Read Zotung Chin JEREMIAH 36 Bible Online

JEREMIAH 36 - Zotung Chin bible

JEREMIAH 36

¹Josiah ccapaw Jehoiakim nynh Judah siapharan lang a tangnaw kum palinaw kum kya, Jeremiah kya yn thuapaw BAWIPAW bya tuh:

²Ccakue kha lawkuh lah, Josiah she lya, nang kae hopya nin kyate atunin cia Israel, Judah te minphuin balyn kong kae hopyapaw bya balyn kha zeitua.

³Mih tungvaw thuasah lan ka paccynpaw ronaw balyn kha Judah hae nynh he a thae hae te, ahoy leipaw mih cyisahnaw kyate poh a paleihkuh kho hae, tuhteze tuh mih hoyleinaw te mih seinaw kha poh ka ngaethya kho hae, a cipya.

⁴Tetuh Jeremiah nynh Neriah ccapaw Baruk kha ko zah, BAWIPAW nynh Jeremiah a hopyapaw bya balyn kha, Jeremiah nynh a opya thyhte Baruk nynh ccakue kya a zei.

⁵Te Jeremiah nynh Baruk kha, “Kae tuh BAWIPAW beikinn lungkhu lang tee lan khee ka thua;

⁶tukeiccuze nang nynh cceih lah, kae opah zah ccakue kya na zeipaw BAWIPAW bya kha BAWIPAW beikinn e ccungccaw hae nynh a thaenaw hae khe looh-aesung nin kya riapah hae. Mih khua te oun thuapaw Judah hae balyn nynh a thaenaw hae khe mah na riapah cih hae.

⁷Minmin balyn nynh ahoy leipaw mih ozia kyate paleihkute, BAWIPAW malang ngiakute saw poh a sang kho hae, pawccecize BAWIPAW nynh e ccungccaw hae a honua hae paw thinrianaw te bungpawnaw tuh myarya ale,” a cipya.

⁸Te profeh Jeremiah nynh kaw a pyapaw balyn kha Neriah ccapaw Baruk nynh cyih zah, ccakue kya-e BAWIPAW bya kha BAWIPAW beikinn khe a ria.

⁹Josiah ccapaw Jehoiakim nynh Judah siapharan lang a tangnaw kum pangawnaw, sawpaw sah takuanaw khe Jerusalem e ccungccaw balyn te Judah ram e khua hae kyate Jerusalem lang oun cceih hae paw balyn nynh BAWIPAW malang khe looh-ae a sung hae.

¹⁰Tetuh BAWIPAW inn e Koikua Thawpaw teenaw, thahlang khaan kya umpaw ryaccinkhan Shapan ccapaw Gemariah khaan kya ccungccaw balyn a thaenaw hae khe, Baruk nynh ccakue kya-e Jeremiah bya kha a riapya hae.

¹¹Shafan ccapaw Gemariah a ccapaw Mikaiah nynh ccakue kya-e BAWIPAW bya balyn kha he a thae tuh,

¹²siapharan inn lang cceihbung zah, ryaccinkhan khaan lungkhu lang a tee; tuin kyatuin Ryaccinkhan Elishama, Shemaiah ccapaw Delaiah, Akhbor ccapaw Elnathan, Safan ccapaw Gemariah, Hananiah ccapaw Zedekiah te ccangpaw bawi hae tuh a haung hae.

¹³Baruk nynh ccungccaw hae a thaenaw hae kya ccakue a ria lyaze Mikaiah nynh a thaepaw bya balyn kha minmin kalan a hopya hae.

¹⁴Tetuh bawi hae balyn nynh Kushi ccapaw Shelemiah ccapaw Nethaniah a ccapaw Jehudi kha Baruk kalan saw hae zah, “Ccungccaw hae thaenaw kya na riapaw ccakue kha yn ccyng lah, yn cceih,” cite a hosah pya hae. Tukeiccuze Neriah ccapaw Baruk nynh ccakue tuh a kuih kya ccyng zah mih kalan a cceih.

¹⁵Te minmin nynh Baruk kha, “Haung lah, ccakue tuh kaening oun riapya tua,” a cipya hae. Tukeiccuze Baruk nynh ccakue tuh a riapya hae.

¹⁶Tuh-e bya balyn tuh he a thae hae te, bungzoute lu kheit te lu kheit dokuh hae zah, Baruk kha, “E bya balyn hynh siapharan kalan kae thaesah ccaccing cih,” a cipya hae.

