Read Zotung Chin JEREMIAH 39 Bible Online

JEREMIAH 39 - Zotung Chin bible

JEREMIAH 39

¹Zedekiah nynh Judah siapharan lang a tangnaw kum takuanaw, sawpaw sah hawnaw khe, Babilon siapharan Nebukhadnezzar te a rhawkaw hae balyn nynh Jerusalem kha oun ccianua hae zah a koihlu hae;

²Zedekiah nynh siapharan lang a tangnaw kum haw lae kheitnaw kum, sawpaw sah palinaw, nin takua nin khe khuapi kya-e khualungrua kha a ting hae.

³Jerusalem kha he a lah hae te, Babilon siapharan kuihkaw e bawi hae tuh oun thua hae zah, angaelung e koikua kya a haung hae, tuh-e hae tuh: rhawbawi lepaw Nergal-sharezer, Samgar-nebo, bawi lepaw Sarsekhim, Nergal-sharezar te Babilon siapharan kuihkaw e tuhlaepaw bawi hae nynh thua hae.

⁴Judah siapharan Zedekiah te rhawkaw balyn nynh minmin kha he a muih hae tuh, a ccue hae, khuazi khe siapharan khokhu laanpi kha zui hae zah, khualungrua ccangning laku e koikua kyate khuapi atolang pou hae zah Arabah lang a cceih hae.

⁵Thuasalama Khaldi rhawkaw hae nynh minmin kha deehui hae zah, Zedekiah kha Jeriko bialae khe a phya hae; te aning kha kyng hae zah Babilon siapharan a umnaw Hamath ram, Riblah khua langkhe a cciakhae hae; aning nynh Zedekiah kha bya a pia.

⁶Babilon siapharan nynh Zedekiah ccapaw hae kha Riblah khua kya mih paaw muihnaw khe a chia hae, Judah ram e bawi balyn kha mah a chia hae.

⁷Zedekiah mit kha a khoi kou hae te, Babilon lang cciakhae khylan sivawrui te a khii hae.

⁸Khaldi hae nynh siapharan inn te ranzae hae inn kha maee te soi hae zah, Jerusalem khualungrua kha a ting hae.

⁹Oute rhawviatu hae bawipaw Nebuzaradan nynh khuapi kya a laehypaw ccungccaw hae, amaw kalan a ccue hae paw te a laehypaw ccungccaw hae kha kyng hae zah Babilon lang a cciakhae hae.

¹⁰Rhawviatu hae bawipaw Nebuzaradan nynh pawpaw mah a hoi lei hae paw ryachi hae abang kha Judah ram kya cciataw hae zah, misu khokhu te loo hae kha a pya hae.

¹¹Babilon siapharan Nebukhadnezzar nynh rhawviatu hae bawipaw Nebuzaradan kha Jeremiah konglangte kawpya zah,

¹²“Jeremiah kha yn ko, amaw kha hoyte do-oih lah, vawsaw pya nan, aning nynh ae hopya hawte cyipah,” a cipya.

¹³Tukeiccuze rhawviatu hae bawipaw Nebuzaradan, bawi lepaw Nebushazban, rhawbawi lepaw Nergal-sharezer te Babilon siapharan kuihkaw e bawi lupi balyn nynh ccungccaw saw hae zah,

¹⁴thong rhawviatu hae voidu lungkhu e Jeremiah kha a kosah hae. Minmin nynh a umnaw inn kalan saw khylan, Shafan ccapaw Ahikam a ccapaw Gedaliah kya a ap hae. Tetuh Jeremiah tuh a minphuin hae ryte a umkheih hae.

¹⁵Jeremiah tuh thong rhawviatu hae voidu lungkhu a um lyakhe, a kya yn thuapaw BAWIPAW bya tuh:

¹⁶Cceih lah, Ethiopia minphuinpaw Ebed-melek kha hynhte hopah: Israel Pachia, vaaw BAWIPAW nynh hynhte a ho: E khuapi hoynaw elang thua leite, hoyleinaw elang ka bya kha ka ccingsah cih, tuin nin khe ka bya tuh na malang accing cih.

¹⁷Thuasalama tuin nin khe nang kha kae khum cih zah, na ripaw ccungccaw hae kuih kya ap na thua lan khyh, cite BAWIPAW nynh a ci.

¹⁸Pawccecize nang kha kae khum ccaccing cih zah, thaloi te na chih lan khyh; kae kha nae doliaku keiccuze na hiinnaw tuh rhawtuknaw kya-e muepaw lasung hawte na hoi cih, cite BAWIPAW nynh a ci.