Read Zotung Chin EZEKIEL 12 Bible Online

EZEKIEL 12 - Zotung Chin bible

EZEKIEL 12

¹BAWIPAW bya tuh ka kya yn thua zah:

²Ccungccapaw, nang tuh rhawdou a mangpaw ciihan laku kya nynh na um, minmin tuh muihnawpaw mit a hoi hae zemah a muih lei hae paw, thaenawpaw nakaring a hoi hae zemah a thae lei hae paw nynh thua hae;

³pawccecize minmin tuh rhawdou a mangpaw ciihan nynh thua hae. Tukeiccuze, ccungccapaw, ram kyate a dee hae paw kya-e uccaw paccynku hawte paccynkuh lah, minmin nynh a muihnaw hae khuadae ccyh khe ram kyate a dee hae paw hawte cciatua; kyng athuapaw ccungccaw hawte a muihnaw hae khe na umnaw hmin kyate ccangpaw hmin kalan na cceih cih. Minmin tuh dou a mangpaw ciihan athua hae zemah poh a thaethya kho hae.

⁴Khuadae ccyh a muihnaw hae khe, a kyng hae paw nynh a phuku hae hawte, khuadae ccyh a muihnaw hae khe na phupaw kha lawku tua; te zete ccyh a muihnaw hae khe, a kyng hae paw hawte na pou cih.

⁵A muihnaw hae khe pang kha poh ua lan vih lah, tuin kyate na phupaw kha poukhae.

⁶Riryngmoh khe a muihnaw hae kyakhe phupaw kha na raw vawlan na khangkuh cih zah, na poukhae cih; laephi kha na muih khyh nawlan na mae kha na bongkuh cih; pawccecize Israel hae hanlan nang kha muihsahnaw lang kae rae vae, yn cipya.

⁷Kaw yn pya thyhte ka cyi. A kyng hae paw kya-e phupaw hawte, ka phupaw kha khuadae khe ka paccynku, zetesang khe pang kha ka kuih te po ua lan ka vi; mih muihnaw khe phupaw kha ka raw vawlan khangkute riryngmoh khe ka poukhae.

⁸Awkhualan awkhua khe BAWIPAW bya tuh ka kya yn thua zah:

⁹Ccungccapaw, rhawdou a mangpaw Israel ciihan nynh nang kha, “Pawmou na cyi?” cite ae khia khyh hae tou? a ci.

¹⁰Minmin kha hynhte hopah hae, Bawipaw PACHIA nynh hynhte a ho: E hodaepaw bya tuh Jerusalem umpaw uktu bawi te tuin kya umpaw Israel phin balyn hanlan nynh thua.

¹¹Kae tuh nanning hanlan muihsahnaw nynh ka thua: Ka cyi hawte, minmin kha cyi athua cih hae; minmin tuh kyng athua cih hae zah, a kyng hae paw umnaw kalan a cceih cih hae.

¹²Minmin kya a umpaw uktu bawi tuh riryngmoh khe a phupaw kha a raw vawlan a khangkuh cih zah, a toikuh cih; pang kha a vikuh cih zah a poukhae cih; a mit te laephi kha a muih khyh ccaw cite, a mae kha a bongkuh cih.

¹³Aning kha ka miabu te ka bong cih zah, ka kaang kya a kae cih; Khaldi hae ram, Babilon khuapi kalan ka cciakhae cih, tuh-e khuapi kya a chi zemah tuh-e khuapi tuh muih lan khyh.

¹⁴Amaw a umlu hae paw balyn, amaw a bawmtu hae te a rhawkaw hae balyn kha teitei lang balyn pong ka phia cih hae; mih nulang te thaloi khate ka zui cih hae.

¹⁵Minmin kha minphuin ccangpaw hae laku te ram hae kalan phiariphiarae he ka nung hae te, minmin nynh kae tuh BAWIPAW ka thuapaw kha yn nyh cih hae.

¹⁶Thuasalama minmin kya-e beihtaraw kha tuh thaloi kyate thuasah, ccakannaw te shethya kyate thuasah ka luesah cih hae, tuhteze nynh minmin nynh a thuanaw hae minphuin ccangpaw hae kyakhe mih nungsikunaw balyn kha a ho cih hae; tetuh minmin nynh kae tuh BAWIPAW ka thuapaw kha a nyh cih hae.

¹⁷BAWIPAW bya tuh ka kya yn thua zah:

¹⁸Ccungccapaw, na looh kha thyngkute ae lah, na tui kha thyngku ri biate niatua;

¹⁹te ramccungccaw hae kha hynhte hopah hae, Israel ram e Jerusalem khuaccaaw hae te asekuhte Bawipaw PACHIA nynh hynhte a ho: Minmin nynh mih looh kha rikawte a ae cih hae zah, mih tui kha lungrote a neih cih hae, pawccecize tuin kya um hae paw balyn kya-e puathonaw keiccuze mih ram lungkhu umpaw balyn tuh azo cih.

²⁰Ccungccaw a la umnaw khuapi hae tuh aroh cih zah, ram tuh ccungccaw kharouh adae cih; tetuh nanning nynh kae tuh BAWIPAW ka thuapaw kha na nyh cih oh.

²¹BAWIPAW bya tuh ka kya yn thua zah:

²²Ccungccapaw, “Accyh tuh dyadya alia vae, vizin miakaw tuh accakaepaw lang nynh a tang,” cite Israel ram konglang na hopaw e phungtangbya hynh pawtemou athua?

²³Tukeiccuze minmin kyakhe, “Bawipaw PACHIA nynh hynhte a ho: E phungtangbya hynh ka thangsah vae cih zah, Israel ram kya phungtangbya lang mang vae lan khyh hae. Thuasalama accyh anae vae, vizin miakaw tuh accing cih,” cite hopah hae.

²⁴Israel phin kya akyh leipaw vizin um vae lan khyh, akyh leipaw profehbya mah um vae lan khyh.

²⁵Thuasalama kae, BAWIPAW nynh ka ho lanpaw bya kha ka ho cih zah, tuh-e bya tuh accing cih. Tuh-e bya tuh a thysung vae lan khyh. Pou rhawdou a mangpaw phin, nae she kya bya ka ho cih zah ka ccingsah cih, cite Bawipaw PACHIA nynh a ho.

²⁶BAWIPAW bya tuh ka kya yn thua zah:

²⁷Ccungccapaw, Israel phin hae nynh, “Aning nynh a muihpaw vizin tuh malang kum patae hanlan nynh thua; ccyh hynhsepi hanlan nynh profehbya a ho,” a ci hae.

²⁸Tukeiccuze minmin kha hopah hae, Bawipaw PACHIA nynh hynhte a ho: Ka bya tuh accyh nue vae lan khyh, ka hopaw bya tuh accing cih, cite Bawipaw PACHIA nynh a ci.