Read Zotung Chin JEREMIAH 32 Bible Online

JEREMIAH 32 - Zotung Chin bible

JEREMIAH 32

¹Nebukhadnezzar nynh siapharan lang a tangnaw kum haw lae taryanaw, Zedekiah Siapharan nynh Judah siapharan lang a tangnaw kum hawnaw khe BAWIPAW bya tuh Jeremiah kya a thua.

²Tuh lya tuh Babilon siapharan a rhawkaw hae nynh Jerusalem kha a koihlu hae, profeh Jeremiah tuh Judah siapharan inn rhawviatu hae inn voidu lungkhu khe thong a ccaw lya nynh thua,

³tuin kyakhe Judah Siapharan Zedekiah nynh Jeremiah kha thong a saw. Zedekiah nynh Jeremiah kha, “BAWIPAW nynh, ‘E khuapi hynh Babilon siapharan kuih kalan ka pya cih zah, a lah cih;

⁴Judah Siapharan Zedekiah tuh Khaldi hae kuih kyate lue lan khyh, Babilon siapharan kuih kalan pya athua ccaccing cih, aning te a muihkuh cih hae zah mitmae hawiliakute bya a hokuh cih hae;

⁵Zedekiah kha Babilon lang a cciakhae cih zah, a tungvaw rya ka law mawlaezung tuin kyakhe a um cih, cite BAWIPAW nynh a ci; Khaldi hae kha na dou hae zemah na tae lan khyh hae,’ a ci, cite pawccemou profehbya na ho?” a cipya.

⁶Jeremiah nynh, “Ka kya yn thuapaw BAWIPAW bya nynh:

⁷‘Na paaw neitawpaw Shallum ccapaw Hanamel tuh na kalan yn thua cih zah, “Anathoth kya umpaw ka loo tuh nang nynh yn re, pawccecize nang nynh shawkhawnaw kaw na hoi,” cite ae hopah cih,’ yn cipya,” a ci.

⁸BAWIPAW bya thyhte ka neitaw lanpaw Hanamel tuh rhawviatu hae voidu lungkhu lang, ka kya yn thua zah kae kha, “Benjamin ram Anathoth khua e ka loo kha yn re, pawccecize nang tuh khah-e loo hoinaw kaw te shawkhawnaw kaw na hoi; namaw hanlan rekuh,” yn cipya. Tetuh e bya hynh BAWIPAW bya nynh thua cipaw ka ny.

⁹Anathoth khua umpaw ka neitaw lanpaw Hanamel loo tuh ka re zah, loo mee ngunphua shekel haw lae sari kha ka toupya.

¹⁰Nawccawnawpaw min ka thuh zah tazeih ka khia, ccaekia hae kha ka ko hae zah phua kha zawccu te ka khinpya.

¹¹Te aphung thyhte zeikuh zah tazeih khiakuhpaw rekunawpaw ccaw te ccabawng leipaw khawpipaw ccaw kha ka law;

¹²te rekunawpaw ccaw tuh ka neitaw lanpaw Hanamel malang, rekunawpaw ccaw kya minthuh hae paw ccaekia hae malang, rhawviatu hae voidu lungkhu a haung hae paw Judah hae balyn malang khe Mahseiah ccapaw Neriah a ccapaw Baruk kalan khe ka pya.

¹³Mih balyn malang khe Baruk kha,

¹⁴Israel Pachia vaaw BAWIPAW nynh a hopaw tuh: E rekunawpaw tazeih khiakuhpaw ccaw te ccabawng leipaw khawpipaw ccaw hynh lah lah, khaw cia atyn nawlan, laephi ang lungkhu khe nungtua.

¹⁵Pawccecize Israel Pachia, vaaw BAWIPAW nynh a hopaw tuh: E ram lungkhu e inn hae, loo hae te misu khokhu hae hynh rethui athua cih, a ci cite ka hopya.

¹⁶Loo rekunawpaw ccaw kha Neriah ccapaw Baruk kalan ka pya koute, BAWIPAW kalan saw ka sangpaw tuh:

¹⁷Pou Bawipaw PACHIA, alesaepaw na huhan te na dyngpaw na kuih khate vaaw te lae hynh na rae! Na hanlan myaryamaw arupaw pawpaw mah um khyh.

¹⁸Atynpaw na sungsahnaw kha ccungccaw athong patae kya na langsaku, thuasalama paaw hae seinaw kha nyalang a um hae paw ccaaw hae tungvaw na liaru hae, alesaepaw te athungpaw Pachia na thua zah, na min tuh vaaw BAWIPAW na cikuh,

¹⁹alesaepaw tuanaw na hoi zah ngaeangthua lan umpaw uccaw kha na rae; na mit nynh ccungccaw hae laanpi balyn kha pong a muih; mih ccianaw laanpi thyhte, mih cyisahnaw athae thyhte amee na pya hae.

²⁰Izip ram lungkhu muihsahnaw hae te ngaeangnaw hae kha na langsakuh zah, Israel ram kya te ccungccaw balyn kyakhe atunin cia palei na langsaku ung, tukeiccuze atunin cia mah po atynpaw min kha na raeku vae.

²¹Muihsahnaw hae te ngaeangnaw hae te thuasah, na dyngpaw na kuih athungpaw te thuasah, alesaepaw ri lan umpaw uccaw khate thuasah Izip ram kyate na ccungccaw hae kha na cciakhae hae;

²²kae pya cih oh cite mih minpaaw hae kya bya na kinpyaku hae paw ram, mateitui te khoilutui aluanaw e ram hynh na pya hae;

²³minmin nynh e ram hynh teenua hae zah a lawku hae. Thuasalama na bya ngae khyh hae, na kawbya kha zui khyh hae, cyi lan kaw na pya hae paw balyn kha ccangkheit san cyih khyh hae. Tukeiccuze e shethya thuanaw balyn hynh mih tungvaw na ccawsah vae.

