Read Zotung Chin JEREMIAH 8 Bible Online

JEREMIAH 8 - Zotung Chin bible

JEREMIAH 8

¹BAWIPAW nynh a hopaw tuh: Tuin ccyh vae tuh Judah siapharan hae ru, Judah bawi hae ru, ranpibawi hae ru, profeh hae ru te Jerusalem um hae paw ru kha mih shaw lungkhu te law athua cih;

²minmin nynh a la ry hae paw te rya a la lawpya hae paw, a la zui hae paw, a la ccung hae paw te a la beik hae paw khuanin, sawpaw te vaaw bawi hae malang khe pazaesaku athua cih hae; khah-e hae kha suelua thua lan khyh zah uu thua lan khyh hae; lae vawlan khe ia hawte athua cih hae.

³Ahoy leipaw e minphuin kya-e ahiinhy hae paw balyn nynh ka deenaw hae hmin miakaw kyakhe hiinnaw laeze chinaw kha a ryhua cih hae, cite vaaw BAWIPAW nynh a ci.

⁴Nang nynh minmin kya na hopya lan hae paw tuh, BAWIPAW nynh hynhte a ho: Ccungccaw tuh he a khuliaku vae ze, bua thokuh khyh tou? A cciasei ze, kithui khyh tou?

⁵Pawccemou e ccungccaw hae nynh ka kyate maeleihkuh hae zah, kithui leite a um zungzae hae? Hynbya kha ccavyng kyngkuh hae zah, kithui lan a mya vae hae.

⁶Pekite ka ngaepya hae zemah, asasite byaho khyh hae; “Pawmou ka cyisei!” cite ho hae zah humhung nynh mah a hoyleinaw kha ngaesikuh khyh. Rhawtuknaw lang a ccue cciamangpaw marang hawte, mih balyn mawte mih laanpi raveih langkhe a maekuh hae.

⁷Vaawlui kya azouthyapaw kaepaw-pavaw nynh heize amaw ccyh kha a nyku; vahu, ccipae te ccusae-pavaw nynh mah mih ki ccyh kha a nyku hae; thuasalama ka ccungccaw hae nynh tuh BAWIPAW phungzae kha nyh khyh hae.

⁸“Aening tuh ah haw oh zah, BAWIPAW kawbya tuh aening kya a um,” cite pawtemou na ho kho oh? Ccawzeitu hae kya-e ahynpaw bawpe nynh hynbya kha a rae.

⁹Mihaw hae kha maethyalaw athua cih hae, a siikuh cih hae zah kaang a kae cih hae; BAWIPAW bya kha he a ei hae te, minmin kya pawcihawpaw hawnaw mou a um?

¹⁰Tukeiccuze mih zu hae kha ming hae kalan ka pya cih hae zah, mih loo kha taetu hae kalan ka pya cih hae, pawccecize adih huapaw kyate ale huapaw kyacia mih balyn mawte ahme leite mue lan a karankuh hae; profeh kyate ranpibawi kyacia mih balyn mawte a hyn a hu hae.

¹¹Daenaw a um vae khyh ze, “Daenaw, daenaw,” cite ho hae zah, ka ccungccaw hae vaemaw kha oihsah khyh hae.

¹²Maethya lan umpaw kha cyih hae zah, anungsikuhpaw rya kha a law hae; tuhzemah mih maethah khyh, maethya mah nyh khyh hae. Tukeiccuze a khuliakuh hae paw kyakhe a khuliakuh bua cih hae; minmin kha de he ka tah hae te, vua athua cih hae, cite BAWIPAW nynh a ci.

¹³Minmin kha suelua ka ry hae, thuasalama misu ku kya misu thae um khyh, thaeku ku kya thaeku thae um khyh, anaw heize anaan, minmin ka pya hae paw kha minmin kyate phe azo vae.

¹⁴Pawccemou phang ah haung oh? Sueluakuh oh sih, akoihkhawkuhpaw khuapi hae kalan cceih oh sih lah, tuin kya chih oh sih; BAWIPAW tungvaw ah sei oh keiccuze, BAWIPAW ah Pachia nynh ro khylan oun vua vae, chi sii thungkuhpaw tui kha nia lan oun pya vae.

¹⁵Ngaengannaw kha ah ngaehoi oh zemah hoynaw ah mue khyh oh, dannaw ccyh kha ah ngaehoi oh zemah siikunaw kha nynh a um.

¹⁶Mih marang hae naduh kya-e accaepaw roi tuh Dan ram kyate phe thaekuh; mih marangtepaw hae nynh a siarua hae paw roi keiccuze ram pynpi tuh ahy. Minmin nynh oun thua hae zah ram te ram kya umpaw balyn kha thuasah, khuapi te khuaccaaw hae kha thuasah pong a ae hae.

¹⁷Dotua, zingsah kho athua leipaw huparepaw hae kha nae kalan kae sawnua cih oh zah, ae khyh cih oh, cite BAWIPAW nynh a ci.

¹⁸Ka lungpawnaw phe zo, ngaethyanaw nynh yn thuanua, lungrote ka um.

¹⁹Asawnaw ram um hae paw ka ccungccaw ryachi hae siaruanaw kha ngaetua oh: “BAWIPAW tuh Zion kya um vae khyh tou? A Siapharan tuh amaw kya um vae khyh tou?” cite a sia hae. (“Pawccemou mih zohtuh hae, ramccang zohtuh hae khate ka thin yn riasah hae?”)

²⁰“Loohrue ccyh athang vae, hawnin ccyh mah alia vae, aening tuh khum ah thua lae khyh oh,” a ci hae.

²¹Ka ccungccaw ryachi hae tuh vaemaw a mue hae keiccuze kae mah vaemaw ka mue, rawkhuite ka um zah, thinphangnaw te phe ka beih.

²²Gilead[1] ram kya dannawpaw isei um khyh tou? Tuin ram kya sibawi so um khyh tou? Pawccemou ka ccungccaw ryachi hae hynh a dan khyh hae?