Read Zotung Chin JEREMIAH 43 Bible Online

JEREMIAH 43 - Zotung Chin bible

JEREMIAH 43

¹BAWIPAW mih Pachia nynh Jeremiah kha ccungccaw balyn kalan hopya lan a sawnuathepaw a bya balyn kha Jeremiah nynh he a hopah kou hae tuh,

²Hoshaiah ccapaw Azariah, Kareah ccapaw Johanan te a lysakuh hae paw balyn nynh Jeremiah kha, “Hynbya nynh na ho. ‘Izip ram kya um khylan cceih nan oh,’ cite ho khylan BAWIPAW kae Pachia nynh nang kha ae saw khyh;

³Khaldi hae nynh kaening kha chia khylan, tuhkhyhze kyngte Babilon lang cciakhae khylan cite Khaldi hae kuih kalan ap khylan Neriah ccapaw Baruk nynh nang kha ae tuhou,” a cipya hae.

⁴Tuhcite Judah ram kya um lan BAWIPAW nynh a hopya hae paw bya kha Kareah ccapaw Johanan, rhawbawi hae balyn te ccungccaw balyn nynh ngae khyh hae.

⁵A deenaw hae ram takyh kyate Judah ram kya um khylan oun kithui hae paw Judah hae a laehy hae paw balyn kha Kareah ccapaw te rhawbawi hae nynh a cciakhae hae—

⁶nopi, pise, imua, siapharan ccanung hae te rhawviatu hae bawipaw Nebuzaradan nynh Shafan ccapaw Ahikam a ccapaw Gedaliah kya a cciataw hae paw miakaw, te profeh Jeremiah te Neriah ccapaw Baruk kha mah a cciakhae hae.

⁷BAWIPAW bya kha ngae leite Izip ram lang cceih hae zah, Tahpanhes khua a thua hae.

⁸Te BAWIPAW bya tuh Tahpanhes khua kya Jeremiah kya yn thua zah:

⁹Lung alepaw hae kha na kuih te lah lah, Tahpanhes khua kya Faro siapharan inn lang teenaw kya-e anglae phaekuhpaw laanpi khe uutua. Tuhcite na cyipaw tuh Judah hae nynh muih hae sah lah,

¹⁰minmin kyakhe, Israel Pachia, vaaw BAWIPAW nynh hynhte a ho: Ka ryalahtu Babilon Siapharan Nebukhadnezzar kha ka kosah cih hae zah, aning nynh a bawitungkhung kha, ka uupaw e lung hae vawlan khe a nung cih, te khah-e hae luki khe a siapharan boeibu kha a dawkhaw cih.

¹¹Nebukhadnezzar tuh yn thua cih zah, Izip ram kha a roh cih, shethya te chia lan accan hae paw kha shethya te a theih cih hae, kyngte ramccang lang cciakhae lan accan hae paw kha a cciakhae cih hae, thaloi te chia lan accan hae paw kha thaloi te a theih cih hae.

¹²Aning nynh Izip pachia hae beikinn hae kha maee te a soi cih; khah-e hae kha maee te a soi cih hae zah ccaring a cciakhae cih hae; tuurinpaw nynh a boeining kya-e sih kha a law hawte, Izip ram kha a lah cih zah tuin kyate khyndadyh lan a poutaw cih.

¹³Izip ram e Heliopolis khua a umpaw lungbing hae kha a khya cih; Izip pachia hae beikinn hae kha maee te a soi cih.