuh hoy kho vae lan khyh. Na cyiseinaw tuh myarya le zah, na seinaw tuh myarya alung keiccuze e uccaw hae hynh na tungvaw ka cyi hae.

¹⁶Tukeiccuze nang ae laang hae paw kha laangru athua cih hae zah, na rhaw hae balyn tuh kyng athua cih hae; nang ae luade hae paw tuh luade athua cih hae zah, nang ae tei hae paw kha ka teisahru cih hae.

¹⁷Na rhaw hae nynh nang kha vua athuapaw ccungccaw ae ci hae, “Humhung nynh mah pawlang a ria leipaw Zion!” cite ae ci vae hae keiccuze ngedannaw kae pyathui cih zah, na vaemaw kha kae dansah cih, cite BAWIPAW nynh a ci.

¹⁸BAWIPAW nynh hynhte a ho: Jakob ciihan hae kha ka kikhae cih hae zah, mih umnaw kha ngaethya ka ungsah cih; khuapi kha a sangpyng vawlan khe raethui athua cih zah, khualungrua tuh a ummaenaw khe a umthui cih.

¹⁹Minmin nynh thehoysahnaw roi te lungpawnaw roi kha a saw cih hae. Minmin kha ka pungzaesah cih hae zah, zya lan khyh hae; sawtuanaw ka ccousah cih hae zah, dothatheihpaw thua lan khyh hae.

²⁰Mih ccaaw hae tuh langmawlya hawte athua cih hae zah, ccungccaw zapi hae tuh ka malang tynsah athua cih hae; minmin a tuaa a sahtu hae balyn kha de ka tah cih hae.

²¹Mih bawipaw tuh mimaw minphuin lungkhu e athua cih zah, mih uktu bawi tuh mimaw laku kyate yn langkuh cih; tuh-e bawi tuh ka kalan ka naesakuh cih zah yn naekuh cih, tuhkhyhze hum nynh mou ka kalan a naekuh ngan cih? cite BAWIPAW nynh a ci.

²²Te nanning tuh ka ccungccaw hae na thua cih oh zah, kae tuh nae Pachia ka thua cih.

²³BAWIPAW khise khuh dotua! Thinrianaw tuh apou, athawsaepaw khiccung thua zah, ccungccaw hoylei hae paw mih lu vawlan khe thawte a khia cih.

²⁴BAWIPAW nynh a tuapaw a paccynnaw kha a ccingsah mawlaezung a thinrianaw tuh dae lan khyh. Nyalang ccyh kya nanning nynh e hynh nae thaethya cih oh.