Read Zotung Chin JEREMIAH 50 Bible Online

JEREMIAH 50 - Zotung Chin bible

JEREMIAH 50

¹Babilon khuapi, Khaldi hae ram konglangte BAWIPAW nynh profeh Jeremiah a hopyapaw tuh:

²Minphuin hae kha thaesah oh, thuruh leite alan kha sae oh lah thaesah oh, hynhte ho oh: Babilon khuapi tuh law athua vae, Bel pachia tuh maethyanaw a mue vae, Marduk pachia tuh a lungroh vae. Babilon a zohtuh hae tuh maethyanaw mue hae zah, mih lungroh vae.

³Pawccecize palung lang e minphuin phuin kheit nynh Babilon kha yn ccianua vae, ccungccaw lu kheit san a um lei lan ciate ccungccaw phe a daesah cih; ccungccaw te sarangpaw hae tuh pong a ccue cih hae.

⁴BAWIPAW nynh a hopaw tuh: Tuin nin vae tuh Israel hae te Judah hae tuh pynkheihlan a cceih cih hae zah, BAWIPAW mih Pachia kha rawkhuite a ccung cih hae.

⁵Zion langkhe mih mitmae hawite, Zion lang cceihpaw laanpi kha a khia cih hae, te ning kho a um vae cih leipaw, zungzae tynpaw byakinnaw khate BAWIPAW kalan a cceih cih hae zah a tungkuh vae cih hae.

⁶Ka ccungccaw hae tuh azopaw tuu hae nynh thua vae hae; mih tuurin hae nynh mua hae vawlan khe a cciakhaesei vae hae; mua muakheit kyate muakheit kalan cceih hae zah, mih tuukhia kha a ning vae hae.

⁷A muihpaw balyn nynh minmin kha a ae cih hae zah, mih rhaw hae nynh, “Aening tuh ah sei khyh oh, pawccecize a paeenaw hae ahmepaw ramno athuapaw te mih paaw hae nynh a doliakuh hae paw BAWIPAW tungvaw khe minmin nynh a sei hae keiccu nynh thua,” cite a hoku vae hae.

⁸Babilon kyate ccue oh, Khaldi hae ram kyate pou oh lah, miaa phu a cciakhaepaw miaatepaw hae hawte thua oh.

⁹Pawccecize thahlang e minphuin le hae paw aphu kha ka tuhou cih zah, Babilon lang ka cciakhae cih hae; Babilon kha paccynnuakute a tuk cih hae zah a lah cih hae. Mih the tuh kuih ccakaete a kihan leipaw, thekawthyapaw rhawkawpaw the hawte athua cih.

¹⁰Khaldi ram tuh luadepaw lang a tang cih zah, luadetu hae tuh phe a byn cih hae, cite BAWIPAW nynh a ci.

¹¹Pou ka rho ccungccaw hae kha a rohtu hae, nanning tuh lungtua lungpawte na um oh zemah, lonua vawlan sakalialaw a leihpaw vaetua tohlaw hawte na thua oh zemah, rangtepaw hawte na sia oh zemah,

¹²nae nung tuh maethyanaw a mue cih zah, nanning ae saahnung oh tuh thethya a ccou cih. Babilon tuh ram hae kyaze anyaa huaccepaw, ramkaw, ramrou te laesia ram lang a tang cih.

¹³BAWIPAW thinrianaw keiccuze ccungccaw um leite, ccungccaw phe adaepaw ram athua cih. Babilon pe po a cceihpaw miakaw tuh a siikuh cih hae zah, a vaemaw keiccuze saryanaw roi a sawnua cih hae.

¹⁴The te li a ccyngkuh hae paw balyn, Babilon kha koihlute rhawtuk lan paccynnuakuh oh; nae the kha nungban leite kaw oh, pawccecize aning nynh BAWIPAW tungvaw phe a sei vae.

¹⁵Teitei lang balyn te Babilon kha, “Aning tuh a shung vae; a rhaw thungkhawnawpaw tuh a khuliakuh vae, a khualungrua tuh ating vae,” cite sianua oh. Pawccecize hynh-e hynh BAWIPAW liarunaw nynh thua: a tungvaw liaru oh, aning nynh a la cyi hawte a tungvaw cyihru oh.

