Read Zotung Chin JEREMIAH 52 Bible Online

JEREMIAH 52 - Zotung Chin bible

JEREMIAH 52

¹Zedekiah tuh kum kuin lae kheit acih te, ram kha uk takaw zah, Jerusalem kyate kum haw lae kheit a uk. A nung min tuh Hamutal cikuh zah Libnah khuapaw Jeremiah ccanung nynh thua.

²Jehoiakim nynh a la rae hawte, Zedekiah nynh BAWIPAW muihnaw kya hoyleinaw kha a rae.

³Jerusalem te Judah nynh BAWIPAW kha myaryamaw a thinriasah hae zah, aning nynh minmin kha a muihnaw kyate ccaring a dee hae. Zedekiah nynh Babilon siapharan kha a dou.

⁴Zedekiah nynh siapharan lang a tangnaw kum takuanaw, sawpaw sah hawnaw, nin haw nin khe Babilon Siapharan Nebukhadnezzar tuh a rhawkaw hae balyn ryte Jerusalem kha oun ccianua hae zah a koihlu hae; khuapi po voilu lan laekarung kha a thaenuaku hae.

⁵Zedekiah nynh siapharan lang a tangnaw kum haw lae kheitnaw cia khuapi kha a koihlu hae.

⁶Tuh-e kum, sawpaw sah palinaw, nin takua nin khe khuapi kya ccakan myarya ccih zah, ram kya-e ccungccaw hae hanlan looh um vae khyh.

⁷Tetuh Khaldi hae nynh khualungrua kha ting hae zah, khuapi po voilu lan a um hae zemah, Judah rhawkaw hae balyn tuh khuazi khe ccue hae zah, siapharan khokhu pe umpaw khualungrua ccangning laku e koikua kyate khuapi atolang poute Arabah langkhe a cceih hae.

⁸Thuasalama Khaldi hae nynh siapharan Zedekiah kha deehui hae zah, Jeriko bialae khe a phya hae; a rhawkaw hae balyn nynh amaw kha ccuetaw hae zah pong phiakuh hae.

⁹Tetuh siapharan kha kyng hae zah, Hamath ram Riblah khua umpaw Babilon siapharan kalan a thuakhae hae, te aning nynh Zedekiah kha bya a pia.

¹⁰Babilon siapharan nynh Zedekiah ccaaw hae kha mih paaw muihnaw khe a chia hae, Judah bawi balyn kha mah Riblah khua khe a chia hae.

¹¹Babilon siapharan nynh Zedekiah mit kha a khoi koute sivawrui te a khii, te Babilon lang cciakhae zah, a chih cia thong a saw.

¹²Nebukhadnezzar nynh Babilon siapharan lang a tangnaw kum haw lae takuanaw kum, sawpaw sah pangawnaw, nin haw nin khe Babilon siapharan a pyn rhawviapahtu hae rhawbawipaw Nebuzaradan tuh Jerusalem lang a tee.

¹³Aning nynh BAWIPAW inn, siapharan inn te Jerusalem e inn balyn kha maee te a soi; inn lepaw miakaw kha maee te khaleih a soi.

¹⁴Rhawviatu rhawkaw hae bawipaw ryte a umkheih hae paw Khaldi rhawkaw hae balyn nynh Jerusalem akoihlupaw khualungrua balyn kha pong a ting hae.

¹⁵Rhawviatu hae bawipaw Nebuzaradan nynh khuapi kyaze mih ryachi huapaw abang, khuapi kya a laehy hae paw, Babilon siapharan kalan a ccue hae paw te a laehypaw kuihhae hoy hae paw kha pynkheihlan Babilon lang a cciakhae hae.

¹⁶Thuasalama rhawviatu hae bawipaw Nebuzaradan nynh ram lungkhu e mih ryachi huapaw ccungccaw hae abang kha misu khokhu kya ryalahtu lang te loophotu lang a cciataw hae.

¹⁷BAWIPAW inn kya umpaw sohin tung hae, tui nungnawpaw rahung te a thadynnawpaw atung hae kha Khaldi hae nynh zoihtatyh lan khya hae zah, sohin balyn kha Babilon lang a cciakhae hae.

