Read Zotung Chin JEREMIAH 35 Bible Online

JEREMIAH 35 - Zotung Chin bible

JEREMIAH 35

¹Josiah ccapaw Jehoiakim nynh Judah Siapharan lang a tang lyaze Jeremiah kya yn thuapaw BAWIPAW bya tuh:

²Rekhab hae inn lang cciate, minmin kha byabeih hae lah, BAWIPAW inn akhaan khaan kheit lungkhu lang teekhae hae; te nia lanpaw misutui kha pya hae.

³Tukeiccuze Habazziniah ccapaw Jeremiah a ccapaw Jaazaniah te a uno hae te a ccapaw hae balyn, te Rekhab phin hae balyn kha ka cciakhae hae.

⁴Minmin kha BAWIPAW inn lungkhu, Pachia ccungccaw Igdaliah ccapaw Hanan a ccapaw khaan lungkhu lang ka teekhae hae; tuh-e khaan tuh beikinn teenaw kya a ngawtu Shallum ccapaw Maaseiah khaan luki, bawi hae khaan pe khe nynh a um.

⁵Te Rekhab hae malang khe misutui phe beihpaw ang hae te banang hae kha ka nung zah, “Misutui hynh neih oh,” ka cipya hae.

⁶Thuasalama minmin nynh, “Misutui tuh kae neih lan khyh, pawccecize kae minpaaw Rekhab ccapaw Jonadab nynh kaw oun pya zah, ‘Nanning nynh thuasah, nae ccaaw hae nynh thuasah misutui hynh kharouh na neih lan khyh oh;

⁷inn na sak lan khyh oh, ccacii na tu lan khyh oh, misu khokhu mah na rae lan khyh oh, e hae hynh ccangkheit sanmah na cyih lan khyh oh; na umnaw oh ram kyakhe khaw cia na um kho nawlan oh, nae she lungkhu balyn buu khate na um cih oh,’ oun cipya.

⁸Kae minpaaw Rekhab ccapaw Jonadab nynh kaw oun pyapaw balyn kha kae zui zah, kae she lungkhu kaemaw, kae zu hae, kae ccapaw hae te kae ccanung hae nynh misutui kha kae neih khyh,

⁹umnawpaw inn kha kae sakkuh khyh. Misu khokhu te loo mah kae hoi khyh, ccacii mah kae tu khyh;

¹⁰bu kya kae um zah, kae minpaaw Jonadab nynh kaw oun pyapaw balyn kha kae zui zah kae cyi.

¹¹Thuasalama Babilon Siapharan Nebukhadnezzar nynh e ram hynh he yn dou tuh, ‘Rang oh, Jerusalem lang cceih oh sih, pawccecize Khaldi rhawkaw hae te Aramean rhawkaw hae raw kha ri lan a um,’ kae ci. Tukeiccu nynh Jerusalem kyahin kae um,” a cipya hae.

¹²Tetuh BAWIPAW bya tuh Jeremiah kya yn thua zah,

¹³Israel Pachia, vaaw BAWIPAW nynh hynhte a ho: Cceih lah, Judah hae te Jerusalem um hae paw kha hynhte hopah hae, “BAWIPAW nynh, ‘Pawccemou ka ccangpyanaw hynh ngae leite ka bya hynh na zui khyh oh?’ a ci.

¹⁴Rekhab Jonadab nynh a ciihan hae kha misutui nia lei lante kawpya hae zah, minmin nynh atunin cia neih khyh hae, pawccecize mih minpaaw kaw kha a ngae hae. Thuasalama kae nynh nanning kha apaekuh lei lan kae hopya vae oh zemah na zui khyh oh.

¹⁵Ka ryalahtu profeh hae balyn kha nae kalan apaekuh lei lan ka saw hae zah, ‘Ahoy leipaw nae hiinzia kyate paleihkuh oh lah, nae cyisahnaw kha raekuh thui oh, ccangpaw pachia hae kha beik khylan mih nulang zuikuh nan oh, tuhteze nynh nanning te nae minpaaw hae kae pya oh paw ram kya na um cih oh,’ cite kae hopya oh. Thuasalama nae nakaring na tuakuh khyh oh zah, ka bya na ngae khyh oh.

¹⁶Rekhab ccapaw Jonadab ciihan hae nynh tuh mih minpaaw kaw kha ngae hae zah a zui hae, thuasalama e ccungccaw hae nynh ka bya ngae khyh hae.

¹⁷Tukeiccuze, Israel Pachia, vaaw Pachia, BAWIPAW nynh hynhte a ho: Judah tungvaw te Jerusalem um hae paw balyn tungvaw khe ka hoty vae paw ronaw balyn kha ka thuasah cih; pawccecize minmin kha ka hopah hae zah ngae khyh hae, ka ko hae zahmah yn oi khyh hae,” a ci.

¹⁸Jeremiah nynh Rekhab phin hae kha hynhte a hopya hae: Israel Pachia, vaaw BAWIPAW nynh hynhte a ho: Nae minpaaw Jonadab kaw kha ngaete, a phungbya balyn kha na zui oh zah, kaw ae pya oh paw balyn kha na cyi vae oh keiccuze,

¹⁹Israel Pachia, vaaw BAWIPAW nynh hynhte a ho: Rekhab ccapaw Jonadab ciihan kya she takyhte ka ryalah lanpaw pise paekuh lan khyh.