Read Zotung Chin EZEKIEL 14 Bible Online

EZEKIEL 14 - Zotung Chin bible

EZEKIEL 14

¹Israel piccan abang tuh ka kya oun thua hae zah ka malang a haung hae.

²Te BAWIPAW bya tuh ka kya yn thua zah:

³Ccungccapaw, e ccungccaw hae nynh mih zohtuh hae kha mih thinlung kya lawkuh hae zah, mih hoyleinaw kha mih malang khe thykunawpaw lang a nungkhaw hae; kae tuh minmin nynh tuanaw ngiakupaw lang ka tang cih tou?

⁴Tukeiccuze minmin kha hopah hae, Bawipaw PACHIA nynh hynhte a ho: Mih zohtuh hae kha mih thinlung kya lawkuh hae zah mih hoyleinaw kha mih malang khe thykunawpaw lang a nungkhaw hae paw Israel hae miakaw nynh profeh kalan oun cciakhae hae; mih zohtuh patae ryte oun cceih hae paw kha kae, BAWIPAW nynh bya ka leih cih hae,

⁵tuhteze nynh mih zohtuh hae liate ka kyate asawkuh hae paw balyn, Israel hae thinlung kha ka kyng kho cih.

⁶Tukeiccuze Bawipaw PACHIA nynh hynhte a ho cite minmin kha hopah hae: Ngaesikuh oh lah, nae zohtuh hae kyate maeleihkuh oh; nae nungsikunaw balyn kyakhate nae mae kha ccanglang hawi oh.

⁷Ka kyate phiakuh hae zah, mih zohtuh hae kha mih thinlung kya lawkute, mih hoyleinaw kha mih malang khe thykunawpaw hawte nung hae salamah, ka rynaw khiatua khylan profeh kalan a cceih hae paw Israel phin miakaw kha thuasah, Israel ram a umpaw ramccang hae miakaw kha thuasah kae, BAWIPAW ccaccei maw nynh minmin kha bya ka khung cih hae.

⁸Minmin kha rawsete ka hawilia cih hae; minmin kha muihsahnaw te byaphung lang ka rae cih hae zah, ka ccungccaw hae laku kyate ka vua cih hae; te nanning nynh kae tuh BAWIPAW ka thuapaw kha na nyh cih oh.

⁹Profeh lu kheit kha hopya thua zah, tuh-e thyhte bya a ho lanze, tuh-e profeh tuh kae, BAWIPAW nynh ka hynsah vae, tuh-e paw tuh ka kuih ka dyngnua cih zah, ka ccungccaw Israel hae laku kyate ka roh cih.

¹⁰Minmin tuh detahnaw a teing cih hae—profeh tungvaw detahnaw te profeh kha bya a khiatupaw tungvaw detahnaw tuh alokuh cih—

¹¹tuhteze nynh Israel hae tuh ka kyate ccanglang cceihsei lan khyh hae zah, mih cyiseinaw balyn khate mimaw toulou kha thusakuh vae lan khyh hae. Tetuh minmin tuh ka ccungccaw hae athua cih hae zah, kae tuh mih Pachia ka thua cih, cite Bawipaw PACHIA nynh a ci.

¹²BAWIPAW bya tuh ka kya yn thua zah:

¹³Ccungccapaw, ram ramkheit nynh ka tungvaw lungzi leite um zah a sei ze, ka kuih ka dyngnua zah, looh bawmnaw kha paetawte a tungvaw khe ccakan ka ccisah, te ccungccaw hae te sarangpaw hae kha ka chia hae,

¹⁴Noah, Daniel te Job, e lu thum hae maw heize a la um hae ze, mih dingnaw liate mimaw hiinnaw kyalya kha a khumkuh cih hae, cite Bawipaw PACHIA nynh a ci.

¹⁵Ram kha ro khylan loramsaw hae kha ram phe lekuh lan ka sawnua hae ze, ram kya daetedae cih. Tuh-e loramsaw hae keiccuze hum sanmah cceih kho lan khyh;

¹⁶kae tuh ka hiin thyhte, e lu thum hae tuh a la um hae ze heize, mih ccanung hae te mih ccapaw hae kha khum kho lan khyh hae; mimaw makhae kha khum athua cih hae zah, ram tuh ccungccaw phe adae cih, cite Bawipaw PACHIA nynh a ci.

¹⁷Tuhkhyhze tuh-e ram tungvaw thaloi thuakhaete, “Thaloi tuh ram pynpi phe lekuh lan cceih sah,” cite ka ho zah ccungccaw hae te sarangpaw hae kha ka chia hae ze,

¹⁸kae tuh ka hiin thyhte, e lu thum hae tuh a la um hae ze heize, mih ccanung hae te mih ccapaw hae kha khum kho lan khyh hae, mimaw makhae kha khum athua cih hae.

¹⁹Tuhkhyhze ccungccaw hae te sarangpaw hae kha chia khylan, tuh-e ram kya shethya ka thuasah zah, ka thinrianaw tuh tuh-e ram kya chiise te ka bu lanze,

²⁰Noah, Daniel te Job tuh a la um hae ze heize, kae tuh ka hiin thyhte, mih ccanung hae te mih ccapaw hae kha khum kho lan khyh hae; mih dingnaw liate mimaw hiinnaw rou kha nynh a khumkuh kho cih hae.

²¹Pawccecize Bawipaw PACHIA nynh hynhte a ho: Jerusalem kyate ccungccaw hae te sarangpaw hae kha chia khylan chinawpaw ka detahnaw phuin pali, thaloi, ccakannaw, loramsaw hae te shethya kha Jerusalem tungvaw he ka thuasah te, hohcihmou luenaw houh aruhua cih!

²²Tuhzemah, poukhae athua cih hae paw ccanung ccapaw ahiinhy hae paw kha tuin kya a um cih hae; minmin tuh na kalan oun thua cih hae. Mih ozia te mih cyisahnaw kha he na muih hae te, Jerusalem tungvaw ka thuakhaepaw hoyleinaw balyn hanlan kha lungdaenaw pya na thua cih.

²³Mih ozia te mih cyisahnaw kha he na muih hae te, minmin nynh nang kha lungdaenaw ae pya cih hae; Jerusalem tungvaw ka la cyipaw balyn tuh akonglang um leite ka cyi khyhpaw kha na nyh cih, cite Bawipaw PACHIA nynh a ci.