Read Zotung Chin EZEKIEL 1 Bible Online

EZEKIEL 1 - Zotung Chin bible

EZEKIEL 1

¹Kum sung thum kum, sawpaw sah palinaw, nin pangaw nin kya Khebar vawkhu kin khe kyngte ramccang lang a cciakhae hae paw kya ka um lyakhe vaawlui tuh yn hungkuh zah Pachia kya-e vizin kha ka muih.

²Tuh-e sawpaw nin pangaw nin khe (tuin nin tuh Jehoiakhin Siapharan kha kyngte ramccang lang a cciakhaenaw hae kum pangawnaw kum nynh thua),

³Khaldi ram, Khebar vawkhu kin khe BAWIPAW bya tuh Buzi ccapaw ranpibawi Ezekiel kalan yn thua; te tuin kyakhe BAWIPAW kuih tuh a tungvaw khe a um.

⁴Ngawran ka do lyakhe, myarya rupaw khise tuh thahlang te yn zaw: tuh-e khise kyakhe phaephae akpaw nynh phang koihlupaw myarya lepaw maeking te dalahdalah awpaw maee a um, te maee lungkhu tuin sohin hawte a awpaw awnaw a um.

⁵Tuh-e maee lungkhu tuin ahiinpaw ahysuepaw ccangpali a um. Tuh-e hae mih muinsan tuh: ccungccaw muinsan lo hae zah,

⁶ccangkheit ze mitmae ccangpali hoi hae zah sake ccangpali cci a hoi hae.

⁷Mih ccu tuh lawbabin lan cih zah mih ccukaw tuh vaetuataw ccukaw nynh alo; phaephae akpaw sohin hawte a ak hae.

⁸Mih sake kaw, mih pyn san pali khe ccungccaw kuih a hoi hae. Tuh-e ccangpali hae nynh mitmae hae te sake hae a hoi hae:

⁹mih sake hae tuh ccangkheit te ccangkheit a tungkuh hae; tuh-e hae tuh a ccia hae ze maeku leite malang lawbabin lan a cceih hae.

¹⁰Mih mae muinsan tuh: ahiinpaw ahysuepaw ccangpali hae maesue tuh ccungccaw maesue hoi hae zah, mih ranglang khe chindeih maesue, mih voilang khe tangnuapaw maesue, mosipi maesue a hoi hae;

¹¹tuh hawte nynh mih maesue tuh athua hae. Mih sake kha mih luki langkhe tharae a daw hae; ahiinpaw ahysuepaw ccangkheit cci nynh sake bua ning cci a hoi hae, mih sake bua kheit tuh ccangpaw ahiinpaw ahysuepaw sake te tungsakuh hae zah ccangpaw bua kheit nynh mih pyn kha a bong.

¹²Ahiinpaw ahysuepaw ccangkheit cci tuh muisaw nynh a ccianaw miakaw langkhe ccanglang maeku leite malang khe lawbabin lan a cceih hae.

¹³Tuh-e ahiinpaw ahysuepaw hae ngaelung khe maee-e aruapaw alopaw, ahiinpaw ahysuepaw hae laku kya nulang malang a nuekuh bungthungpaw maeekhua alopaw a um; maee tuh phaephae ak zah maee kyate khozaw alaekuh.

¹⁴Ahiinpaw ahysuepaw hae tuh khozawlaekuhpaw hawte nulang malang rangtareih lan a ccue bungthung hae.

¹⁵Ahiinpaw ahysuepaw hae kha ka do lyakhe, tuh-e ccangpali hae mih pepan raveih khe leccu ccangkheit cci kha laekhu khe ka muih.

¹⁶Leccu hae muinsan te a raenaw hae paw tuh hynhte nynh thua: mih muinsan tuh phaephae akpaw, aphutepaw lung te lokuh zah, ccangpali mawte mih muinsan pong lokuh hae; a raenaw hae paw tuh leccu ccangkheit lungkhu a umpaw leccu ccangkheit te nynh aloku.

¹⁷He a ccia hae ze, leccu ccangpali hae tuh ccanglang pawpaw kalan mah maeku leite pynkheit lan a cceihthya hae.

¹⁸Leccu hae tuh hang hae zah ri lan a um hae, pawccecize tuh-e leccu hae ccangpali mawte po voilu lan mit a hoi hae.

¹⁹Ahiinpaw ahysuepaw hae tuh he a ccia vae hae ze, mih pe khe leccu hae tuh a cceihbua hae; ahiinpaw ahysuepaw hae tuh laephi kyate he a hangku vae hae ze, leccu hae mah a hangkuh bua hae.

²⁰Muisaw nynh a ccianaw miakaw langkhe minmin tuh cceihbua hae zah, minmin ryte leccu hae tuh a hangkuh bua hae; pawccecize ahiinpaw ahysuepaw hae muisaw tuh leccu hae kya a um.

²¹Ahiinpaw ahysuepaw hae tuh a ccia hae ze, leccu hae mah cceihbua hae zah, a thadyn vae hae ze leccu hae mah a thadynbua hae; laephi kyate he a hangku hae ze, leccu hae mah a hangkuh bua hae; pawccecize ahiinpaw ahysuepaw hae muisaw tuh leccu hae kya a um.

²²Ahiinpaw ahysuepaw hae lu luki khe adawkuhpaw te lokuh zah muinsado hawte a akpaw, mih lu luki tharae dawkuhpaw a um.

²³Adawkuhpaw zakaw khe mih sake hae kha ccangkheit nynh ccangpaw ccangkheit kalan khe lawbabin lan a daw hae, tuh-e ahysuepaw hae ccangkheit cci nynh mih pyn abongpaw sake ccangning cci a hoi hae.

²⁴He a ccia hae ze, tui alepaw roi hawte thuasah, Alesaepaw kya-e kholungthyhpaw hawte thuasah mih sake roi kha ka thae, ngaluin-ngaluin accaepaw roi tuh rhawkaw hae roi hawte nynh athua; he a thadyn hae ze, mih sake kha a sawbung hae.

²⁵Te mih lu luki umpaw adawkuhpaw kyate roi roikheit yn ccae; he a thadyn hae ze, mih sake kha a sawbung hae.

²⁶Mih lu luki umpaw adawkuhpaw vawlan khe nilar lung alopaw, bawitungkhung tahawpaw a um; tuh-e bawitungkhung vawlan tuin ccungccaw muinsan alopaw tuh a haung.

²⁷Atae alopaw kyate palung lang kyakhe phaephae akpaw sohin te alokuhpaw, po voilu lan maee te alokuhpaw kha ka muih; atae alopaw kyate alia lang kyakhe maee te alokuhpaw, po voilu lan dalahdalah akpaw kha a um.

²⁸Tuhte po voilu lan dalahdalah akpaw muinsan tuh khuaaraw ccyh lya maeking kya alangkuhpaw sawdoih te nynh aloku. E hynh BAWIPAW phu-enaw te alokuhpaw muinsan nynh thua. Tuh-e tuh he ka muih te, ka mae ka sahbung, te lukhakheit nynh bya a hopaw roi kha ka thae.