Read Zotung Chin EZEKIEL 10 Bible Online

EZEKIEL 10 - Zotung Chin bible

EZEKIEL 10

¹Te ka do zah, cherubim lu vawlan adawkuhpaw vawlan khe nilar lung te lokuh zah bawitungkhung te alokuhpaw kha ka muih.

²Pachia nynh boei akuakuhpaw a lawkuhpaw pisepaw kha, “Cherubim hae zakaw umpaw leccu hae laku langkhe cciatua; cherubim hae laku umpaw maee-e kha na kuih te lah lah, khuapi vawlan khe heitua,” a cipya. Te ka muihnaw mawkhe aning tuh a cceih.

³Tuh-e pisepaw nynh a tee lyakhe cherubim hae tuh beikinn te alia langkhe a thadyn hae; voidu lungkhu tuh maeking nynh pong a zithin.

⁴Te BAWIPAW phu-enaw tuh cherubim hae kyate beikinn thuakaw kalan khe a nuekuh thung; beikinn tuh maeking te phe beih zah, voidu tuh BAWIPAW phu-enaw phaephae akpaw te phe abeih.

⁵Alesaepaw Pachia nynh bya a hopaw roi hawte, cherubim hae mih sake roi tuh voidu atolang te heize thae kho athua.

⁶BAWIPAW nynh akuakuhpaw boeining a lawkuhpaw pisepaw kha, “Cherubim hae laku kya-e leccu hae lungkhu umpaw maee kha lawtua,” cite kaw he a pya te, tuh-e paw nynh tee zah leccu pe khe a thadyn.

⁷Te cherubim hae laku kya-e cherub ccangkheit nynh mih laku umpaw maee kalan khe a kuih kha dyng zah, maee beihtaraw kha a lah koute akuakuhpaw boeining a lawkuhpaw pisepaw kuih kya a nung, te tuh-e paw nynh maee tuh lah zah a poukhae.

⁸Cherubim hae sake kaw khe ccungccaw kuih alopaw kha yn langkuh.

⁹Ka do zah, cherub ccangkheit pe khe leccu ccangkheit ccite, cherubim hae pe khe leccu ccangpali a um; leccu hae muinsan tuh aphutepaw lung phaephae akpaw te nynh aloku hae.

¹⁰Leccu ccangpali tuh mih muinsan lokuh zah, leccu ccangkheit lungkhu khe ccangpaw leccu ccangkheit bingpaw te nynh aloku hae.

¹¹Cherubim hae tuh he a ccia hae ze, ccanglang maeku leite san kheit lang a cceihthya hae; ccangpaw leccu hae nynh mah ccanglang maeku leite malang sangpaw leccu nynh a hawinaw langkhe a zui hae.

¹²Mih pyn tuh abalyn mawte, mih ke, mih kuih, mih sake, te leccu hae ccangpali mawte mit te phe abeih hae.

¹³Leccu hae tuh, “Amiakuhpaw leccu hae” cite ka thaenaw khe a ho hae.

¹⁴Cherub ccangkheit nynh mae maepali cci a hoi hae: ccangkheitnaw mae tuh cherub maesue, ccangningnaw tuh ccungccaw maesue, ccangthumnaw tuh chindeih maesue, ccangpalinaw tuh mosipi maesue nynh thua.

¹⁵Cherubim hae tuh a thokuh hae. E hae tuh Khebar vawpi pe ka muih hae paw ahiinpaw ahysuepaw hae nynh athua hae.

¹⁶Cherubim hae tuh he a ccia hae ze, mih pe khe leccu hae tuh a cceihbua hae; cherubim hae nynh laephi kyate hangku khylan mih sake kha he a daw hae ze, mih pe umpaw leccu hae tuh ccanglang maekuh khyh hae.

¹⁷Cherubim hae tuh a thadyn hae ze, leccu hae mah thadynbua hae zah, a thoku hae ze leccu hae mah a thokuh bua hae; pawccecize ahiinpaw ahysuepaw hae muisaw tuh leccu hae kya a um.

¹⁸Tetuh BAWIPAW phu-enaw tuh beikinn thuakaw kyate pou zah cherubim hae vawlan khe a thadyn.

¹⁹Cherubim hae nynh mih sake hae kha daw hae zah ka muihnaw khe laephi kyate a thokuh hae, mih pe umpaw leccu hae ryte a pou hae. BAWIPAW beikinn nithua lang e koikua kyakhe a thadyn hae; te Israel Pachia phu-enaw tuh mih vawlan khe a um.

²⁰E hae tuh Khebar vawpi pe, Israel Pachia zakaw kya ka muih hae paw ahiinpaw ahysuepaw nynh thua hae; te e hae tuh cherubim hae nynh athua hae cipaw ka ny.

²¹E hae ccangkheit cci nynh mae maepali, sake kepali cci hoi hae zah, mih sake kaw khe ccungccaw kuih te alokuhpaw a um.

²²Mih maesue tuh Khebar vawpi pe ka muih hae paw maesue hae te nynh aloku hae. Mih balynte malang khe lawbabin lan a cceih hae.