¹⁸Ang hae, buhhawlua, tetakia hae, pakepi, angsaw hae te beikinn ryalawnaw kya mangpaw sohin te raekuhpaw angphe balyn kha a cciakhae hae.

¹⁹Sui te ngun khate raekuhpaw pakekhupaw adihpaw hae, maee-e nungnawpaw pake hae, pakepi hae, ang hae, maeekhuatung hae, angsaw hae, niapaw pyanawpaw pakekhupaw hae kha rhawviatu rhawkaw hae bawipaw nynh ccaring a cciakhae.

²⁰Solomon Siapharan nynh BAWIPAW inn elang a raepaw tung tungning, tuikua kua kheit, tuikua kaw umpaw sohin vaetua ccanghaw lae ning, e sohin angphe hae balyn tuh aripaw kha tou kho um lei lan ciate alung.

²¹Tung tungkheit ze dong haw lae tarya hang zah, alepaw dong haw lae ning acih; alungkhu tuh ua zah zong pali athaaw.

²²Tung adung khe sohin te raekuhpaw tunglukhung a um; tuh-e tunglukhung tuh dong pangaw hang zah, adung tuh po voilu lan sohin te raekuhpaw sivaw te ccalee thae a um hae. Te tung tungningnaw tuh mah ccalee thae te tuhcih maminte a um.

²³Tung voikheit langte ccalee thae tuh sung takua ccangtaruh um zah, sivaw kya po voilu lan a umpaw ccalee thae tuh za kheit acih.

²⁴Rhawviatu rhawkaw hae bawipaw Nebuzaradan nynh ranpibawi lepaw Seraiah, ranpibawi Zefaniah te beikinn thuakaw ngawtu lu thum kha a cciakhae hae.

²⁵Khuapi kyate rhawkaw hae a uktu rhawbawi lu kheit, khuapi kya muih athua hae paw siapharan kungsi kya-e lu sari, ram lungkhu e ccungccaw hae kha a sueluatupaw ryaccinkhan lu kheit, khuapi kya muih athua hae paw ram lungkhu e ccungccaw sung taruh kha a cciakhae hae.

²⁶Te rhawviatu hae bawipaw Nebuzaradan nynh minmin kha Riblah khua umpaw Babilon siapharan kya a thuakhae hae.

²⁷Te Babilon siapharan nynh Hamath ram Riblah khua khe minmin kha bua hae zah a chia hae. Tuhcite Judah hae tuh kyng hae zah mih ram kyate ramccang lang a cciakhae hae.

²⁸Nebukhadnezzar nynh kyng hae zah a cciakhae hae paw ccungccaw milu tuh: Siapharan lang a tangnaw kum sarinaw kum khe, Judah hae thong thum lu kuin lae thum;

²⁹kum haw lae taryanaw kum khe, Nebukhadnezzar nynh Jerusalem kyate milu za tarya sung thum lu ning;

³⁰Nebukhadnezzar nynh siapharan lang a tangnaw kum kuin lae thumnaw kum khe, rhawviatu rhawkaw hae bawipaw Nebuzaradan nynh Judah hae kha za sari sung pali lu pangaw a cciakhae hae; mih balynte thong pali za taruh acih hae.

³¹Judah siapharan Jehoiakhin kha a kyngnaw hae te sung thum kum sarinaw, sawpaw sah haw lae ningnaw, nin kuin lae pangaw nin kya, Babilon siapharan Evil-merodak nynh ram a uk takaw kum khe, Judah siapharan Jehoiakhin kha thawccih zah thonginn kyate a luesah;

³²aning kha hoyte byabeih zah, Babilon khua amaw kya a um hae paw ccangpaw siapharan hae mih haungnaw laeze ahang huapaw haungnaw kha a pya.

³³Tukeiccuze Jehoiakhin nynh thonginn lungkhu a lawkupaw boeining kha khahkuh zah, a hiin lungkhu balyn siapharan ccaboi kya nin takyhte looh a ae.

³⁴A hiin lungkhu balyn, nin takyh aepaw kha a chi nin cia Babilon siapharan nynh a pya.