¹⁶Babilon ram kya ccacii a tupaw te loohrue ccyh lya rungkou te looh a ruepaw kha theih oh; ccungccaw rohtupaw thaloi keiccuze mih balynte mih ccungccaw hae kalan a ki cih hae zah, mimaw ram lang khaleih a ccue cih hae.

¹⁷Israel tuh chindeih hae nynh sawde te a dee hae paw tuu hae hawte nynh thua. Assiria siapharan nynh masaty ae hae zah, atu athangnaw kya Babilon Siapharan Nebukhadnezzar nynh a ru kha a ree.

¹⁸Tukeiccuze, Israel Pachia, vaaw BAWIPAW nynh hynhte a ho: Assiria siapharan kha de ka tah hawte, Babilon siapharan te a ram kha de ka tah cih.

¹⁹Israel kha a paeenaw hmin lang ka kikhae cih zah, Karmel mua te Bashan mua vawlan khe ram a paeekuh cih, Efraim sangpyng hae te Gilead mua vawlan khe phe byn lan a ae cih hae.

²⁰Tuin nin te tuin ccyh khe, Israel a hoyleinaw kha ccung athua cih zah muih thua lan khyh; Judah seinaw kha muih thua lan khyh; pawccecize ka haang vae hae paw, a laehy hae paw seinaw kha ka ngaethya cih hae, cite BAWIPAW nynh a ci.

²¹Merathaim ram kha rawsete ccianua thung oh, Pekod ram kya um hae paw kha tuk oh, minmin kha phe thang lan khaleih roh oh, nanning kaw kae pya oh paw balyn kha cyih oh, cite BAWIPAW nynh a ci.

²²Tuin ram kya rhawtuknaw roi te myarya lepaw ronaw roi kha accae!

²³Laephi pynpi a tudepaw khynlyng tuh bae thua zah phe khya vae! Babilon tuh minphuin hae laku kya ri lan umpaw lang a tang vae!

²⁴Pou Babilon, namaw toulou kha kaang na syakhawkuh zah na kae vae, thuasalama tuh-e tuh na nyh khyh; BAWIPAW kha na rawse ngan keiccuze nang kha ae muih hae zah ae kyng vae hae.

²⁵BAWIPAW nynh a zunghe inn kha hung zah, a thinrianaw zunghe hae kha a toikhaekuh vae, pawccecize vaaw Bawipaw PACHIA nynh Khaldi ram kya cyi lan a hoipaw rya nynh thua.

²⁶Teitei langte balyn yn ccianua oh lah, a ccung-inn hae kha hung oh; looh apumkuhpaw hawte pum oh lah, khaleih roh oh; paw sanmah alaepaw um nan sah.

²⁷A tangnua hae balyn kha theih oh, sawchianaw kalan marya cciasah bung oh. Minmin hanlan ngaethya lan kou um, mih ccyh, minmin detahnaw nin tuh a thua vae!

²⁸Ngaetua oh! BAWIPAW ah Pachia phulawnaw, a beikinn a ropya hae keiccuze phulawnaw kong kha Zion kya siakhae khylan, Babilon ram kyate ccue hae zah a lue hae paw roi tuh accae.

²⁹Babilon dou khylan thekawthya hae paw balyn kha pum oh. Babilon kha po voilu lan ryahmin tahnuakuh oh, lu kheit san lue nan sah. A cyisahnaw thyhte amaw kha liaru oh; a cyi hawte a tungvaw cyihru oh, pawccecize Israel Pachia Athyaapaw, BAWIPAW kha pawlangria leite a dou vae.

³⁰Tukeiccuze a ccangvae hae tuh khualae e laanpi hae kya a khuliakuh cih hae zah, tuin nin khe a rhawkaw hae balyn tuh ro athua cih hae, cite BAWIPAW nynh a ci.

³¹Vaaw Bawipaw PACHIA nynh a hopaw tuh: Pou lungkhungpaw, nang kha kae rawse, pawccecize nang kha de kae tah cihnaw ccyh, na ccyh tuh a thua vae.