²⁴Khuapi kha law khylan laephi thae hae zah, po voilu lan adoh lante a pumnua vae hae, khuapi tuh thaloi rhaw, ccakanccinaw te shethya kha tung zah, khuapi kha rhaw a tuk cciamang hae paw Khaldi hae kuih kya pya athua vae. Na hopaw bya acyikupaw hynh phe na muih vae.

²⁵Pou Bawipaw PACHIA, khuapi kha Khaldi hae kuih kalan pya athua vae zemah, “Ccaekia hae kha ko hae lah, loo kha re,” nae cipya vae, a ci.

²⁶Jeremiah kya yn thuapaw BAWIPAW bya tuh:

²⁷Dotua, kae tuh BAWIPAW ka thua zah, ccungccaw balyn Pachia nynh ka thua; ka hanlan myaryamaw arupaw paw sanmah a um zawtou?

²⁸Tukeiccuze BAWIPAW nynh a hopaw tuh: E khuapi hynh Khaldi hae kuih kalan te Babilon Siapharan Nebukhadnezzar kuih kalan ka pya cih zah, aning nynh a lawkuh cih.

²⁹E khuapi a tuk cih hae paw Khaldi hae tuh oun thua cih hae zah, e khuapi hynh maee te a soi cih hae; ka thinriasah khylan Baal pachia elang innccukaly kya silawnaw a raenaw hae inn hae te ccangpaw pachia hae kalan niapaw silawnaw a raenaw hae inn hae kha mah maee te a soi cih hae.

³⁰Pawccecize Israel hae te Judah hae nynh mih di lya mawte ka malang khe ahoy leipaw kyalya kha a cyi hae; Israel hae nynh mih kuih ryalawnaw khate ka thinrianaw rou kha a rae hae, cite BAWIPAW nynh a ci.

³¹E khuapi hynh nynh rae takaw lyate atu cia, ka thin yn riasah zah ka bung yn pawsah, tukeiccuze ka muihnaw kyate ccaring ka nue cih,

³²pawccecize Israel hae te Judah hae mih siapharan hae, mih bawi hae, mih ranpibawi hae te mih profeh hae, Judah ram e ccungccaw hae te Jerusalem khuaccaaw hae nynh hoyleinaw balyn kha rae hae zah ka thin yn riasah hae.

³³Minmin nynh mih malang sangsah leite mih nulang yn sangsah hae; apaekuh lei lan ka hopya hae zemah, ka bya ngae leite thuiheinaw kha lawkuh khyh hae.

³⁴Ka min a umnaw beikinn kyakhe anungsikuhpaw mih uccaw hae kha nung hae zah a thusah hae.

³⁵Mih ccanung hae te mih ccapaw hae kha Molek pachia kalan pya khylan Hinnom ccapaw kya-e accya kyakhe Baal pachia hanlan ahangpaw kha a raepya hae; kaw ka pya lei hae pite Judah kha seinaw raesah khylan, hynhcih anungsikuhpaw uccaw oun rae cih hae cipaw hynh ka thinlung kya mah thungkuh boi khyh.

³⁶Tukeiccuze, “Thaloi rhaw, ccakanccinaw te shethya thuasahte Babilon siapharan kuih kalan pya athua cih,” na ci oh paw e khuapi konglangte BAWIPAW , Israel Pachia nynh hynhte a ho:

³⁷Ka thinriate ka bungpaw zah myaryamaw ka thin-u keiccuze ka la deenaw hae ram balyn kyate minmin kha bua ka suelua cih hae; e hmin kalan ka kikhae cih hae zah, khyndadyh lan ka umsah cih hae.

³⁸Minmin tuh ka ccungccaw hae athua cih hae zah, kae tuh mih Pachia ka thua cih.

³⁹Mimaw hoynaw hanlan te minmin nukhu e mih ccaaw hae hoynaw hanlan, kae kha zungzae yn rithya nawlan hae, lunglokunaw te laanpi ccangkheit zuinaw kha ka pya cih hae.

⁴⁰Minmin hanlan hoynaw raepyapaw kha papin ka umtaw khyh nawlan, minmin kya zungzae tynpaw byakinnaw kha ka rae cih; ka kyate a maeku khyh nawlan hae, kamaw rawrinaw kha mih thinlung kya ka sang cih.

⁴¹Minmin hanlan hoynaw raepyanaw kyakhe ka lungtuakhaekuh cih zah, minmin kha e ram kya ka thinlung balynte, ka tuanaw balynte, lungzite ka umsah cih hae.

⁴²BAWIPAW nynh hynhte a ho: E myarya lepaw ronaw balyn hynh e ccungccaw hae tungvaw ka thuasah vae hawte, atu bya ka kinpyaku hae paw hiin hoynaw balyn hynh mih tungvaw ka thuasah cih.

⁴³E ram hynh ccungccaw te sarangpaw um leite, daetedaenaw ram thua zah, Khaldi hae kuih kalan pya athua vae, cite na hopaw e ram lungkhu hin loo hae kha zuaku rekunaw a umthui cih.

⁴⁴Benjamin ram kya thuasah, Jerusalem pepan kya thuasah, Judah ram e khuapi hae kya thuasah, mua vaw e khua hae, niccaw lang e khua hae te alia lang e khua hae kya thuasah loo hae kha phua te reku athua cih zah, zuanaw rekunawpaw ccaw hae tuh minthuh, tazeihkhia te ccaekia kokunaw kha a umthui cih; pawccecize mih hiinnaw kha langmaw hawte ka thuasah thui cih, cite BAWIPAW nynh a ci.