Read Zotung Chin JEREMIAH 44 Bible Online

JEREMIAH 44 - Zotung Chin bible

JEREMIAH 44

¹Izip ram e Migdol khua, Tahpanhes khua, Memfis khua te Patharos ram a umpaw Judah hae hanlan Jeremiah kya yn thuapaw bya:

²BAWIPAW , Israel Pachia nynh hynhte a ho: Jerusalem te Judah ram e khua hae balyn tungvaw ka thuakhaepaw shethya balyn kha nanning nynh phe na muih vae oh. Minmin kha dotua oh; atu lya ccungccaw a um lei lan ciate phe adae,

³pawccecize minmin nynh thuasah, nanning nynh thuasah, nae minpaaw hae nynh thuasah na la ny boi lei oh paw ccangpaw pachia hae kalan silawnaw rae khylan te ryalawpya khylan ccianua hae zah, ka thinriasahte hoyleinaw kha a rae hae.

⁴Ka ryalahtu profeh hae balyn kha apaekuh lei lan nae kalan ka saw hae zah, “Ka huapaw hynh-e anungsikuhpaw uccaw hynh na cyi khyh nawlan oh, kae ngia oh!” cite ae hopya oh.

⁵Thuasalama minmin nynh mih hoyleinaw kyate maeleihku lanpaw te ccangpaw pachia hae kalan silawnaw rae lei lanpaw kha ngae khyh hae zah mih nakaring tuakuh khyh hae.

⁶Tukeiccuze ka thinrianaw te ka bungpawnaw kha ka bu zah, Judah ram e khua hae te Jerusalem khua e laanpi hae kyakhe maee lang arua; tuh-e hae tuh accakaepaw te ccungccaw adaenaw hmin lang a tang hae, atunin cia tuhcite po a um hae.

⁷Israel Pachia, vaaw Pachia BAWIPAW nynh hynhte a ho: A laehypaw ccungccaw a um lei lan ciate, Judah hae laku kyate nopi te pise, imua te nosi kha zosah khylan, pawccemou hynhcihawpaw vawsawnaw alepaw hynh naemaw toulou nynh nae tungvaw na thuakhaeku oh?

⁸Na ccianua oh zah na umnaw oh Izip ram kyahin ccangpaw pachia hae kalan silawnaw raete, nae kuih ryalawnaw khate kae hynh pawccemou ka thin nae riasah oh? Laephi vaw e minphuin hae balyn laku kya thyalawnawpaw te saryanawpaw lang tangte vua na thua cih oh tou?

⁹Nae minpaaw hae nynh thuasah, Judah siapharan hae nynh thuasah, mih zu hae te naemaw te nae zu hae nynh thuasah Judah ram kya te Jerusalem laanpi hae kya na rae oh paw nae seinaw hae kha phe na ning vae oh tou?

¹⁰Atunin cia ngaesikunaw khyhze rawrinaw kha na langsakuh khyh oh, nanning te nae minpaaw hae malang ka nungpaw ka phungbya hae te ka kawbya kha na zui khyh oh.

¹¹Tukeiccuze Israel Pachia, vaaw BAWIPAW nynh hynhte a ho: Nae tungvaw shethya thuakhae lanpaw te Judah hae maemih lanpaw kha bya ka paeku vae.

¹²Izip ram kya um khylan ccia lan cite byapaekuh hae paw Judah phin a laehy hae paw kha ka cciakhae cih hae zah, mih balynte a chih cih hae; Izip ram kya a khuliakuh cih hae; thaloi te ccakanccinaw khate a chih cih hae; adih huapaw kyate ale huapaw kyacia thaloi te ccakanccinaw khate a chih cih hae; anungsikuhpaw te ri lan umpaw lang a tang cih hae zah, thyalawnawpaw te saryanawpaw lang a tang cih hae.

¹³Jerusalem kha thaloi, ccakanccinaw te shethya khate de ka tah vae hawte, Izip ram um hae paw kha de ka tah cih hae,

¹⁴tuhteze nynh Izip ram lang um lan a cceih hae paw Judah hae a laehy hae paw tuh lue lan khyh hae, hiin lan khyh hae zah Judah ram lang kithui lan khyh hae. Judah ram lang a ki ry hae zemah, rhaw kyate a khyn hae paw holeite tuh kithui vae lan khyh hae.

¹⁵Tetuh mih zu hae nynh ccangpaw pachia hae kalan silawnaw a rae hae paw kong a nyh hae paw pise hae balyn, mih pe a thadyn hae paw nopi hae balyn, myarya lung hae paw zapi hae te Izip ram Pathros khua um hae paw balyn nynh Jeremiah kha byakhung hae zah,

¹⁶“Nang nynh BAWIPAW min te nae hopyapaw bya kha kaening nynh kae ngaepah lan khyh.

