Read Zotung Chin JEREMIAH 42 Bible Online

JEREMIAH 42 - Zotung Chin bible

JEREMIAH 42

¹Oute rhawkaw cciakhaetu bawi hae balyn, Kareah ccapaw Johanan, Hoshaiah ccapaw Azariah te adih ale ccungccaw balyn nynh

²profeh Jeremiah kalan naekuh hae zah, “Kaening nynh kae ngiapaw hynh beih oun ngaepya tua, kaening kae laehypaw balyn hanlan BAWIPAW na Pachia kalan saw beih sangtua. Pawccecize na muih vae hawte, ccungccaw patae laku kyate kaening beihtaraw rou nynh kae laehy vae.

³Kaening nynh kae zui lanpaw laanpi te kae cyi lanpaw kha BAWIPAW na Pachia nynh oun muihsah sah,” a cipya hae.

⁴Profeh Jeremiah nynh minmin kha, “Myarya hoy: Na ngia oh hawte, BAWIPAW nae Pachia kalan saw ka sang cih zah, BAWIPAW nynh ae leih oh paw miakaw kha kae hopah cih oh; pawpaw mah kae phei lan khyh oh,” a cipya hae.

⁵Minmin nynh Jeremiah kha, “BAWIPAW na Pachia nynh na kyate kaening oun hopyapaw atyn-are thyhte kae zui khyh lanze, BAWIPAW tuh kaening kha rawsete ahmepaw te alungzipaw ccaekia lang tang vae sah.

⁶Kaening nynh BAWIPAW kae Pachia bya kha he kae ngae te, hoynaw kae mue ccaw cite, nang kae sawnuapaw BAWIPAW kae Pachia bya kha ahoy athya ci um leite kae ngae cih,” a cipya hae.

⁷Nin haw aro te, BAWIPAW bya tuh Jeremiah kya yn thua.

⁸Tetuh Jeremiah nynh Kareah ccapaw Johanan te a kya um buapaw rhawkaw cciakhaetu bawi hae balyn te adih ale ccungccaw balyn kha pum hae zah,

⁹minmin kyakhe, “Na ngia oh paw kha amaw malang thuakhaepya lan kae nae sawnuathe oh paw, BAWIPAW , Israel Pachia nynh hynhte a ho:

¹⁰E ram kya na um oh ze rou nynh nanning kha suebung leite kae lesah thung cih oh; kae lin cih oh zah poh kae khaee lan khyh oh; pawccecize nae tungvaw ka la thuakhaepaw shethya keiccu ka ngaethah.

¹¹Na ri oh paw Babilon siapharan kha rih nan oh; amaw kha rih nan oh, pawccecize nanning khum khylan te a kuih kyate luesah khylan kae tuh nae kya ka um, cite BAWIPAW nynh a ci.

¹²Nae tungvaw thawccinaw ka hoi cih, te aning nynh nae tungvaw thawccinaw a hoi cih zah nae ram lang ae kisah cih oh.

¹³Thuasalama nanning nynh, BAWIPAW nae Pachia bya kha ngae leite, ‘E ram kya kae um lan khyh,

¹⁴rhawtho leinaw, mungkae roi thae leinaw te vuelaw leinaw Izip ram lang kae cceih cih zah, tuin kya kae um cih,’ cite palei na ho oh zetuh,

¹⁵pou a laehypaw Judah hae, BAWIPAW bya hynh thaetua oh. Israel Pachia, vaaw BAWIPAW nynh hynhte a ho: Nanning nynh Izip ram lang tee lan zah tuin kya khuasah lan, cite bya na paeku oh zetuh,

¹⁶na ri oh paw thaloi nynh Izip ram khe ae phah cih oh; te na ri oh paw ccakanccinaw nynh nae nulang te ae deehui cih oh zah, tuin kya na chih cih oh.

¹⁷Izip ram lang ccia lan zah khuasah lan, cite bya a paekuh hae paw balyn tuh thaloi, ccakanccinaw te shethya khate a chih cih hae; mih tungvaw ka thuasah cih paw shethya kyate lue zah a laehypaw te ahiinhypaw um lan khyh.

¹⁸“Israel Pachia, vaaw BAWIPAW nynh hynhte a ho: Ka thinrianaw te ka bungpawnaw kha Jerusalem um hae paw tungvaw kya buu athua hawte, Izip ram lang he na cceih oh te, ka bungpawnaw kha nae tungvaw buu athua cih. Nanning tuh anungsikuhpaw, ri lan umpaw, thyalawpaw te sarisarya nungpaw lang na tang cih oh. E hmin hynh na muihthui vae lan khyh oh.

¹⁹Pou a laehypaw Judah hae, Izip ram lang cceih nan oh, cite BAWIPAW nynh ae hopya vae oh. Na mesei vae oh, cite

²⁰atunin raeringnaw kae pya oh paw hynh hoyte nyh oh. Pawccecize naemaw ccaccei nynh BAWIPAW nae Pachia kalan nae saw oh zah, ‘Kaening hanlan BAWIPAW ah Pachia kalan saw oun sangpah, BAWIPAW ah Pachia nynh a hopaw miakaw kha kaening oun hopah lah, kae cyih cih,’ nae cipya oh.

²¹Tukeiccuze atunin kae hopya vae oh, thuasalama BAWIPAW nae Pachia nynh nanning hopya lan yn nawpaw bya miakaw kha papin na zui khyh oh.

²²Khuasah khylan na ccianua ry oh paw hmin kyakhe thaloi, ccakanccinaw te shethya khate na chi lan oh paw kha hoyte nykuh oh,” a cipya hae.