Read Zotung Chin JEREMIAH 46 Bible Online

JEREMIAH 46 - Zotung Chin bible

JEREMIAH 46

¹Minphuin hae konglangte Jeremiah kya yn thuapaw BAWIPAW bya:

²Josiah ccapaw Jehoiakim nynh Judah siapharan lang a tangnaw kum palinaw kum khe, Babilon siapharan Nebukhadnezzar nynh Zufrates vawkhu kin e Karkhemish khua kya a taepaw Izip siapharan Faro Neko a rhawkaw hae te asekuhpaw BAWIPAW bya tuh:

³Khawriaphua adihpaw te alepaw kha paccyn oh lah, rhawtuk lan malang cceih oh!

⁴Marang hae kha ade de oh lah, cciku tua oh! Sivawlukhung kha khungkuh oh, nae ccoi kha tawkuh oh lah, sivaw angki kha kiku tua oh!

⁵Pawkeiccumou a rih hae paw minmin kha ka muih hae? Minmin tuh nulang a ki hae; mih rhawkaw hae tuh shung hae zah thawte a ccue hae. Nulang dohui khyh hae, mih pepan balyn rinaw te phe abeih! cite BAWIPAW nynh a ci.

⁶Myarya rang lan a ccue kho hae paw mah lue kho khyh hae, rhawkaw hae mah lue kho khyh hae; Palung lang Zufrates vaw pe khe thykuh hae zah a khuliakuh hae.

⁷Nal vaw athopaw hawte thuasah, tui alepaw vaw hawte thuasah yn thokuhpaw tuh hummou athua?

⁸Izip tuh Nal vaw hawte thuasah, tui alepaw vaw hawte thuasah yn thokuh. Ka le cih, laephi kha ka bong cih, khuapi hae te tuin kya um hae paw kha ka roh cih hae, a ci.

⁹Pou marang hae, malang cceih oh, pou marangle hae, thawte ccue oh! Rhawkaw hae tuh malang cceih hae sah: Ethiopia hae te khawriaphua a ccyngkuh hae paw Put hae, the te li kawthya hae paw Ludi hae tuh malang cceih hae sah.

¹⁰Tuin nin tuh vaaw PACHIA Bawipaw nin, a rhaw hae kyate thyaaccounaw mue khylan liaru nin nynh thua. Thaloi nynh a ae cih zah a byn cih, mih chii kha phe byn lan a neih cih. Pawccecize vaaw PACHIA, Bawipaw nynh palung lang ram Zufrates vaw kin khe silawnaw kha a rae cih.

¹¹Pou ccanung liaccady Izip, Gilead lang cceihthung lah, dannawpaw balm sii kha lawtua, sii patae kha alakaw lan na mang vae, dannaw na muelae khyh.

¹²Na maethyanaw kha minphuin hae nynh a thae vae hae, na rawnaw tuh laephi pynpi kya phe azeihkuh; rhawkaw lu kheit nynh ccangpaw lu kheit kyakhe thykuh zah, parouh mawte a khuliakuh hae, a ci.

¹³Babilon siapharan Nebukhadnezzar nynh Izip ram kha tuk khylan yn ccianua lanpaw kong, profeh Jeremiah kya yn thuapaw BAWIPAW bya tuh:

¹⁴Izip ram kya ho oh lah, Migdol kya, Memfis kya te Tahpanhes kyakhe, “Umnaw dokute paccynkuh oh, pawccecize nae pepan um hae paw kha thaloi nynh a laang vae cih hae,” cite thaesah oh.

¹⁵Pawccemou Apis tuh a ccue? Pawccemou nae zohtuh tangnuapaw tuh a thadyn khyh? BAWIPAW nynh tuu zah a khulia keiccu nynh thua.

¹⁶Nae ccungccaw hae tuh thykuh hae zah a khuliakuh hae, te lu kheit te lu kheit hokuh hae zah, “Thoku tua, a rosah thyapaw thaloi keiccuze ahmaw ccungccaw hae kalan, ah puinaw ram lang ki oh sih,” a ciku hae.

¹⁷Izip siapharan Faro kha, “Amaw ccyhhoy kha a liasah hanpaw, a bya ccakaepaw,” cite minphu oh.

¹⁸A min vaaw BAWIPAW a cikuhpaw Siapharan nynh a hopaw tuh: Kae tuh ka hiin thyhte, mua hae kyaze Tabor mua hawte thuasah, rili kin umpaw Karmel mua hawte thuasah tuh-e siapharan tuh yn thua cih.

¹⁹Pou ccanung Izip, kyngkute ramccang lang cciakhaeku khylan paccynkute umtua! Pawccecize Memfis khua tuh alakawpaw, arohpaw, ccungccaw um leipaw lang a tang cih.

²⁰Izip tuh apuithyapaw vaetua tohlaw nynh thua, tuhzemah palung langte kaekih nynh a thuanua vae.

²¹A ram lungkhu e hohpaw a ccungccaw hae heize thobaleihpaw vaetuataw te nynh a loku hae; minmin mah maeleihkuh hae zah, thadyn leite a ccuekheih hae; pawccecize minmin ronaw nin, detahnaw ccyh nynh a thuanua vae hae.

²²Izip tuh a ccuepaw hupaw hawte a roi a saw; pawccecize a rhaw hae patae nynh thing a nge hae paw hawte, hae khate oun ccianua hae.

²³Minmin tuh tungkhipaw laeze lung hae zah, riatae a um khyh hae keiccuze Izip a ramkaw tuh myarya azi zemah, minmin nynh pong a nge cih hae. cite BAWIPAW nynh a ci.

²⁴Ccanung Izip tuh maethya a ccou cih; thahlang e ccungccaw hae kuih kalan ap athua cih.

²⁵Israel Pachia, vaaw BAWIPAW nynh a hopaw tuh: Dotua, Thebes khua e Amon pachia tungvaw thuasah, Faro, Izip te a pachia hae te a siapharan hae, Faro te Faro a doliakuh hae paw tungvaw thuasah detahnaw ka thuasah cih.

²⁶Minmin chia a ry hae paw Babilon siapharan Nebukhadnezzar te a kuihkaw e bawi hae kuih kalan khe minmin kha ka ap cih hae. Tukoute Izip ram tuh langmawlya hawte ccungccaw bua a um cih, cite BAWIPAW nynh a ci.

²⁷Pou ka ryalahtu Jakob, rih nan, Pou Israel, na lungroh nan sah; pawccecize nang kha asawnaw kyate kae khum cih zah, na ciihan hae kha a kyngnaw hae ram kyate ka khum cih hae. Jakob tuh a kithui cih zah thawdangte daebabi lan a um cih, humhung nynh mah Jakob kha risah lan khyh, cite BAWIPAW nynh a ci.

²⁸Ka ryalahtu Jakob, rih nan, pawccecize na kya ka um. Nang kae denaw ram hae balyn kha ka roh cih hae, thuasalama nang tuh kae roh lan khyh! Nang kha ahmete kae thuihei cih zah, detah leite ruarua tetuh kae luesah lan khyh, cite BAWIPAW nynh a ci.