¹⁷Tuhlaetuh, Judah ram e khua hae kya te Jerusalem e laanpi hae kyakhe kaening te kae minpaaw hae, kae siapharan hae te kae bawi hae nynh kae la cyimae hawte, vaaw siapharannung kalan silawnaw kae rae cih zah amaw kalan niapaw silawnaw kha kae rae cih, bya kae kinku vae thyhte atyn-are kae cyih cih. Tuhte kae la cyih zah looh patae leih kae hoi, kae hoirum zah vawsawnaw mah kae la tung boi khyh.

¹⁸Thuasalama vaaw siapharannung kalan silawnaw rae leite kae um zah, niapaw silawnaw kha kae rae vae khyh zetuh, atyn-are ahoboupaw lang kae tang zah, thaloi te ccakanccinaw khate kae chih vae,” a cipya hae.

¹⁹Te nopi hae nynh, “Vaaw siapharannung kalan silawnaw kha po kae rae cih zah, niapaw silawnaw kha po kae rae cih; kae vawpaw hae nynh a ny lei lan hae te vaaw siapharannung hanlan amaw muinsan lo lante sanlou kha kae raepah zah, niapaw silawnaw kha kae rae, cite tou nae tua?” a ci hae.

²⁰Tuhcite Jeremiah kalan bya a khungru hae paw balyn, nopi te pise balyn kha Jeremiah nynh byakhung hae zah:

²¹“Nanning te nae minpaaw hae, nae siapharan hae te nae bawi hae, e ram kya-e ccungccaw hae nynh Judah ram e khua hae te Jerusalem khua e laanpi hae kya silawnaw na rae oh paw kha BAWIPAW nynh liathui khyh tou? A thinlung kya nung khyh tou?

²²Hoyleinaw na rae oh paw te anungsikuhpaw na rae oh paw kha muih zah ngaesang kho vae khyh; tukeiccuze nae ram tuh ccungccaw um leite, adaepaw, accakaepaw te thyalawpaw ram lang a tang vae, tuhcite atunin cia a um vae.

²³Nanning nynh silawnawpaw maee na u oh keiccu thuasah, BAWIPAW tungvaw na sei oh zah BAWIPAW bya kha ngae leite, a kawbya, a phungbya te a phunglang kha na zui khyh oh keiccu thuasah atunin alangku hawte, e shethya hynh nae tungvaw a thua vae,” a cipya hae.

²⁴Jeremiah nynh ccungccaw balyn te nopi balyn kha, “Izip ram a um hae paw Judah hae nanning balyn nynh BAWIPAW bya hynh thaetua oh,

²⁵Israel Pachia, vaaw BAWIPAW nynh hynhte a ho: Nanning te nae zu hae nynh, ‘Kaening nynh vaaw siapharannung kalan silawnaw rae lan te niapaw silawnawpaw kha bu lan cite bya kae kinku vae thyhte kae cyih cih,’ cite bya te na ho oh paw kha nae cyisahnaw te na ccingsah vae oh. Bya na kinku oh paw kha tynsah oh lah, niapaw silawnaw kha rae ccaleih oh!

²⁶Tukeiccuze Izip ram a um hae paw Judah hae nanning balyn nynh BAWIPAW bya hynh thaetua oh: BAWIPAW nynh a hopaw tuh, Izip ram pynpi kya Judah hae lu kheit munglae nynh sanmah, ‘Bawipaw PACHIA tuh a hiin,’ cite ka min kha a ho vae khyh nawlan, alesaepaw ka min te bya ka kinku, a ci.

²⁷Nae tungvaw hoynaw pya khylan thua leite, hoyleinaw ccawsah khylan kae dokhaw cih oh; Izip ram a um hae paw Judah hae balyn tuh lu kheit san a laehy lei lan ciate thaloi te ccakanccinaw khate aroh cih hae.

²⁸Te thaloi kyate lue zah Izip ram kyate Judah ram lang a kipaw milu tuh azya cih; Izip ram lang khuasah lan a thua hae paw Judah hae a laehy hae paw balyn nynh, minmin bya tou atyn, tuhkhyhze kae ka bya tou atyn, cipaw kha a nyh cih hae.

²⁹BAWIPAW nynh a hopaw tuh, Nanning rawsenawpaw ka bya tuh solei accing cih cipaw na ny nawlan oh, e hmin kya nanning detah lanpaw muihsahnaw tuh hynhte nynh thua:

³⁰Judah siapharan Zedekiah kha a hiinnaw a ccungpaw, a rhaw athuapaw Babilon siapharan Nebukhadnezzar kuih kalan ka pya hawte, Izip siapharan Faro Hofra kha a hiinnaw a ccung hae paw a rhaw hae kuih kalan ka pya cih, cite BAWIPAW nynh a ho.