Read Zotung Chin JEREMIAH 9 Bible Online

JEREMIAH 9 - Zotung Chin bible

JEREMIAH 9

¹Ka lu hynh tuisung thua sah lah, ka mit hynh mitphi apounaw tuidy thua vae sah, tuhteze nynh a chih hae paw ka ccungccaw ryachi hae hanlan khuazi khuadae ka rah kho cih!

²Ka ccungccaw hae kha cciataw te asawnaw lang ka ccia kho nawlan, laesia ram khe ryanawpaw bu bukheit ka hoi ravo nyn! Pawccecize minmin tuh milae zu milae vawpaw te seinaw rae hae paw thua zah, mih lungzi leipaw phu nynh thua hae.

³Mih lae kha li hawte a koi hae; byaccing hanlan thua leite hynbya hanlan kha ram lungkhu kya thawzung a hoithung hae; hoyleinaw ccangkheit koute ccangkheit rae hae zah, kae kha yn nyh khyh hae, cite BAWIPAW nynh a ci.

⁴Nae innpaw hae kha raeringkuh oh, nae puizia lu kheit sanmah doliakuh nan oh; pawccecize nae puizia miakaw tuh ahynthyapaw thua hae zah, ruiban miakaw tuh thethya a hothyapaw nynh athua hae.

⁵Mih balynte mih ruiban hae kha ling hae zah, byaccing a hopaw lu kheit san um khyh; hynbya ho lan mih lae kha a ccangpya hae; hoyleinaw kha rae hae zah ngaesiku khylan myaryamaw a ngaethang vae hae.

⁶Tuaasahkunaw kha ccangkheit koute ccangkheit, lingkunaw kha mah ccangkheit koute ccangkheit a rae hae! Kae kha yn nyh ry khyh hae, cite BAWIPAW nynh a ci.

⁷Tukeiccuze, vaaw BAWIPAW nynh a hopaw tuh: Minmin kha sivaw tuisahte thyaasah hawte ka thyaasah cih hae zah, ka syntawtua cih hae, aseipaw ka ccungccaw hae hanlan pawmou ka cyih kho ung cih?

⁸Mih lae tuh chinawpaw the thua zah, khalang lungkhu te hynbya kha a ho. Mih balynte mih innpaw hae kya nawnekute bya kha a ho hae, thuasalama mih lungkhu kya tuh dokhawnaw kha a paccyn hae.

⁹E mih cyisahnaw hanlan de ka tah lan khyh hae tou? Hynhcihawpaw minphuin tungvaw khe liarunaw kha ka thuakhae lan khyh tou? cite BAWIPAW nynh a ci.

¹⁰Mua hae te ramkaw sahiin paeekunaw hae hanlan ka rah ka khui cih, pawccecize tuh-e ram hae tuh maee nynh a u keiccuze humhung nynh mah tuin kya cceih vae khyh hae, sahiin siho mah thae lan um khyh; vaawlang e pavaw hae te sarangpaw hae mah ccue hae zah um vae khyh hae.

¹¹Jerusalem kha arohpaw apumkuhpaw, ram-ui karung lang ka rae cih; Judah ram e khua hae kha arohpaw, ccungccaw a um leipaw lang ka rae cih.

¹²E acyihkuhpaw hynh thaethya lan ciate ahawpaw hummou a um? E kong hynh a ho kho ccaw cite, BAWIPAW nynh hummou a hopya? Lu kheit nynh sanmah a ccia vae khyh ccaw cite pawccemou ram tuh roh zah, ramkaw hawte ccungccaw phe adae?

¹³BAWIPAW nynh a hopaw tuh: “Mih malang ka nungpya hae paw ka kawbya kha vua hae zah, ka bya kha eite zui khyh hae,

¹⁴mih minpaaw hae nynh a ccangpya hae hawte, mih lungkhung thyhte um hae zah Baal pachia kha a zui hae,” a ci.

¹⁵Tukeiccuze Israel Pachia, vaaw BAWIPAW nynh hynhte a ho: E ccungccaw hae hynh eccangkary kha ka dang cih hae zah, chi sii thungkuhpaw tui kha nia lan ka pya cih hae.

¹⁶Minmin te mih minpaaw hae nynh a la ny boi lei hae paw minphuin hae laku khe phiariphiarae ka nung cih hae; minmin kha ka maemih mawlaezung hae, mih nulang te thaloi kha ka sawnua cih hae, a ci.

¹⁷Vaaw BAWIPAW nynh hynhte a ho: Hoyte tua oh lah, a rah a khuithyapaw nopi hae kha ko oh; michi hlaw a sahthya hae paw nopi hae kha kosah oh;

¹⁸Aening hanlan michi hlaw kha arangte oun sahpah hae sah, tuhteze nynh ah mitphi alua cih zah, ah mitteky kyate tui alua cih.

¹⁹Zion kya-e rawnaw roi thae athuapaw tuh: “Hohcih ciate mou ronaw ah teing oh! Ah teing oh paw maethyanaw tuh myaryamaw accih, pawccecize ah ram kha ah cciataw oh zah, ah inn ah lo hae kha phe ah vuasya vae oh,” a ci hae.

²⁰Pou nopi hae, BAWIPAW bya kha ngaetua oh, nae nakaring nynh a khalang lungkhu e bya kha thae sah; nae ccanung hae kha michi hlaw ccangpah oh lah, nae innpaw hae ryte ngaethyanaw hlaw kha ccangpakuh oh.

²¹“Chinaw tuh aening thanlan-aw lungkhu lang yn tee zah, aening siapharan inn hae kalan yn tee vae, imua hae kha laanpi kyate maemih hae zah, ccangvae hae kha khualae e laanpi hae kyate a maemih hae.”

²²BAWIPAW nynh hynhte a ho: “Michi rhua hae tuh loo lungkhu khe ia hawte thuasah, loohruetu nukhu e ccamua hawte thuasah a khuliakuh cih hae zah, a sueluatu lu kheit san um lan khyh,” a ci.

²³BAWIPAW nynh hynhte a ho: A hawpaw ccungccaw nynh a hawnaw khate pookuh nan sah, a thawsaepaw nynh a thawsaenaw khate pookuh nan sah, mihoipaw nynh a hoipaw khate pookuh nan sah;

²⁴thuasalama pooku a rypaw nynh tuh, BAWIPAW ka thuanaw yn nyh zah yn thaethyanaw kyakhe pookuh sah; laephi vawlan hin atynpaw sungsakunaw, byading te dingnaw khate rya ka lah, pawccecize e uccaw hae kyahin ka lungrythua, cite BAWIPAW nynh a ci.

²⁵BAWIPAW nynh a hopaw tuh: Mih pynsaw vingdung rou kha aw athua hae paw Izip hae, Judah hae, Edom hae, Ammon hae, Moab hae te mih sang ngokuh hae paw laesia ram a um hae paw balyn tungvaw detahnaw nin tuh yn thua ccaccing cih. Pawccecize e minphuin hae tuh vingdungawkuh khyh hae, Israel hae balyn mah mih thinlung kya vingdungawkuh khyh hae.