Read Zotung Chin JEREMIAH 31 Bible Online

JEREMIAH 31 - Zotung Chin bible

JEREMIAH 31

¹BAWIPAW nynh a hopaw tuh: Tuin ccyh vae ze, kae tuh Israel phin hae balyn Pachia ka thua cih zah, minmin tuh ka ccungccaw athua cih hae.

²BAWIPAW nynh hynhte a ho: Thaloi kyate a lue hae paw nynh laesia ram kya thawccinaw a mue hae; Israel nynh haeungnaw he a ccung te,

³BAWIPAW tuh asawnaw kyate amaw kalan yn langkuh. Nang kha zungzae tynpaw sungsahnaw te kae sungsah; tukeiccuze na tungvaw ka lungzi zungzae.

⁴Pou liaccady Israel! Nang kha bua kae thadynsah thui cih. Na tyng kha na lawkuh thui cih zah, lungtuate na lawthui cih.

⁵Samaria mua vawlan khe misu khokhu kha na raekuh thui cih; misu khokhu a raetu hae nynh misu ku a lin cih hae zah, athae kha a ae cih hae.

⁶Efraim mua vawlan e rhawvia hae nynh, “Rang oh lah, Zion mua lang, BAWIPAW ah Pachia kalan cceih oh sih,” cite a ci hae ccyh yn thua cih, a ci.

⁷BAWIPAW nynh hynhte a ho: Jakob hanlan lungtuate thawte hlawsah oh, minphuin hae lakuze lupi athuapaw hanlan thawte sia oh; “Pou BAWIPAW , na ccungccaw hae, a laehypaw Israel hae hynh beih khum hae,” cite thaesah oh lah, thehoysah oh.

⁸Minmin kha thahlang ram kyate ka cciakhae cih hae zah, laephi asaw huaccenaw kyate ka suelua cih hae, mitmoh hae te ccukhou hae, ccaawpoi hae paw te neitangia ccih hae paw mah minmin kya a umbua cih hae; myarya lungpawte zapi hae tuh a ki cih hae.

⁹Rawkhuite a kithui cih hae, lungtangnaw pyate ka kikhae cih hae, vawkhu kin, thypawku a um leinaw laanpi alawpaw kya ka cciasah cih hae; pawccecize kae tuh Israel hanlan paaw ka thua vae zah, Efraim tuh ka ccatawccaw nynh thua.

¹⁰Pou minphuin hae, BAWIPAW bya kha ngae oh lah, asawnaw rili khunglang e ram hae kyakhe phytua oh; “Israel kha phiariphiarae a nungtupaw nynh bua a sueluathui cih, tuurinpaw nynh tuuphu kha a do-oih hawte a do-oih cih,” cite ho oh.

¹¹Pawccecize BAWIPAW nynh Jakob kha a shawkhaw vae, amaw laeze myaryamaw athung huapaw kuih kyate a khum vae.

¹²Minmin nynh oun cceih cih hae zah, Zion mua dung khe thawte hlaw a sah cih hae, BAWIPAW nynh a pya hae paw hoynaw, ccathae, misutui, chitui, tuuphu te vaetua phu kya-e ataw hae khate mih lungrythuakhaekuh cih; mih hiinnaw tuh tui abukuhpaw khokhu hawte athua cih zah, papin zo vae lan khyh hae.

¹³Tetuh liaccaw hae tuh lungtuate a law cih hae zah, ccangvae hae te ataw vae hae paw tuh mih lungpaw cih. Mih rawnaw kha lungtuanaw lang ka paleih cih zah, lungtangnaw ka pya cih hae, ngaethyanaw hanlan lungtuanaw kha ka pya cih hae.

¹⁴Ranpibawi hae kha thobaleih lan ka nung cih hae zah, ka ccungccaw hae tuh ka hoynaw khate mih lungryachikhaekuh cih, cite BAWIPAW nynh a ci.

¹⁵BAWIPAW nynh hynhte a ho: Ramah khua kya rawkhuinaw te cciteccih lan rawnaw roi kha thae athua. Rachel tuh a ccaaw hae hanlan rawkhuite a um; a um lei vae hae paw a ccaaw hae keiccuze soihbiaku ry vae khyh.

¹⁶BAWIPAW nynh hynhte a ho: Na rawpaw hynh ngae ccavae lah, na mitphi lua nan vae sah; pawccecize na ryalaw mee lasung a um, minmin tuh rhaw hae ram kyate a ki cih hae;

¹⁷na malang ccyh hanlan ngaehoinaw a um, na ccaaw hae tuh mih ram lang a ki cih hae, cite BAWIPAW nynh a ci.

¹⁸Efraim nynh yn ngianawpaw bya ka thaepaw tuh: “Kae tuh akiakuh leipaw vaetuataw te nynh kae loku; kae kha nae thuihei zah, nae thuiheinaw kha ka lawku vae. Kae hynh beih yn kikhae, beih yn kisah, pawccecize nang tuh BAWIPAW ka Pachia nynh na thua.

¹⁹Ccanglang ka cceihsei koute ka ngaesikuh vae; kae hynh akaw-aleih phe nae muih koute, ka phae kha ka tukuh; ka di lya thethyanaw ka mue keiccuze, ka maethah zah, ka lungroh,” a ci.