³²A lungkhungpaw ccungccaw tuh a thykuh cih zah a khuliakuh cih, a thotu lu kheit san um lan khyh, a khuapi kha maee te ka soi cih zah, a pepan umpaw atyn-are kha pong a u cih.

³³Vaaw BAWIPAW nynh hynhte a ho: Israel hae tuh tuaasahkunaw a teing hae, Judah hae mah tuhcite a teingbua hae; minmin a kyngtu hae balyn nynh minmin kha ccavyng kyng hae zah, cciasah lan phe a mya hae.

³⁴Thuasalama minmin Shawkhawtu tuh a thung, a min tuh vaaw BAWIPAW a cikuh. Aning nynh mih byathan kha a hokhae ccaccing cih hae zah, ram kha a daesah cih, thuasalama Babilon khuaccaaw hae kha tuh sasulalae a nung cih hae.

³⁵BAWIPAW nynh a hopaw tuh: Khaldi hae, Babilon khuaccaaw hae, bawi hae te mihaw hae tungvaw thaloi accah cih!

³⁶A pawe hae paw tungvaw thaloi accah cih zah, mingaee lang a tang cih hae! Babilon rhawkaw hae tungvaw thaloi accah cih zah, minmin tuh aroh cih hae!

³⁷Babilon marang hae te a marangle hae tungvaw thuasah, amaw kya umpaw ramccang rhawkaw hae balyn tungvaw thuasah thaloi accah cih zah, nopi hawte athua cih hae! Babilon a sisua hae balyn kyakhe thaloi accah cih zah, a luade cih hae!

³⁸Khuaakannaw keiccuze Babilon tui tuh karae arou cih! Pawccecize Babilon tuh zohtuh ram thua zah, minmin tuh zohtuh hae khate a ngaeekhaekuh hae.

³⁹Tukeiccuze loramsaw hae tuh ram-ui hae ryte Babilon kya a umkheih cih hae zah, kalauh pavaw hae mah a um cih hae, Babilon tuh ccungccaw umnaw hmin, she takyh kya ccungccaw umpaw hmin thua boi vae lan khyh.

⁴⁰Pachia nynh Sodom, Gomorrah te mih pepan e khua hae kha a ro lya hawte, tuin kya a umtu te khuasahtu lu kheit san um vae lan khyh.

⁴¹Dotua, minphuin phuin kheit tuh palung langte yn cceih cciamang vae; minphuin athungpaw te siapharan hae patae tuh laephi adianaw kyate mih lungtho hae.

⁴²Minmin tuh li te ccoi kha a ccyngkuh hae, mih rysawthah zah thawccinaw hoi khyh hae. Mih roi tuh rili roi te nynh aloku; pou ccanung Babilon, rhawtuk lan a paccynkuhpaw rhawkawpaw hawte, minmin nynh marang ccikute nang kha ae ccianua vae hae.

⁴³Babilon siapharan nynh tuh-e kong tuh thae zah, a kuih a khua phe chih, lungriathaenaw nynh thuanua zah, neitangia ccihpaw nopi hawte a teing.

⁴⁴Jordan vaw kin thing alungnaw kyate zungzae hinlalyhpaw sarangpaw hae rampaeekunaw hae kalan yn cceihthungpaw chindeih hawte, minmin kha Babilon kyate ccaring ka dee kangmaw cih hae zah, ka popaw kha Babilon kya ka nung cih. Pawccecize kae yn lopaw hummou a um? Hum nynh mou kae kha tungku lan yn ko kho? Ka malang a thadyn nganpaw tuurintu a um tou?

⁴⁵Tukeiccuze BAWIPAW nynh Babilon tungvaw a paccyn nuapaw te Khaldi ram kha rawsete eenaw a raenuapaw kha thaetua oh: Accaccing lante, tuuphu kya-e a nohua hae paw kha ccaring a sue cih hae; accaccing lante, mih tuukhia kya-e tuu hae nynh a tung hae paw keiccuze a siikuh cih hae.

⁴⁶Babilon kyng lya-e roi keiccuze laephi tuh ahy cih; a rawnaw roi tuh minphuin hae nynh a thae cih hae.