¹⁷Te tuh-e bawi hae nynh Baruk kha, “Atu oun hopya tua, e bya balyn hynh pawtemou na zei? Jeremiah nynh ae opyapaw athua tou?” cite a khia hae.

¹⁸Baruk nynh, “E bya balyn hynh Jeremiah nynh yn opah zah, kae nynh ccakue kyakhe ccatui te ka zei,” cite a khung hae.

¹⁹Tetuh bawi hae nynh Baruk kha, “Nang te Jeremiah tuh cceih oh lah, rekuh oh, nae umnaw kha humhung mah nysakuh nan oh,” a cipya hae.

²⁰Te ccakue tuh ryaccinkhan Elishama khaan kya nungsyate, siapharan inn voidu lungkhu lang cceih hae zah, tuh-e bya balyn kha siapharan kya a hopya hae.

²¹Tetuh siapharan nynh Jehudi kha tuh-e ccakue law lan naw zah, aning nynh ryaccinkhan Elishama khaan kya-e ccakue tuh a law; tuh-e ccaw tuh Jehudi nynh siapharan te a pe thadyn hae paw bawi hae kha a riapya hae.

²²Tuh lya tuh, sawpaw sah takuanaw, khuaccih saw thua zah, siapharan tuh khuaccih saw a umnaw inn lungkhu khe haung zah, a malang umpaw maee aruapaw maeepung kha a eku.

²³Jehudi nynh ccakue tuh ccamae ccangthum ccangpali he a ria te, siapharan nynh ccakue tuh ccezung te aw zah, maeepung lungkhu e maee lungkhu langkhe athang mawlaezung a phung.

²⁴Siapharan te tuh-e bya a thaepaw a ryalahtu miakaw tuh mih bungzou khyh, mih boeining mah seiikuh khyh hae.

²⁵Siapharan nynh ccakue tuh a seii khyh nawlan, Elnathan, Delaiah te Gemariah nynh a ngia hae zemah mih bya kha ngae khyh.

²⁶Te siapharan nynh ryaccinkhan Baruk te profeh Jeremiah kha kyng khylan siapharan ccapaw Jerahmeel, Azriel ccapaw Seraiah te Abdeel ccapaw Shelemiah kha kaw a pya hae. Thuasalama BAWIPAW nynh minmin kha a thuruh hae.

²⁷Jeremiah nynh opah zah Baruk nynh a zeipaw ccakue kha siapharan nynh maee te a u koute, Jeremiah kya yn thuapaw BAWIPAW bya tuh:

²⁸Ccangpaw ccakue kha lah lah, Judah Siapharan Jehoiakim nynh maee te a upaw masaty e ccakue kya a umpaw bya rynpaw balyn kha zeitua.

²⁹Te Judah Siapharan Jehoiakim konglangte hynhte na ho cih, BAWIPAW nynh hynhte a ho: Babilon siapharan tuh yn thua ccaccing cih zah, e ram hynh a roh cih, ccungccaw te sarangpaw hae kha a theih cih hae, acikuhpaw bya hynh pawccemou e ccakue kya na zei? cite na ho zah, e ccakue hynh maee te na u ngan vae.

³⁰Tukeiccuze Judah Siapharan Jehoiakim konglangte BAWIPAW nynh hynhte a ho: Aning nynh David a bawitungkhung kya a haung cih paw ciihan lu kheit sanmah hoi lan khyh, te a rhua kha khuadae ze khuaninso kya, khuazi ze dangtui kya a vua cih hae.

³¹Amaw, a ciihan hae te a ryalahtu hae kha mih hoyleinaw keiccu de ka tah cih hae; mih tungvaw thuasah, Jerusalem khuaccaaw hae tungvaw thuasah, Judah hae tungvaw thuasah shethya balyn kha ka thuasah cih, tuh-e shethya te raeringnaw ka pya hae zahmah ngaelae khyh hae, a ci.

³²Tetuh Jeremiah nynh ccangpaw ccakue kha lah zah, Neriah ccapaw ryaccinkhan Baruk kha a pya, Judah Siapharan Jehoiakim nynh maee te a upaw ccakue kya-e bya balyn kha Jeremiah nynh opah zah a zei; alokuhpaw bya patae kha biachih athua.