Read Zotung Chin JEREMIAH 37 Bible Online

JEREMIAH 37 - Zotung Chin bible

JEREMIAH 37

¹Babilon siapharan Nebukhadnezzar nynh Judah siapharan lang a khangpaw Jehoiakim ccapaw Koniah hanpaw Josiah ccapaw Zedekiah nynh siapharan lang a tang vae.

²Thuasalama amaw nynh thuasah, a ryalahtu hae nynh thuasah, ramccungccaw hae nynh thuasah BAWIPAW nynh Jeremiah kyate a hopaw bya kha ngae khyh hae.

³Zedekiah siapharan nynh Shelemiah ccapaw Jehukal te Maaseiah ccapaw ranpibawi Zefaniah kha profeh Jeremiah kalan saw hae zah, “Kaening hanlan BAWIPAW ah Pachia kalan saw beih oun sangpya tua,” cite a hosah pya hae.

⁴Tuh lya tuh, Jeremiah tuh thong a ccaw loh khyh keiccuze ccungccaw hae laku kya a cceih bungthung ung.

⁵Tuh lyatuin, Faro rhawkaw hae tuh Izip ram kyate oun toikuh vae hae; tuh-e kong tuh Jerusalem a koihlu hae paw Khaldi hae nynh he a thae hae tuh, Jerusalem kyate a toikuh hae.

⁶Tetuh BAWIPAW bya tuh profeh Jeremiah kya yn thua zah:

⁷BAWIPAW , Israel Pachia nynh hynhte a ho: Kae kha byakhia khylan ae sawtu oh paw Judah siapharan kha nanning lu ning nynh hynhte la hopah oh, nang bawm khylan oun cceih hae paw Faro rhawkaw hae tuh mimaw ram, Izip ram lang a ki cih hae.

⁸Te Khaldi hae tuh oun ki cih hae zah, e khuapi hynh a tuk cih hae, a lah cih hae zah maee te a soi cih hae.

⁹BAWIPAW nynh hynhte a ho: “Khaldi hae tuh aening kyate ccaring a cceih ccaccing vae cih hae,” cite naemaw toulou kha lingkuh nan oh, pawccecize minmin tuh asawnaw lang cceih lan khyh hae.

¹⁰Nanning ae tuk oh paw Khaldi rhawkaw hae balyn kha na tae oh zah, vaemaw mue hae paw kyalya tuh mih bu kya a laehy hae lanze hei, tuh-e hae nynh a thokuh cih hae zah, e khuapi hynh maee te a soi cih hae.

¹¹Faro rhawkaw hae nynh oun naeku hae keiccuze Khaldi rhawkaw hae tuh Jerusalem kyate nulang he a ki hae te,

¹²Jeremiah tuh a puizia hae kya-e mue lan a ccanpaw sisua kha lawku khylan Jerusalem kyate Benjamin ram lang a cceih.

¹³Benjamin Koikua kya he a thua tuh, Hananiah ccapaw Shelemiah a ccapaw Irijah cikuhpaw rhawviatupaw nynh profeh Jeremiah kha, “Nang hynh Khaldi hae kalan nae ccuepaw nynh thua,” ci zah a kyng.

¹⁴Te Jeremiah nynh, “Tuh-e bya tuh hynbya nynh thua; Khaldi hae kalan ka ccuepaw thua khyh,” a cipya. Thuasalama Irijah nynh ngaepya leite, Jeremiah kha kyng zah bawi hae kalan a thuakhae.

¹⁵Bawi hae tuh Jeremiah tungvaw mih thinria, aning kha zia hae zah, ryaccinkhanpaw Jonathan inn khe thong a saw hae, pawccecize tuh-e inn tuh thonginn lang a rae vae hae.

¹⁶Jeremiah tuh innmakaw laephi akhunaw kyakhe nin patae a um.

¹⁷Zedekiah Siapharan nynh Jeremiah kha kosah hae zah, a tungkuh hae. Siapharan nynh a inn khe aruh lante, “BAWIPAW kyate bya hankhakheit a um tou?” cite a khia. Jeremiah nynh, “A um! Nang tuh Babilon siapharan kuih kalan pya na thua cih,” a cipya.

¹⁸Jeremiah nynh Zedekiah Siapharan kha, “Na tungvaw thuasah, na ryalahtu hae tungvaw thuasah, e ccungccaw hae tungvaw thuasah, paw ka cyisei keiccu mou thong nae saw?

¹⁹‘Babilon siapharan tuh nang te e ram hynh dou khylan yn thua lan khyh,’ cite profehbya ae hopah hae paw na profeh hae kha teimou a um hae?

²⁰Tukeiccuze ka bawipaw ka siapharan, ka bya beih yn ngaepya tua: kae soihbiakunawpaw bya hynh beih yn thaepah lah, chi khylan ryaccinkhanpaw Jonathan inn lang bua yn saw nan vae,” a cipya.

²¹Tukeiccuze Zedekiah Siapharan nynh kawtho zah, Jeremiah kha thong rhawviatu hae voidu lungkhu khe thong a saw hae; khuapi lungkhu sanlou athang mawlaezung, sanlou thoutu hae laanpi kyate nin takyhte sanlou phe kheit tyty a pya hae. Tuhcite Jeremiah tuh thong rhawviatu hae voidu lungkhu khe a um.