Read Zotung Chin JEREMIAH 48 Bible Online

JEREMIAH 48 - Zotung Chin bible

JEREMIAH 48

¹Moab ram konglangte, Israel Pachia, vaaw BAWIPAW nynh hynhte a ho: Nebo khua hanlan ngaethya lan kou um, phe roh vae! Kiriathaim tuh law thua vae zah, maethyanaw a mue vae; rhawlungrua kha tingbung thua zah, maethyanaw a mue vae;

²Moab minthaannaw tuh um vae khyh. Rhaw hae nynh Moab kha rawsete Heshbon khe hoyleinaw khuakhankuh hae zah, “Rang oh, minphuin phuin kheit athuanaw kyate vua oh sih!” a ciku hae. Pou Madmen khua, nang mah ro na thua cih; thaloi nynh nang kha ae deehui cih.

³Horonaim khua e siaruanaw roi tuh ngaetua oh! “Ccungccaw kharouh daenaw te myarya lepaw ronaw!” a ci hae.

⁴“Moab ram tuh aroh vae!” Moab ram e imua hae tuh a siarua hae.

⁵Luhith lang kaethungnaw khe ccihtaci lan rawkhuite a kaethung hae; Horonaim lang rungbungnaw khe lungriathae thinphangnaw roi kha a thae hae.

⁶Ccue oh! Na lue oh ccaw ccue oh! Laesia ram e lann hawte ccue oh!

⁷Thanccingte, na thawzung te na sisua kha na doliaku keiccuze nang mah ae lah cih hae; na pachia Khemosh tuh a ranpibawi hae te a ryalahtu hae ryte kyngte ramccang lang a cciakhae cih hae.

⁸Rohtu hae tuh khua takyh a thua cih hae zah, aluepaw khua um lan khyh; BAWIPAW nynh a ho vae hawte, accya tuh azo cih zah, bialae tuh aroh cih.

⁹Moab hanlan shawkulung bingpah oh, pawccecize aning tuh solei a khulia vae cih; a khua hae tuh ccungccaw a um leinaw, adaepaw khua lang a tang vae cih.

¹⁰BAWIPAW ryalaw kya a sawphahkuhpaw tuh thyalawnaw tung sah; chiise luasah nawlan a thaloi a mang ry leipaw tuh thyalawnaw tung sah.

¹¹Moab tuh misu ahaaw vawlan e atui hawte, a zawthaw lya mawte ngaengante a um, aning tuh ang angkheit kyate angkheit kalan lia boi khyh hae, kyngte ramccang lang cciakhae boi khyh hae; tukeiccuze misutui tuh athuanaw zo khyh zah, amynkhuhnaw mah zo khyh.

¹²Tukeiccuze BAWIPAW nynh a hopaw tuh: Minmin kha misutui hawte lia khylan a liatu hae kha ka sawnuanaw ccyh tuh solei yn thua cih; minmin nynh Moab ang hae kha khaleih a lae cih hae zah, a lungre hae kha palae tui lan a koi cih hae.

¹³Tetuh Israel phin tuh a doliakupaw Bethel pachia keiccu maethyanaw a mue hawte, Moab tuh Khemosh pachia keiccu maethya a ccou cih.

¹⁴“Aening tuh rawhoy hae paw te athawsaepaw rhawkaw hae nynh ah thua oh,” cite pawtemou na ho kho oh?

¹⁵Moab te a khua hae a rohtu tuh yn cceihthung vae hae, a po hae paw ccangvae hae tuh chiakunaw teing khylan a cceihbung vae hae, cite a min vaaw BAWIPAW acihkuhpaw Siapharan nynh a ci.

¹⁶Moab hanlan shethya tuh anae vae, a ronaw tuh arangte yn naekuh vae.

¹⁷Moab pepan um hae paw balyn te a min a nyh hae paw balyn tuh Moab hanlan rah oh lah, “Athungpaw ccoi, aphu-epaw hoitang tuh phe khya vae rei!” cite ho oh.

¹⁸Ccanung Dibon khua e bawitungkhung kya a haung hae paw, phu-enaw kyate rungbung oh lah, laerou vawlan haungtua oh! Moab a rohtu nynh nang kha ae ccianua thung vae; na rhawlungrua kha a ro vae.

¹⁹Pou Aroer khuaccaaw hae, laanpi pe khe thadyn oh lah, dotua oh! A ccuepaw pisepaw te a luepaw nopinung kha, “Pawmou acyihkuh?” cite khiatua oh.

²⁰Moab tuh aro vae keiccuze maethyanaw a mue vae; rawkhuite a siarua vae! Moab tuh phe roh vae, cite Arnon vaw pe khe ho oh.

²¹Mua vaw bialae e khua hae, Holon, Jahzah, Mefath,

²²Dibon, Nebo, Beth-diblathaim,

²³Kiriathaim, Beth-gamul, Beth-meon,

²⁴Kerioth te Bozrah khua hae kya thuasah, asawnaw te anaenaw umpaw Moab ram e khua hae balyn kya byapianaw a thua vae.

²⁵Moab ki kha moi thua vae zah, a kuihbaw kha khya athua vae, cite BAWIPAW nynh a ci.

