Read Zotung Chin JEREMIAH 41 Bible Online

JEREMIAH 41 - Zotung Chin bible

JEREMIAH 41

¹Sawpaw sah sarinaw khe, siapharan phin athuapaw, siapharan kuihkaw e bawi hae kyaze lupi lu kheit athuapaw, Elishama ccapaw Nethaniah a ccapaw Ishmael tuh ccungccaw lu haw ryte Mizpah khua umpaw Ahikam ccapaw Gedaliah kya a thua hae. Mizpah khua kya looh a aekheih lya hae khe,

²Nethaniah ccapaw Ishmael te ccungccaw lu haw nynh thonuakuh hae zah, Shafan ccapaw Ahikam a ccapaw Gedaliah kha thaloi te a chia hae, pawccecize Babilon siapharan nynh Gedaliah kha ram lungkhu uktu lang a nung keiccu nynh thua.

³Mizpah khua kya Gedaliah ryte a umkheih hae paw Judah hae balyn te tuin kya umpaw Khaldi rhawkaw hae kha mah Ishmael nynh a chia hae.

⁴Gedaliah a theih kou hae te humhung nynh mah a ny maw awkhualan khe,

⁵Shekhem, Shiloh te Samaria kyate ccungccaw sung tarya tuh mih khawming ngokute, mih boeining seiikute, mih pyn awkute oun thua hae zah, BAWIPAW beikinn kya pya lanpaw ccathae silawnawpaw te mynkhuhpaw kha oun ccyngbia hae.

⁶Te Nethaniah ccapaw Ishmael tuh Mizpah khua te minmin tungku khylan rawkhui biate yn thua. He a tungkuh hae te aning nynh minmin kha, “Ahikam ccapaw Gedaliah kalan oun cciatua oh,” a cipya hae.

⁷Minmin tuh khuapi ngaelung he a thua hae te, Nethaniah ccapaw Ishmael te a kya umpaw ccungccaw hae nynh tuh-e hae tuh theih hae zah, tuisung lungkhu lang a vua hae.

⁸Thuasalama tuh-e laku e lu haw hae nynh Ishmael kha, “Kaening hynh oun theih nan, pawccecize kae ccakhungkuhpaw chanvuih, barli, chitui te khoitui kha ramkaw kae thuruhkunaw kya kae hoi,” a cipya hae. Tukeiccuze minmin te mih ban hae kha chia leite a haang hae.

⁹Ishmael nynh theih hae zah mih rhua a vuanaw tuisung tuh myarya ale, tuh-e tuisung tuh Israel siapharan Baasha rhaw kyate thungkhawku nawlan Siapharan Asa nynh a thaekupaw nynh thua. Nethaniah ccapaw Ishmael nynh a chia hae paw michi rhua khate tuh-e tuisung tuh phe a biasah.

¹⁰Oute Mizpah khua e a laehypaw ccungccaw balyn, siapharan ccanung hae, rhawviatu hae rhawbawipaw Nebuzaradan nynh Ahikam ccapaw Gedaliah kalan ap hae zah Mizpah khua a cciataw hae paw balyn kha Ishmael nynh pong a kyng hae. Nethaniah ccapaw Ishmael nynh minmin kha kyng hae zah Ammon hae kalan a cciakhae hae.

¹¹Nathaniah ccapaw Ishmael nynh hoyleinaw a raepaw balyn kha Kareah ccapaw Johanan te a kya umbua hae paw rhawkaw cciakhaetu hae balyn nynh he a thae hae tuh,

¹²mih ccungccaw balyn kha kokute Nethaniah ccapaw Ishmael kha tuk khylan ccianua hae zah Gibeon tuilipi pe khe a phya hae.

¹³Ishmael te a umkheih hae paw ccungccaw balyn nynh Kareah ccapaw Johanan te a umkheih hae paw rhawkaw cciakhaetu hae balyn kha he a muih hae tuh mih lungtua.

¹⁴Tetuh Ishmael nynh Mizpah kyate a kyng hae paw balyn tuh kithui hae zah, Kareah ccapaw Johanan kalan a cceih hae.

¹⁵Thuasalama Nethaniah ccapaw Ishmael tuh lu tarya ryte Johanan kyate lue hae zah Ammon hae kalan a cceih hae.

¹⁶Te Nethaniah ccapaw Ishmael nynh Ahikam ccapaw Gedaliah kha a theih koute, Ishmael nynh Mizpah khua kyate kyng hae zah a cciakhae hae paw rhawkaw hae, nopi hae, imua hae, tinriapaw ccungccaw hae balyn kha Kareah ccapaw Johanan te rhawkaw cciakhaetu hae balyn nynh Gibeon khua kyate bua a kikhae hae.

¹⁷Minmin tuh Khaldi hae keiccuze Izip ram lang ccia lan eenaw te pou hae zah, Bethlehem khua pe umpaw Geruth Khimham khua khe a um hae,

¹⁸pawccecize Babilon siapharan nynh ram uktu lang a nungpaw Ahikam ccapaw Gedaliah kha Nethaniah ccapaw Ishmael nynh a chia keiccuze Khaldi hae tuh a rih hae.