²⁰Efraim tuh ka sungsahpaw ka ccapaw athua tou? Ka lungrythuapaw ccaaw athua tou? Amaw konglang ka ho takyh vae ze palei ka liathui ung. Tukeiccuze ka thinlung nynh ngae ccaccing zah, a tungvaw thawccinaw ka hoi ccaccing cih, cite BAWIPAW nynh a ci.

²¹Laanpi kya syntawnawpaw hae kha bingkuh lah, nynawpaw tung hae kha bingkuh; na ccianawpaw laanpi kha hoyte tua. Pou liaccady Israel, ki ccavae, na khuapi hae kalan ki ccavae.

²²Pou alungzi leipaw ccanung, hohseciamou rarymamaw na um ung cih? BAWIPAW nynh laephi vawlan uccaw thawpaw kha a rae vae: nopi tuh pise hawte nynh thua.

²³Israel Pachia, vaaw BAWIPAW nynh hynhte a ho: Minmin kha he ka kikhae hae te, Judah ram kya te a khuapi hae kyakhe, “Pou dingnaw a umnaw hmin, pou athyaapaw mua, BAWIPAW nynh hythua ae pya!” cikuhpaw bya hynh vaekheit bua a ho cih hae.

²⁴Tuin kyakhe Judah ram te a khua hae balyn, loopho hae te mih tuuphu hae ryte a khiavuikuh hae paw ccungccaw hae tuh a umkheih cih hae.

²⁵Thawbang hae paw kha mih vue ka sosah cih hae zah, thawthang hae paw balyn kha thawzung ka pyathui cih hae, a ci.

²⁶Tetuh ka thokuh zah ka do, ka i liate ka thawzung atoihthui.

²⁷BAWIPAW nynh a hopaw tuh: Judah ram te Israel ram kya ccungccaw ciihan te sahiin ciihan ka saw ccyh tuh solei yn thua cih.

²⁸Minmin kha poh khaeete khya khylan, vua khylan, ro khylan te hoyleinaw thuakhaepya khylan phang ka la rin hae hawte, minmin kha lin khylan te sak khylan phang ka rin cih hae, cite BAWIPAW nynh a ci.

²⁹Tuin nin vae tuh minmin nynh, “Nungpaaw hae nynh ariapaw misu thae kha ae hae zah, ccaaw hae mih hawzaw,” cite ho vae lan khyh hae.

³⁰Ccungccaw balyn tuh mimaw seinaw keiccuze a chih cih hae; ariapaw misu thae a aepaw miakaw tuh a haw azaw cih.

³¹BAWIPAW nynh a hopaw tuh: Israel phin te Judah phin hae ryte byakinnaw thawpaw kae rae ccyh tuh solei yn thua cih.

³²Tuh-e tuh mih minpaaw hae kha Izip ram kyate mih kuih te suete ka poukhae lya hae ze, ka raepaw byakinnaw te lokuh lan khyh. Mih vawpaw hawte ka la thua zemah, minmin nynh tuh-e byakinnaw kha a ro hae, cite BAWIPAW nynh a ci.

³³Tuh-e nin hae koute Israel phin kya ka rae lanpaw byakinnaw tuh hynhte nynh athua: Ka phunglang kha mih lungkhu kya ka nung cih zah, mih thinlung kya ka zei cih; te kae tuh mih Pachia ka thua cih zah, minmin tuh ka ccungccaw hae athua cih hae.

³⁴Minmin nynh, “BAWIPAW kha nytua,” cite lu kheit te lu kheit ccangpyakute hopakuh vae lan khyh hae, pawccecize adih huaccepaw kyate ale huaccepaw kyacia mih balynte kae kha yn nyh vae cih hae; mih hoyleinaw kha ka ngaethya cih hae zah, mih seinaw kha ka liathui vae lan khyh, cite BAWIPAW nynh a ci.

³⁵Ninthu awnaw hanlan khuanin kha umsah zah, khuazi awnaw hanlan sawpaw te awsi hae kha ccynmamyh lan a synriatupaw, rili tuileih accae ccaw cite rili tui a thesakuhtupaw, a min vaaw BAWIPAW acihkuhpaw BAWIPAW nynh hynhte a ho:

³⁶E ka synria hae paw hynh ka malang te azo hae zetuh, Israel ciihan mah minphuin phuin kheit athuanaw kha ka malang te zungzae azo cih, cite BAWIPAW nynh a ci.

³⁷BAWIPAW nynh hynhte a ho: Luki lang e vaawlui kha tou kho thua zah, akaw lang e laephi athonaw aleihpaw kha akaw-aleih nythya kho athua zetuh, Israel ciihan balyn kha mih cyisahnaw balyn keiccuze ka vua cih hae, cite BAWIPAW nynh a ci.

³⁸BAWIPAW nynh a hopaw tuh: Hananel innhangpaw kyate Apaki Koikua kyacia BAWIPAW elang khuapi tuh raethui athua ccyh tuh yn thua ccaccing cih.

³⁹A ramri tuh niccaw lang e Gareb sangpyng cia lawbabin lan athua cih, te a maeleihkuh cih zah Goah cia athua cih.

⁴⁰Michi rhua te buhhaw a vuanaw hae accya balyn, te Kidron Vaw kyacia a umpaw loo balyn, nithua lang e Marang Koikua apaki cia BAWIPAW hanlan thyaasah athua cih. Khuapi tuh papinmaw ro thua vae lan khyh zah, vua thua vae lan khyh.