²⁶Moab kha ruisah oh, pawccecize aning nynh BAWIPAW kha rawse zah a pooku; Moab tuh amaw a lua kyakhe kalouhkuh sah lah, nuinsepaw lang tang sah.

²⁷Israel tuh miruh hae ryte kyngkheihpaw athua lei pite, nang nynh na sarya; aning kong na ho takyhte sarisarya na nung!

²⁸Pou Moab kya um hae paw, khua hae kha cciataw oh lah, lungkarung kya um oh! Lungkarung arae kya a bu a luakuhpaw vahu te lokuh oh.

²⁹Moab nynh a lysakunaw kha phe kae thae vae— aning tuh myarya a lysakuh— a tansakunaw, a lysakunaw, a lungkhungnaw te a thinlung a hangsahkunaw kha phe kae thae vae.

³⁰Kamaw ccaccei nynh a lysakunaw kha ka ny vae, a pookunaw tuh accakaepaw thua zah, a cyisahnaw mah accakaepaw nynh thua, cite BAWIPAW nynh a ci.

³¹Tukeiccuze Moab hanlan rawkhuite ka um; Moab hae balyn hanlan ka rah; Kir-heres ccungccaw hae hanlan ka rah ka khui.

³²Pou Sibmah misu ku, Jazer khua hanlan laeze nang na hanlan ka rahhua! Na misu akaran hae tuh rili po khung hae zah, Jazer cia phe thua hae; hawnin e na thingthae hae te na misu thae hae kha rohtu hae nynh a ro vae hae.

³³Moab ram hoypaw kyate lungtuanaw te lungpawnaw kha law athua vae; misu mianaw khu kyate misutui kha ka kansah vae; lungtua siaruate misu thae a nonpaw lu kheit san um vae khyh; siaruanaw tuh lungtua siaruanaw thua vae khyh.

³⁴Heshbon khua te Elealeh khua tuh rah hae zah, mih rawnaw roi tuh Jahaz cia athan, Zoar khua te mah thae hae zah, Horonaim te Eglath-shelishiyah kyacia athan. Pawccecize Nimrim vaw taraw heize phe akan.

³⁵Te Moab ram e ahangnaw hmin kya silawnaw a rae hae paw te mih pachia hae kalan a pyatu hae kha ka zosah cih hae, cite BAWIPAW nynh a ci.

³⁶Tukeiccuze ka thinlung tuh Moab hanlan phyly hawte a khui, te ka thinlung tuh Kir-heres ccungccaw hae hanlan phyly hawte a khui; pawccecize a mue hae paw mih hoirumnaw tuh phe roh vae.

³⁷Ccungccaw miakaw mih lu a okuh hae, mih khawming a ngokuh hae, mih kuih awkuh hae zah, mih tae kya buriboei a voiku hae.

³⁸Moab ram e innccukaly miakaw kya te khualae e laanpi hae kyakhe rawkhuinaw rou nynh a um; pawccecize humhung nynh mah a ry lei vae paw ang hawte, Moab kha ka koi vae, cite BAWIPAW nynh a ci.

³⁹Moab tuh phe koi vae ccarei! Rawkhuite a um vae rei! Moab tuh maethyate nulang a sihkuh vae rei! Tukeiccuze Moab tuh a sarya hae paw lang tang vae zah, a pepan e ram balyn nynh a ri hae paw lang a tang vae.

⁴⁰BAWIPAW nynh hynhte a ho: Dotua, aning nynh mosi hawte Moab kha a uingnuakuh cih zah, a sake a dawnua cih.

⁴¹Khua hae te rhawlungrua hae kha a lah cih hae. Tuin nin vae tuh, Moab rhawkaw hae thinlung tuh neitangia accihpaw nopinung thinlung te alokuh cih.

⁴²Moab nynh BAWIPAW kha rawse zah a pooku keiccuze aroh cih zah minphuin phuin kheit thua vae lan khyh.

⁴³Pou Moab ram um hae paw, rinaw, hunghua te kaang hae tuh nae malang phang um hae! cite BAWIPAW nynh a ci.

⁴⁴Rinaw kyate a ccue hae paw tuh hunghua lungkhu lang accah cih hae, te hunghua lungkhu kyate a lue hae paw miakaw tuh kaang kya a kae cih hae. Detahnaw a mue kum hae khe, e uccaw hae hynh Moab tungvaw ka thuasah cih, cite BAWIPAW nynh a ho.

⁴⁵Rhaw kyate oun lue hae paw tuh mih thawbang keiccuze Heshbon mynlyh kya a haeung hae; Heshbon khua kya-e Sihon siapharan inn kyate maeesoi apou keiccuze Moab ramri hae te rhawdou a ry hae paw kya-e mua ahang hae paw kha tuh-e maee nynh a u vae.

⁴⁶Pou Moab, na hanlan ngaethya lan kou um! Khemosh pachia a beik hae paw tuh a roh vae hae, nae ccanung hae te nae ccapaw hae kha kyng hae zah a cciakhae vae hae.

⁴⁷Tuhzemah Moab hae kha nyalang ccyh kya bua ka kikhae cih hae, cite BAWIPAW nynh a ci. E kyacia hynh Moab tungvaw byapianaw nynh thua.